Ruabọhọ Ẹhẹrẹ Jihova

¹ Aizaya o kere nọ: ‘Jihova họ Ọghẹnẹ nọ o re guẹdhọ kiete; jọ oghale u te ai kpobi, enọ e be hẹrẹ iẹe.’ (Aiz. 30:18b) Ikuigbe buobu e rrọ evaọ Ebaibol na kpahe ẹdhọguo obrukpe nọ Ọghẹnẹ o gu ewegrẹ riẹ gbe esiwo ọrọ idibo riẹ nọ i wo ẹrọwọ. Eme ikuigbe itieye na i re wuhrẹ enọ e be gọ Jihova nẹnẹ? Eme ma rẹ sai ru enẹna rọ ruẹrẹ oma kpahe kẹ “ẹdẹ ologbo avọ idudu ỌNOWO na”? (Joẹl 2:31, 32) Okokohọ Ubrotọ mai nọ uzoẹme riẹ o rrọ “Esiwo Ọ Kẹlino” na o te wọ omai roro kpahe enọ yena jẹ lẹliẹ omai kiẹ oma mai riwi. U ti fiobọhọ k’omai ruabọhọ ẹhẹrẹ Jihova.

² Kọ who ru ọruẹrẹfihotọ no nọ who re ro wo erere no edẹ esa okokohọ na ze? Wọhọ oriruo, kọ whọ nyabru ọga iruo ra no kpahe uvẹ nọ ọ rẹ k’owhẹ nọ who re ro kpohọ okokohọ na? Who du rẹro nọ a te nwane k’owhẹ uvẹ ababọ omodawọ ra ha. Lẹ kpahe iẹe. Kẹsena who ve mi uvẹ. (Neh. 2:4, 5) Epọvo na re, ma re go oke nọ ma re ro ru ọruẹrẹfihotọ ọrọ ofa, iwou nọ ma re wo họ, gbe eware efa nọ i wuzou họ obaro ho. Emamọ omaa utioye na u re dhesẹ ovuhumuo odidi mai rọkẹ ọruẹrẹfihotọ emuore abọ-ẹzi nọ Jihova ọ ruẹrẹhọ na. Jọ ekpako na a fi ẹro họ otọ ziezi re a fiobọhọ kẹ enọ e gwọlọ obufihọ evaọ omaruẹrẹkpahe kẹ okokohọ na, maero kọ enọ e kpako no evaọ ukoko na.—Gal. 6:10.

³ Uruemu Ezi O rẹ Kẹ Ọghẹnẹ Orro: Nọ ma te kokohọ buobu eva ikokohọ ilogbo, uruemu ezi mai u re se isẹri kẹ ahwo ẹwho na. Eme oyena o gwọlọ mi omai? Nọ ma tẹ rrọ eva ehọtẹle, oria nọ a jẹ dẹ emu re, gbe eria ekiọthuọ efa evaọ ẹwho okokohọ na, joma ru re uruemu uwoma Oleleikristi mai, wọhọ uye-oruẹ-krẹkri, omarokpotọ, oma-oyọrọ, gbe ororokẹ e wha omosasọ se enọ ma bi ru eware kugbe kpobi. (Gal. 5:22, 23; Fil. 4:5) Jo mai kpobi ma dhesẹ oghẹrẹ uyoyou nọ “u re ru eware etọtọ họ oma riẹ hẹ. [Nọ] o rẹ guọlọ orọ obọ riẹ hẹ; [nọ] o rẹ kpare ẹme ọgaga avọ ofu hu.” O tẹ make rrọ nọ ebẹbẹ hayo idhọvẹ jọ e romavia, ma re gbe ‘ru eware kpobi rọ kẹ Ọghẹnẹ oruaro.’—1 Kọr. 10:31; 13:5.

⁴ Nọ okokohọ ologbo jọ o kuhọ no, uruemu gbe osẹ izoge mai o were ohwo nọ o wuzou ehọtẹle jọ gaga te epanọ ọ rọ ta nọ o te were iẹe re “Isẹri Jihova a hae kpahe ehọtẹle riẹ ẹsikpobi.” O rrọ oware evawere gaga! Onana u dhesẹ nọ esẹgbini a wuhrẹ emọ rai ziezi jẹ nabi muẹrohọ ai ziezi. O rẹ jọ oware nọ u fo vievie he re esẹgbini a kẹ emọ rai uvẹ re ai ọvo a jọ ababọ ẹromuhọ. U fo re a muẹrohọ emọ ziezi ẹsikpobi. (Itẹ 29:15) Jọ uruemu uwoma rai o wha ajiri se Jihova je ru udu riẹ ghọghọ!—Itẹ 27:11.

