Ẹvẹ Ma Sae rọ Nyate Ẹgwọlọ Rọkẹ Egwa Uvie Efa Na?
1 No anwọ emuhọ ukoko Ileleikristi na ze, ilele Jesu a be hai kokomahọ re Jihova o wuhrẹ ai. Evaọ edẹ ikọ na, ẹsibuobu Ileleikristi na i je ru iwuhrẹ rai evaọ iwou ahwo. Evaọ eria jọ a sae jẹ t’ẹme evaọ uwou-egagọ ahwo Ju. Evaọ Ẹfẹsọs, Pọl ukọ na ọ kẹ evuẹ evaọ oria-ẹkeria ulogbo isukulu jọ evaọ ikpe ivẹ. (Iruẹru 19:8-10; 1 Kọr. 16:19; Filim. 1, 2) Epọvo na o rọ nẹnẹ, evaọ Nigeria gbe eria efa, ikoko jọ i re ru iwuhrẹ evaọ iwou ahwo, evaọ etegu, tubọ evaọ otọ iwou nọ a gha họ dede. Uzẹme, makọ ma wo Ọgwa Uvie hayo ma wo ho, epanọ u wuzou te re ma kokomahọ ẹsikpobi o rẹ thọrọ omai ẹro ho.—Hib. 10:24, 25.
2 Ikoko jọ e bọ Egwa Uvie no, yọ o rọ vevẹ nnọ Ọgwa Uvie nọ ọ rọ kpatiẹ, nọ a be rẹrote ziezi o re s’iroro ahwo nọ i wo isiuru. Evaọ abọ kpobi akpọ na, egwa itieye na i re dhesẹ nnọ Isẹri Jihova a wo ọwhọ kẹ egagọ efuafo. Fiki onana u je fo nọ ma re wo uvi isiuru kpahe ebabọ Egwa Uvie evaọ eria mai. Obọnana, ẹgwọlọ ọ riẹ kẹ idu Egwa Uvie evaọ erẹwho buobu. Fibae, a be rehọ ikoko nọ i bu vi ezeza mu wariẹ akpọ na họ kẹdẹ kẹdẹ. Evaọ Nigeria ẹgwọlọ ọ riẹ kẹ ẹbọ oware wọhọ Egwa Uvie 1,800. Kọ ghinọ eme họ Ọgwa Uvie? Ẹvẹ a rẹ bọe? Bovẹ igho nọ a rẹ rọ bọ Ọgwa Uvie i re no ze? Kọ ẹvẹ ma sae rọ nyate ẹgwọlọ ọnana?
Eme Họ Ọgwa Uvie?
3 A kake rehọ odẹ na “Ọgwa Uvie” ro se uwou jọ nọ a bọ evaọ Hawaii evaọ 1935 onọ ukoko jọ o jẹ jọ ru iwuhrẹ. Odẹ utioye na u kiehọ keme ugogo ẹjiroro Ọgwa Uvie họ re u fiobọhọ kẹ ewhowho emamọ usi orọ Uvie Ọghẹnẹ na. Anwọ 1935, a bọ idu Egwa Uvie buobu no wariẹ akpọ na họ. Uzẹme, uzedhe omaa Ọgwa Uvie na o rẹ rọwo kugbe omaa ebabọ unuakpọ, orẹwho, gbe udogbe nọ a bọ riẹ fihọ. Ghele na, u fo re egwa kpobi i wo eghẹrẹ eware jọ nọ i thoma. E rẹ jọ kpatiẹ, a rẹ bọ ae ziezi, yọ i re kiehọ kẹ omakokohọ avọ udhedhẹ re a gaviezọ kẹ iwuhrẹ Ọghẹnẹ. U du gwọlọ nọ uwou na o rẹ jọ onọ a raha okpigho fihọ họ.—1 Jọn 2:16.
4 Iwoho Egwa Uvie jọ nọ a bọ no evaọ Nigeria anwọ ikpe jọ ze e rọ uko-obeva onana. Dede nọ omaa ebabọ rai i wo ohẹriẹ, aikpobi i siuru yọ a bọ rai ziezi. Fibae, a rẹ bọ Egwa Uvie kpobi lele epanọ ebabọ okegbe na e rọ, e rẹ jọ fuafo, yọ a rẹ rẹrote ai ziezi. Kọ oma u gbe bi mu omai nọ ma tẹ ruẹ eme na “Kingdom Hall of Jehovah’s Witnesses” (Ọgwa Uvie Isẹri Jihova) evaọ iwou itieye na?
