‘Ma rẹ Sae Seba Ẹta Ha’
1 Jesu Kristi ọ be rẹrote iruo usiuwoma ota na kiọkiọkiọ. (Mat. 28:20; Mak 13:10) Dede nọ enwenọ ima ezeza erọ etausiuwoma ọwhọ e riẹ nọ i bi se isẹri evaọ ekwotọ 234, ma re roro nnọ isẹri-ise mai i kuhọ no vievie he. Bẹsenọ Ọghẹnẹ ọ rẹ ta nọ iruo na i te no, ‘ma rẹ sae seba ẹta ha’ kpahe eware nọ ma wuhrẹ no.—Iruẹru 4:20.
2 Rẹroso Ẹzi Ọghẹnẹ: Setan ọ be rọ otunyẹ ọgaga ze re o fi oyẹlẹ h’omai oma. (Evia. 12:17) Oma-iwo sebaẹgba mai o be jẹ wha ebẹbẹ buobu s’omai. Eware itieye na e rẹ sae kpọ iroro mai no iruo usiuwoma ota nọ o mai wuzou na. Ghele na, ma te fievahọ Jihova, ẹzi riẹ o ti fiobọhọ k’omai rẹriẹ ovao ku ọzadhe kpobi.
3 Okenọ a je kpokpo ukoko Ileleikristi ikpe-udhusoi ọsosuọ na gaga, inievo na e tẹ lẹ se Ọghẹnẹ kẹ obufihọ re a ta ẹme riẹ haro avọ aruọwha. Jihova o yo olẹ rai, ẹkwoma ẹzi riẹ nọ ọ kẹ rae jẹ kẹ ae ọwhọ gbe ọtamuo nọ a gwọlọ re a gbẹ ta usiuwoma na haro. Fikiere, a tẹ jẹ nyaharo ababọ eriosehọ bi whowho emamọ usi na avọ aruọwha.—Iruẹru 4:29, 31; 5:42.
4 Whọ Dhozọ Eme Ọtaraha Ha: Oghẹrẹ ẹro nọ ahwo a bi ro riwi omai hayo ọtaraha ẹgbede e sae lẹliẹ ozọ mu omai. Rekọ, kareghẹhọ eme aruọwha Pita gbe ikọ edekọ na kẹ ogbẹguae Sanhẹdrin na, nọ a kere fihọ Iruẹru 5:29-31 na. Wọhọ epanọ owuhrẹ Uzi na, Gamaliẹl, o vuhumu na, a rẹ sae g’obọ vi iruo Ọghẹnẹ hẹ. Orọnikọ ogaga mai a bi ro ru ei gba ha. Iruo ilogbo nana i wo uketha Ọghẹnẹ, yọ ọye ọvo o re ru ei gba!—Zek. 4:6.
5 Joma lẹ se Jihova kẹdẹ kẹdẹ rọkẹ ẹzi riẹ re o fiobọhọ k’omai whowho emamọ usi na avọ ọwhọ. Joma ta, wọhọ epanọ Jerimaya ọ ta, inọ ovuẹ Uvie na o wọhọ erae nọ e be to evaọ igbenwa mai. (Jeri. 20:9) Ma rẹ sai fibo ho!