Jiri Jihova Evaọ Udevie Ogbotu Na

¹ Kukpe kukpe ikokohọ ubrotọ mai e rẹ k’omai obọdẹ uvẹ nọ ma re ro jiri Jihova. Iroro mai e wọhọ erọ Devidi, ọnọ ọ so nọ: “Evaọ udevie ogbotu na mẹ jẹ te kẹ owhẹ akpẹwẹ; me ti jiri owhẹ evaọ iraro ahwo buobu.” (Ol. 35:18) Eva Okokohọ Ubrotọ “Ẹmeoyo kẹ Ọghẹnẹ” nọ ọ be tha na, ẹvẹ o sai ro mu omai ẹro inọ wọhọ ahwo nọ a wo okugbe ọvo, ma be wha ujiro se Jihova?

² Edhere jọ nọ ma sai ro ru onana họ ẹkwoma ẹgọ mai gbe uruemu mai. Ogbẹgwae okokohọ ubrotọ jọ o ta nọ: “Ẹgọ gbe osẹ inievo na ọ jọ kpatiẹ. Inievo na avọ emọ rai a keria ọgwa okokohọ na evaọ ẹruoke, yọ a dhesẹ emamọ uruemu evaọ etoke ọruẹrẹfihotọ na kpobi.” Ẹkwoma ẹgọ mai, ọrọwokugbe-ọvo nọ ma re wo, gbe uruemu mai, mai omomọvo ma rẹ sae zọhọ fihọ eme awere ujiro nọ i fo rọ kẹ Ọghẹnẹ mai.—1 Pita 2:12.

³ Ẹgọ gbe Osẹ Mai: Re ma sẹ osẹ mai evaọ oghẹrẹ nọ o rẹ rọ wha ujiro se Jihova o gwọlọ nọ ma rẹ jọ kpatiẹ. (1 Tim. 2:9) Ẹwẹ-obe avọ 132 ọrọ obe Isukulu Odibọgba na o ta nọ: “Ohwo nọ ọ rọ kpatiẹ ọ rẹ gwọlọ mu kpọ amọfa eva ha je mu si iroro bru oma riẹ.” Evaọ ekwotọ buobu, osẹ owhọwhọhọ o vọ oria kpobi no. Ghele na, oma nọ ma be dawo re ma wha ọghọ se Jihova o da riẹ ẹro fia. (Iruẹru 15:14) Nọ ma te kokohọ re ma gọ Jihova, ma rẹ gọ ẹgọ evaọ edhere nọ ọ rẹ wha orro nọ u fo Ọnọ ọ mai kpehru evaọ ehrugbakpọ na sei. (1 Irv. 29:11) Fikiere, ma rẹ whaha eware nọ i fo ho nọ ma rẹ wha—ekpa, iwu, hayo eware efa nọ a drọ hayo kere eme isigẹreti hayo eware efa fihọ—keme uvi Ileleikristi i re vovo ivovavovo ho.

⁴ U fo nọ ma re mu ẹro họ ẹgọ nọ ma rẹ gọ nọ okokohọ na o te kuhọ no kẹdẹ kẹdẹ. O tẹ make rọnọ ma sae gwọlọ wha ẹgọ nọ o kiehọ omai oma evaọ etoke eriosehọ hayo nọ ma be nyae re emu evaọ oria emuọriọ, o roja ghele re ẹgọ gbe osẹ mai o fo kẹ enọ “e be gọ Ọghẹnẹ.” (1 Tim. 2:10, NW ) Orọnikọ ẹgọ nọ ọ rrọ odode evaọ akpọ na o re dhesẹ onọ a rẹ jẹ rehọ họ. (1 Jọn 2:16, 17) Ebe Ileleikristi mai i wo iwoho nọ i re fiobọhọ, erọ ẹgọ ezae gbe eyae nọ e rẹ kpatiẹ ziezi evaọ iyero sa-sa. Ebaje okokohọ na no ma rẹ samu evaọ ẹwho okokohọ na o rẹ kareghẹhọ omai inọ mai yọ egbodibo Ileleikristi eva oke kpobi.—2 Kọr. 6:3, 4.

⁵ Dhesẹ Adhẹẹ kẹ Emẹjẹ Jihova: Olori Osu ehrugbakpọ na ọ ruẹrẹ ehaa họ k’omai no. (Aiz. 25:6; 1 Kọr. 10:21) Nọ ma te gine rri abọ nọ ma te jọ emẹjẹ abọ-ẹzi Jihova wo na ghaghae, ute mai o rẹ jọ re ma jariẹ evaọ edẹ esa okokohọ na kpobi. Kọ who ru ọruẹrẹfihotọ kẹ oria nọ who re wohọ, ofa, gbe uvẹ nọ who re mi evaọ oria iruo ra no? Kọ who fi oke ziezi họ no kẹ omaruẹrẹkpahe gbe epanọ wha re ro te oria okokohọ na ẹruoke re whọ ruẹrẹ oria ẹkeria họ, re who yere inievo na, je ku oma gbe ai rọ ujiro se Jihova ẹkwoma ole emuhọ gbe olẹ?—Ol. 147:1.