5 Ono o wo Ọgwa Uvie na? U te no abọ eware uzi no, omomọvo hayo ahwo ukoko na ọvuọvo o re roro nnọ ae a “wo” Ọgwa Uvie na vievie he, yọ orọnikọ ukoko jọ u “wo” rie he. A rehọ e riẹ mudhe kẹ Jihova. A mu uwou na họ obọ ukoko nọ o bọ hayo haya Ọgwa Uvie na, yọ ugboma ekpako na u wo owha-iruo na re a rehọ areghẹ rọ rẹrote eware nọ a be jọ ọgwa na ru kpobi re o sai w’iruo kẹ isiuru Uvie na ziezi. Otẹrọnọ ikoko ivẹ hayo bu viere e be jọ Ọgwa Uvie ọvo ru iwuhrẹ, a rẹ sae rehọ ekwakwa ikporakporo, ughọjọ, ekwakwa ẹruorote evona, gbe eware efa ro ruiruo kugbe. Onana u re se isẹri kpahe okugbe nọ ọ rọ udevie ikoko na. Ekpako gbe idibo iruiruo a rẹ rẹrote ekwakwa enana nọ a bi ro ruiruo kugbe na, hae kareghẹhọ nnọ onana u re fiba ewoma inievo mai.—Mat. 7:12.
Ẹvẹ A rẹ Bọ Ọgwa Uvie?
6 Nọ orọnọ Egwa Uvie i re wo ohẹriẹ no orẹwho ruọ orẹwho na, oghẹrẹ nọ a rẹ bọ ae i re wo ohẹriẹ re. A rehọ iwou enana mudhe kẹ Jihova, fikiere o rẹ were idibo Ọghẹnẹ re a rọ unevaze w’obọ evaọ ebabọ rai. “Ahwo ra a [rẹ] te kẹ owhẹ okẹ nọ u no eva rai ze,” ere ọso-ilezi na ọ ta.—Ol. 110:3.
7 A riẹ Isẹri Jihova ziezi fiki ọwhọ gbe unevaze rai nọ a re ro ruiruo kugbe. Obe jọ o t’ẹme kpahe Isẹri Jihova, ta nọ: “O te jọ bẹbẹ re a ruẹ ahwo ẹko ọfa jọ nọ i re ruiruo gaga kpahe egagọ rai wọhọ epanọ Isẹri na a re ru.” Iyẹrẹ jọ nọ obe-usi jọ o nẹ o wariẹ eme nana nọ Osẹri Jihova jọ nọ ọ jẹ rẹrote ebabọ Ọgwa Okokohọ jọ ọ ta: “Ẹsejọ . . . ma re wo bu vi ahwo nọ ma gwọlọ.” Evaọ edẹ jọ nọ i lele i rie, obe-usi ovona o tẹ ta kpahe ethabọ-ukọ-Ọghẹnẹ jọ nọ o bruenu inọ o re bẹbẹ re ohwo jọ ọ romavia kẹ iruo ebabọ jọ nọ “ichọche Protẹstant buobu” a be bọ.
8 Iwhowho-uvie buobu a siobọno oke, igho, gbe ẹgba rai no re a fiobọhọ kẹ ebabọ eria egagọ nọ i fo. Ẹhẹ, obufihọ unevaze orọ ezae gbe eyae omarọkẹ o whaha ahwo nọ a hae haya no, tubọ obufihọ enọ e riẹ ona dede, evaọ okenọ a tẹ be bọ Egwa Uvie hayo Egwa Okokohọ. Ahwo unevaze na a re rri iruo itieye na wọhọ azọhọ kẹ ẹnyaharo isiuru Uvie na, wọhọ epanọ a re rri usiuwoma ota rai na. A wo ovuhumuo kẹ eghale abọ-ẹzi buobu nọ ae omarai gbe amọfa a ti wo no eroruiruo egwa itieye na ze. Fikiere a re fi ehri-uzi na h’iruo: “Wha wo okẹ [ọvọvẹ] no, wha kẹ ọvọvẹ.”—Mat. 10:8.