⁵ Ẹgọ gbe Osẹ Okpakpatiẹ: Mai omomọvo ọ sae zọhọ fihọ eme iwoma nọ a rẹ ta kpahe omai eva okokohọ na ẹkwoma ẹwhaha ekielele osẹ nọ o nwani kieze kpobi, okpẹgọ nọ o vrẹta, hayo nọ ọ rrọ kpatiẹ hẹ. Onana u kie kpahe okenọ ma te bi kpohọ okokohọ na je no okokohọ na kpozi, gbe nọ ma rrọ okokohọ na. Wọhọ idibo Ọghẹnẹ, oware nọ o mae rrọ ọdawẹ k’omai họ odẹ Jihova gbe eme nọ a rẹ ta kpahe iẹe, orọnikọ onọ o were omai hayo nọ u kiehọ omai oma ha. Enọ i wuzou uviuwou a wo owha-iruo nọ a rẹ rọ ruẹ nọ ẹgọ gbe osẹ uviuwou rai u re dhesẹ omurokpotọ avọ uvi iroro eva oke kpobi.—1 Tim. 2:9.

⁶ U te je wuzou re ma wha ẹgọ gbe osẹ nọ u wo ọghọ evaọ oke kpobi nọ ma rrọ eria nọ ma wohọ, ehọtẹle, iwou-eki, gbe eria efa nọ a jẹ dẹ emu re. O tẹ make rrọ nọ ma be nyae dẹ emu evaọ oria ofa nọ abọ okokohọ na o te kuhọ no, u fo re ma wha emamọ ẹgọ. Ebaje okokohọ mai nọ ma rẹ sa mu u re rovie uvẹ k’omai nọ ma re ro se isẹri oke-gheghe.—2 Kọr. 6:3, 4.

⁷ Aizaya ọ ruaro nọ: “ỌNOWO na ọ be hẹrẹ re o ri owhai aro, fikiere ọ jẹ kparoma riẹ kpehru re o dhesẹ ohrọ kẹ owhai.” (Aiz. 30:18a) Ovuhumuo kẹ ohrọ gbe aruoriwo Jihova o rẹ w’omai rọ ọghọ kẹe ẹkwoma uruemu gbe osẹ mai nọ ma bi kokohọ kugbe eva ikokohọ mai na. Jọ Okokohọ Ubrotọ “Esiwo Ọ Kẹlino!” na ọ kẹ Ọghẹnẹ mai oruaro je fiobọhọ k’omai ruabọhọ ẹhẹrẹ Jihova!

[Study Questions]

1. Eme họ uzoẹme okokohọ ubrotọ na, kọ fikieme u ro fo?

2. Ẹvẹ ma sai ro dhesẹ nọ ma wo ovuhumuo kẹ okokohọ ubrotọ mai?

3. Didi oghẹrẹ uruemu u fo nọ idibo Jihova a re dhesẹ evaọ ẹwho okokohọ na?

4. Ẹvẹ esẹgbini a sai ro fiobọhọ kẹ emọ rai kpọ omarai evaọ edhere nọ ọ rẹ wha ujiro se Jihova?

5. Ẹvẹ ma sae rọ rehọ ẹgọ gbe osẹ mai rọ kẹ Jihova orro?

6. Fikieme ma jẹ wha oghẹrẹ ẹgọ nọ o wo ọghọ evaọ okenọ okokohọ ọ tẹ fa no wọhọ epaọ onọ ma wha evaọ oke okokohọ na?

7. Ẹvẹ ma sae rọ zọhọ fihọ ẹkpatiẹ gbe evawere okokohọ na? (Rri “Ekareghẹhọ Okokohọ Ubrotọ.”)

[Box on page 6]

Ekareghẹhọ Okokohọ Ubrotọ

◼ Oke Ọruẹrẹfihotọ: Ọruẹrẹfihotọ Edisoi-Oka o ti muhọ eva 9:20 a.m, ọrọ Ẹdẹ-Ọmaha gbe Ẹdoka o ti muhọ eva 9:00 a.m. Iminiti jọ kakao re a te ti muhọ, ohwo-agbara na ọ te keria eplatfọmo na nọ a bi kporo ikporakporo na. Mai kpobi ma rẹ keria evaọ oke yena re ọruẹrẹfihotọ na ọ ruẹsi muhọ evaọ edhere ọkpakpatiẹ. Ọruẹrẹfihotọ Edisoi-Oka o ti kuhọ eva 5:05 p.m, ọrọ Ẹdẹ-Ọmaha o ti kuhọ eva 4:35 p.m, gbe 3:40 p.m. eva Ẹdoka.

◼ Ẹrawo Oria Ẹkeria: Ahwo nọ wha gbẹ ruọ omoto ọvona ze hayo enọ wha gbẹ rrọ uwou ovona ọvo whọ rẹ sae rawo ekpala kẹ.

