Uzẹme na Kpahe Obaro

Jesu o dhesẹ epanọ ma te rọ “riẹ nọ Uvie Ọghẹnẹ o kẹle no.” (Luk 21:31) Jesu ọ fodẹ eware buobu nọ e te via wọhọ ẹmo, etọ nọ i ti nuhu, ohọo nọ u ti mu, gbe ikpeyao nọ ahwo a te mọ​—yọ eware nana e be ginẹ via nẹnẹ.​—Luk 21:10-17.

Ebaibol na o te je dhesẹ nọ “evaọ edẹ urere na,” ahwo a ti wo iruemu iyoma. Whọ sai se kpahe iruemu nana evaọ obe 2 Timoti 3:1-5. Ababọ avro, whọ tẹ ruẹ eware nọ ahwo a bi ru gbe iruemu nọ a bi dhesẹ, o rrọ vevẹ inọ eruẹaruẹ Ebaibol nana i bi rugba nẹnẹ.

Eme onana u dhesẹ? Onana u dhesẹ nọ kẹle na, Ọghẹnẹ ọ te rọ Uvie riẹ ru inwene ilogbo re ahwo a sae reawere uzuazọ evaọ otọakpọ na. (Luk 21:36) Evaọ Ebaibol na, Ọghẹnẹ ọ ya eyaa emamọ eware buobu nọ o ti ru kẹ ahwo evaọ otọakpọ na. Joma ta kpahe ejọ.

EMAMỌ ESUO

“A tẹ kẹe [Jesu] isuẹsu, ọghọ, gbe uvie, re ahwo, erẹwho, gbe itu evẹrẹ sa-sa na kpobi a gbodibo kẹe. Isuẹsu riẹ yọ isuẹsu ebẹdẹ bẹdẹ nọ i ti wo oba ha, a te raha uvie riẹ hẹ.”​—DANIẸL 7:14.

Oware nọ onana u dhesẹ: Whọ sae reawere uzuazọ evaọ otọ esuo emamọ egọmeti nọ Ọghẹnẹ o ro mu, yọ Jesu Kristi Ọmọ riẹ họ Ovie Uvie na.

OMOKPOKPỌ

“Ohwo ọvo nọ ọ be rria ẹkwotọ na nọ ọ te ta nọ, ‘Mẹ be mọ’ ọ te jariẹ hẹ.”​—AIZAYA 33:24.

Oware nọ onana u dhesẹ: Whọ te gbẹ mọ ofa ha, yọ whọ te rria bẹdẹ bẹdẹ.

UDHEDHẸ EVAỌ AKPỌ NA SOSO

“O bi ru emo serihọ evaọ otọakpọ na soso.”​—OLEZI 46:9.

Oware nọ onana u dhesẹ: Ma te gbẹ dhozọ hayo ruẹ uye fiki ẹmo ho.

AHWO OWOMA ỌVO A TE VỌ OTỌAKPỌ NA SOSO

“Ahwo omuomu na a gbẹ te jọ họ . . . Enọ e be romakpotọ na e te rọ otọakpọ na reuku.”​—OLEZI 37:10, 11.

Oware nọ onana u dhesẹ: Ahwo oyoma a gbẹ te jọ họ, ukpoye ahwo nọ a bi ru oreva Ọghẹnẹ ọvo a te jariẹ.

AKPỌ NA SOSO O TI ZIHE RUỌ APARADASE

“A te bọ iwou, a vẹ te rria eva rai, a te kọ egbọ evaene a vẹ te re ibi rai.”​—AIZAYA 65:21, 22.

Oware nọ onana u dhesẹ: Otọakpọ na soso o ti wo erru gaga. Ọghẹnẹ ọ te kẹ uyo olẹ mai re a jọ “otọakpọ” na ru oreva riẹ.​—Matiu 6:10.