9 A te zizie owhẹ re who w’obọ evaọ ebabọ oria egagọ kẹ Jihova fikinọ who wo itee abọ-ẹzi je wo ona, dao ẹgba ra kpobi re wo dede uzizie nana rehọ. (Ol. 122:1) Ma ta kẹ ugboma ekpako re a tuduhọ ahwo unevaze awọ. Ekpako na a rẹ sai dhesẹ uketha ovọvọ rai kẹ ọruẹrẹfihotọ Ọghẹnẹ ọnana ẹkwoma ẹnyabru ahwo nọ a te evaọ ukoko na jẹ tuduhọ ae awọ re a rọ ona nọ a wo ruiruo kẹ inievo rai.—Gal. 6:10.
10 Taure a tẹ bọ uwou ovo re avọ obokparọ, o rẹ gwọlọ iruo egaga evaọ oke krẹkri; rekọ Jihova ọ rẹ ghale enọ e be rọ ẹwẹ-kpobi gọe. (Kọl. 3:23, 24) Ọthobọ gheghe o rẹ rọ gba ukoko jọ họ re a hwaosa ọ obufihọ iruiruo obọ otafe. Evaọ iyero itieye na, iruiruo na gbe ukoko na a re ru agrimeti nọ a kere fihotọ.—Rri Uwou-Eroro Na, ọrọ November 15, 1986 (ọrọ Oyibo), ẹwẹ-obe avọ 16.
Bovẹ Igho na I re No Ze?
11 Wo ohẹriẹ no ichọche Kristẹndọm, Isẹri Jihova a re ghoro umudo ho, a rẹ yare igho hayo hwa abọvo-abakpe he. Fikiere, rọ kpahe azọhọ mai, ma rẹ kẹe no udu mai ze. Pọl ukọ na ọ ta nọ: “Ohwo o re ru wọhọ epanọ o roro evaọ eva riẹ, . . . keme Ọghẹnẹ o re you ohwo nọ ọ rẹ kẹ okẹ-evawere.”—2 Kọr. 9:7.
12 A bọ Egwa Uvie idu buobu no wariẹ akpọ na họ ẹkwoma azọhọ unevaze enana, fiki ibuobu nọ idu rai e wọ rai k’okẹ avọ evawere. Onana o rọ uzẹme kpahe Egwa Uvie nọ iwoho rai e rọ uko-obeva onana, jegbe efa nọ ebabọ rai e r’otọ enẹna evaọ Nigeria. Wọhọ ayeuku oyegbere na, ibuobu e rọ udevie ahwo Jihova nẹnẹ nọ e be kẹ azọhọ “ipini” rai. (Mak 12:42) Epọvo na re, amọfa e riẹ nẹnẹ nọ a bi dhesẹ ẹzi nọ ọ wọhọ ọrọ Banabas. Nọ ọ zẹ otọ jọ nọ o wo no, Banabas ọ tẹ “rehọ igho na ti fihọ awọ ikọ na.” (Iruẹru 4:37) Evaọ uzẹme, ma re ru azọhọ mai ababọ oma-udhesẹ. (Mat. 6:3, 4) O rọ oware oghọghọ nọ ma rọ ruẹ nọ a rọ etọ nọ a rẹ bọ uwou fihọ hayo ekwakwa nọ a rẹ zẹ re a rọ igho rai ruiruo ebabọ uwou na ro ru ikoko buobu ọghọ no. Amọfa jọ a rehọ ekwakwa ebabọ ze hayo a rọ emu nọ iruiruo ebabọ na a rẹ ria ze.