◼ Emu Uvo: Iviena wha emu-uvo lele oma viukpenọ who re no ogege okokohọ na kpohọ otafe nyae gwọlọ emu dẹ evaọ etoke eriosehọ uvo na. Whọ rẹ sae jọ ọgwa okokohọ na re emu uvo ra. Ivie, who ru oria na fihọ tọtọtọ họ, yọ whọ nya siọ ebe ba otọ ọgwa na ha. O tẹ lọhọ, whọ rẹ sai fi orawo-emu osese họ otọ akpala ra. Ma kuvẹ orawo-emu ulogbo, eglase, ilolo, gbe imidhe nọ i re whu evaọ ọgwa nọ ahwo a be keria jọ gaviezọ na ha. Iviena kareghẹhọ inọ idi-egaga nọ a rẹ da taure a te ti kpohọ ewuhrẹ hayo ru oware nọ u kpomahọ iruẹru abọ-ẹzi efa kpobi u fo ho, fikiere ma rẹ whaha uruemu yena.

◼ Unevaze: O rẹ rehọ araha igho buobu re a ru ọruẹrẹfihotọ okokohọ ubrotọ. Ma rẹ sai dhesẹ ovuhumuo mai ẹkwoma azọhọ unevaze nọ ma re ru kẹ iruo akpọ-soso na evaọ obọ Egwa Uvie mai hayo obọ okokohọ na. Echẹke kpobi (obe nọ a rẹ rọ rehọ igho evaọ ebanke) nọ a ro ru unevaze fihọ itehe unevaze nọ e rrọ okokohọ na, a re kere fihọ iẹe nọ, a wha ugho na kẹ “Watch Tower.”

◼ Omonwa gbe Eware-Idudhe: Ẹyao hayo omonwa idudhe o tẹ romavia evaọ ogege okokohọ na, iviena vuẹ omọvo eruẹrẹahwohọ nọ ọ kẹle owhẹ re o fiobọhọ rọ ohwo nọ ọ be mọ na kpohọ Ẹko-Iruo Obufihọ Ọsosuọ na, re ahwo ẹko-iruo obufihọ ọsosuọ nọ e riẹ iruo na ziezi nọ e rrọ ogege na a sae rọ ẹro te ẹbẹbẹ na.

◼ Nọ Whọ tẹ be Rekọdo Ẹme: A re dhe uvumọ oware nọ a rẹ rọ rekọdo eme fihọ itepu hayo ividio fihọ ekwakwa ẹlẹtriki hayo erọ ẹmeọta nọ e rrọ ogege na vievie he, yọ a rẹ rehọ ekwakwa yena ruiruo evaọ oghẹrẹ nọ i gbe kpokpo amọfa ha.

◼ Iwoho Erehọ: Whọ tẹ be rehọ iwoho, whọ rehọ eflashe na ruiruo eva okenọ abọ okokohọ na ọ be nyaharo na ha.

◼ Ipeja gbe Ifonu nọ I Wo Ufi Hi (GSM): A re ru enana fihọ oghẹrẹ nọ i gbe ro kpokpo amọfa ha.

◼ Efọmo ọ Follow-Up: A rẹ rehọ efọmo ọ Please Follow Up (S-43) na rọ kẹ evuẹ kpahe ohwo nọ ma lele tẹme nọ o dhesẹ isiuru kpahe ovuẹ Uvie na evaọ etoke okokohọ na. Jọ iwhowho-uvie a wha efọmo nana ọvo hayo ivẹ lele oma ziọ okokohọ na. Efọmo na e te jariẹ re evaọ Uwou-Ebe okokohọ na. Whọ sae rọ efọmo nana nọ who kere eme fihọ gbagba no kẹ ahwo ẹko iruo Uwou-Ebe na hayo okere-obe ukoko ra nọ wha te te uwou no.

◼ Edrama: O rẹ jọ oware uyoyou re inievo-emetẹ e siọ idhọfọ irereghe hayo nọ e rrọ gegerege ba ẹfare evaọ ohiohiẹ Ẹdoka nọ a ti ru edrama na, keme idhọfọ ilogbo itieye na i re di ude ahwo nọ a rrọ obemu. Onana o mae rrọ ere fiki oghẹrẹ Egwa Okokohọ gbe Egwa Uvie nọ a sae jọ ru ikokohọ re nọ a be bọ enẹna.

◼ Iwou nọ A re Wohọ: Dhesẹ ubi ẹzi na evaọ okenọ a be k’owhẹ uwou nọ who te te ogege okokohọ na no. Who wohọ iwou nọ e rrọ ogege okokohọ na ha otẹrọnọ Ẹko-Iruo Uwou na o gbẹ rehọ ae kẹ owhẹ hẹ. There emu evaọ oria nọ a kẹ uvẹ riẹ ọvo. Evaọ oke nọ u kpemu, a ruẹ ahwo jọ nọ a je there emu nọ ẹme ọ be nyaharo. Onana u dhesẹ ovuhumuo kẹ eware abọ-ẹzi vievie he.—Luk 10:38-42.