⁶ Adhẹẹ nọ ma re dhesẹ kẹ emẹjẹ Jihova o rẹ lẹliẹ omai kezọ ziezi kẹ eme ọruẹrẹfihotọ na je ru nọ ma gbe lele amọfa gbiku hu, re emu, hayo mu nya evaọ ọgwa okokohọ na. Esẹgbini, wha rọ eware nọ i re ru edo rọ gọ emọ ẹgọ họ yọ wha fi eviẹ nọ i re ru edo họ ai hi, keme enana e rẹ kpọ iroro ahwo no ẹme nọ a be ta. Jihova ọ be rọ ẹkwoma utu ọrigbo nọ o wo ẹrọwọ avọ areghẹ na kẹ omai emu abọ-ẹzi nọ ma gwọlọ enẹna. (Mat. 24:45) Jọ abọ okokohọ na ọvuọvo o vo omai vievie he. Esẹgbini a rẹ keria kugbe emọ rai je fiobọhọ kẹ ae re a wo erere no ọruẹrẹfihotọ na ze vọvọ.—Izie. 31:12.

⁷ A be ta k’omai inọ ma wha emu uvo lele oma viukpenọ ma re no ogege okokohọ na kpohọ otafe nyae gwọlọ emu dẹ evaọ etoke eriosehọ na. O rrọ oware ujiro gaga inọ ahwo buobu a nya lele uthubro nana eva okokohọ ukpe nukpo. U ti woma gaga nọ ahwo kpobi a te ru ere evaọ ukpe nana! Iviena kareghẹhọ ririe eware kpobi nọ i su fihọ otọ je ru oria na fihọ fuafo. (Hib. 13:17) Onana o rẹ k’omai obọdẹ uvẹ nọ ma rẹ rọ reawere omakugbe ọbọga kugbe inievo mai, jẹ zọhọ fihọ okegbe udhedhẹ nọ o rẹ wha orro se Jihova.—Ol. 133:1.

⁸ Isẹri-Ise Oke Gheghe: Nọ ma te bi kpohọ okokohọ je kpozi, ma wo uvẹ buobu nọ ma rẹ rọ rehọ igbenu mai jiri Jihova. (Hib. 13:15) Tọ ma be re emu evaọ oria emu-ọriọ hayo ma be tẹme kugbe ahwo nọ a wo ighẹ nọ ma wohọ, ahwo nọ a rrọ ehọtẹle ruiruo, hayo ahwo nọ ma gbẹ rrọ omoto, joma gwọlọ uvẹ nọ ma rẹ rọ ta usiuwoma. Eware abọ-ẹzi e te vọ udu gbe iroro mai no okokohọ na ze. Jọ ma ta eware ezi nana kẹ ahwo nọ ma nyaku kpobi.—1 Pita 3:15.

⁹ Ma be rọ ọwhọ rri kparo kpohọ uvẹ nana nọ ma re ro jiri Jihova “eva udevie ogbotu na.” (Ol. 26:12) Joma rọ okugbe ọvo jiri Jihova eva Okokohọ Ubrotọ “Ẹmeoyo kẹ Ọghẹnẹ” na.

[Study Questions]

1, 2. Didi uvẹ okokohọ ubrotọ na ọ rẹ k’omai, kọ idhere vẹ ma sai ro ru onana gba?

3, 4. Ẹvẹ omarokpotọ u re ro fiobọhọ k’omai g’ẹgọ evaọ edhere nọ o fo kẹ egbodibo Ileleikristi, eva okokohọ na gbe okenọ abọ okokohọ na o te kuhọ no?

5, 6. Ẹvẹ ma sai ro dhesẹ adhẹẹ kẹ emẹjẹ abọ-ẹzi Jihova?

7. Eme a ta k’omai nọ ma ru kpahe emu uvo, kọ fikieme?

8, 9. Uvẹ ofa vẹ nọ a re ro jiri Jihova okokohọ na ọ rẹ kẹ omai?

[Box on page 5]

Ekareghẹhọ Okokohọ Ubrotọ

◼ Oke Ọruẹrẹfihotọ: Ọruẹrẹfihotọ Edisoi-Oka o ti muhọ eva 9:20 a.m, Ẹdẹ-Ọmaha gbe Ẹdoka kọ 9:00 a.m. Iminiti jọ kakao re a te ti muhọ, ohwo-agbara na ọ te keria eplatfọmo na nọ a bi kporo ikporakporo na. Mai kpobi ma rẹ keria evaọ oke yena re ọruẹrẹfihotọ na ọ ruẹsi muhọ evaọ edhere ọkpakpatiẹ. Ọruẹrẹfihotọ Edisoi-Oka o ti kuhọ eva 4:55 p.m, Ẹdẹ-Ọmaha 4:35 p.m, gbe Ẹdoka 3:40 p.m.

◼ Eria nọ A rẹ Dhẹ Imoto, Emẹshini, gbe Idhighere Fihọ: Iviena rọwo kugbe ọkpọvio eruẹrẹahwohọ na evaọ eria nọ a rẹ dhẹ imoto, emẹshini, gbe idhighere fihọ re oria na o jọ kpatiẹ.

◼ Ẹrawo Oria Ẹkeria: Ahwo nọ wha gbẹ ruọ omoto ọvona ze hayo enọ wha gbẹ rrọ uwou ovona ọvo whọ rẹ sae rawo ekpala kẹ.

◼ Unevaze: O rẹ rehọ araha igho buobu re a ru ọruẹrẹfihotọ okokohọ ubrotọ. Ma rẹ sai dhesẹ ovuhumuo mai ẹkwoma azọhọ unevaze nọ ma re ru kẹ iruo akpọ-soso na evaọ obọ Egwa Uvie mai hayo obọ okokohọ na. Echẹke kpobi (obe nọ a rẹ rọ rehọ igho evaọ ebanke) nọ a ro ru unevaze fihọ itehe unevaze nọ e rrọ okokohọ na, a re kere fihọ iẹe nọ, wha ugho na kẹ “Watch Tower.”

◼ Emu Uvo: Ma be jiroro kẹ owhai inọ wha wha emu-uvo lele oma viukpenọ who re no ogege okokohọ na kpohọ otafe nyae gwọlọ emu dẹ evaọ etoke eriosehọ uvo na. Whọ rẹ sae jọ ọgwa okokohọ na re emu uvo ra. Ivie, who ru oria na fihọ tọtọtọ họ, hayo whọ nya siọ ebe ba otọ ọgwa na ha. Emu nọ a rẹ jọ ọgwa okokohọ na re u ti fiobọhọ kẹ ahwo kpobi nọ a jẹ reawere omakugbe ọbọga, jẹ jariẹ evaọ okenọ a bi mu abọ uvo na họ. O tẹ lọhọ, whọ rẹ sai fi orawo-emu osese họ otọ akpala ra. A kuvẹ orawo-emu ulogbo, eglase, ilolo, gbe imidhe nọ i re whu evaọ ọgwa nọ ahwo a be keria jọ gaviezọ na ha.

◼ Nọ Whọ tẹ be Rekọdo Ẹme: A re dhe uvumọ oware nọ a rẹ rọ rekọdo eme fihọ itepu hayo ividio fihọ ekwakwa ẹlẹtriki hayo erọ ẹmeọta nọ e rrọ ogege na vievie he, yọ a rẹ rehọ ekwakwa yena ruiruo evaọ oghẹrẹ nọ i gbe kpokpo amọfa ha.

◼ Iwoho Erehọ: Whọ tẹ be rehọ iwoho, whọ rehọ eflashe na ruiruo eva okenọ abọ okokohọ na ọ be nyaharo na ha. Whọ kpama no ọgwa okokohọ na nyae rehọ iwoho evaọ etoke nọ a be t’ẹme na ha, yọ who zizie ahwo nọ a be kokọ iwoho erehọ ziọ ogege okokohọ na te rehọ iwoho vievie he.—Jọn 2:16.

◼ Ipeja gbe Ifonu nọ I Wo Ufi Hi (GSM): A re ru enana fihọ oghẹrẹ nọ i gbe ro kpokpo amọfa ha.

◼ Omonwa gbe Eware-Idudhe: Ẹyao hayo omonwa idudhe o tẹ romavia evaọ ogege okokohọ na, iviena jẹ eruẹrẹahwohọ na riẹ re a vuẹ Ẹko-Iruo Obufihọ Ọsosuọ na, re ahwo ẹko-iruo obufihọ ọsosuọ nọ e riẹ iruo na ziezi nọ e rrọ ogege na a sae rọ ẹro te ẹbẹbẹ na.

◼ Iwou nọ A re Wohọ: Dhesẹ ubi ẹzi na evaọ okenọ a be k’owhẹ uwou nọ who te te ogege okokohọ na no. Who wohọ iwou nọ e rrọ ogege okokohọ na ha otẹrọnọ a gbẹ rehọ ae kẹ owhẹ hẹ. There emu evaọ oria nọ a kẹ uvẹ riẹ ọvo. Evaọ oke nọ u kpemu, a ruẹ ahwo jọ nọ a je there emu nọ ẹme ọ be nyaharo. Onana u dhesẹ ovuhumuo kẹ eware abọ-ẹzi vievie he.—Luk 10:38-42.

◼ Obusino Ebe Ekpokpọ: Oma-uhrowo, gbe ahwo-ogele e rẹ jariẹ vievie he re a ruẹsi wo ebe ekpokpọ tobọ. Romakpotọ dikihẹ uhie nọ a dhe họ na. Ma bi ru ọruẹrẹfihotọ re ma ruẹ nọ ebe ekpokpọ i te ahwo nọ a ziọ okokohọ na obọ.