13 Ikoko jọ a jọ Ẹkpa-Ugho Ọgwa Uvie Society momo igho no. Igho nọ Society o bi jo momo kẹ ikoko na yọ azọhọ unevaze nọ okugbe-inievo akpọ-soso na a ru. Ugboma Esuo na o kuvẹ re a momo igho enana kẹ ikoko evaọ oghẹrẹ nọ o rẹ rọ kẹ inievo na uvẹ re a hwa zihe wọhọ epanọ ẹgba rai o te. Ibuobu e kẹ uyere no fiki ọruẹrẹfihotọ oyoyou ọnana nọ ọ kuvẹ kẹ ẹghale “ẹrẹrẹe” igho evaọ udevie enọ i wo “bu” gbe enọ o “kare” na. (2 Kọr. 8:14, 15) Re a rẹrote owha-iruo ogbẹgbẹdẹ nana, ikoko nọ i momo igho a rẹ daoma gaga re a hwae zihe. (Gal. 6:5) O tẹ via nnọ ukoko jọ u wo ẹbẹbẹ ubroke evaọ ẹhwa zihe igho nọ a momo mi Society, u re woma re ekpako na a tuduhọ ukoko na awọ re a koko eyaa rai.
14 Rọ kpahe ebabọ Ọgwa Uvie ọkpokpọ, ma hrẹ ikoko re a se ẹgwọlọ nọ o fo ho ba “ẹkpare ze.” Wọhọ oriruo, ikoko ivẹ hayo esa nọ e rọ oria ovo a rẹ sae jọ Ọgwa Uvie ọvo ru iwuhrẹ. Fikiere, evaọ eria nọ ikoko sa-sa e rọ, aikpobi a sai ku omodawọ rai gbe re a bọ ọgwa ọvo viukpenọ ukoko ovuovo u re wo ọgwa obọriẹ. Fikiere, a vẹ sae rehọ ọgwa na ruiruo ziezi, ere o ruo araha igho riẹ o vẹ jẹ lọhọ ẹhwa.
15 Otẹrọnọ ukoko jọ o jiroro nọ a gwọlọ bọ Ọgwa Uvie, inievo na a rẹ jọ oke oyena muọ azọhọ họ eruo kpahe iẹe. Fiki ẹjiroro ọyena, ikoko jọ i rovie akanto fihọ ebanke no nọ a re fi igho ebabọ obaro rai họ. Eva okenọ ukoko na u te mu iroro họ ẹjẹ kpahe ewo Ọgwa Uvie, whọ rẹ sai ru azọhọ jọ kpahe ebabọ na k’omobọ ra. Fibae, avọ oghale Jihova whọ rẹ sai ru ọtamuo kpahe unuigho nọ whọ rẹ sae zọhọ k’amara k’amara. Ekpako na e rẹ sae nọ ukoko na kpahe abọ nana re u fiobọhọ kẹ ae evaọ omaa-oma kẹ ebabọ na. Ẹwẹ-obe nọ a kere unuigho na fihọ ababọ odẹ oye ọvo a gwọlọ re a riẹ unuigho nana. Rono unuigho nana ze, ekpako na e rẹ sai ru ọtamuo kẹ ukoko na kpahe ẹhwa zihe igho nọ a momo na, abọ nọ ukoko na u wo evaọ ebabọ hayo ẹruorote Ọgwa Okokohọ, hayo ẹhwa igho nọ a be raha fihọ Ọgwa Uvie. U wuzou gaga re a roro kpahe araha enana wọhọ epanọ ẹgba ukoko na o te. Pọl ọ jiroro nọ inievo nọ e jọ Kọrint a fi edhere jọ họ nọ a re ro ru azọhọ ẹsikpobi re a sae ruẹ nnọ a bi ru emamọ ẹjiroro idu rai gba. (1 Kọr. 16:2) Evaọ abọ ọnana ma gwọlọ owojẹ, oma-oyọrọ, gbe ọtamuo.—1 Kọr. 9:23, 25, 27.
Ẹnyate Ẹgwọlọ Na
16 Re a sae nyate ẹgwọlọ rọkẹ Egwa Uvie efa evaọ Nigeria gbe erẹwho efa buobu, Ugboma Esuo na u muọ ọruẹrẹfihotọ obọdẹ jọ họ no. Ute na họ re a nyate ẹgwọlọ ọnana evaọ umutho ikpe jọ. Evaọ uwou ogha Nigeria, a rehọ Ẹko-Iruo Ebabọ Ọgwa Uvie mu no onọ a jo wo inievo nọ i re ru ọruẹrẹfihọ kẹ jẹ kobaro evaọ ebabọ Ọgwa Uvie jẹ rẹrote ọruẹrẹfihotọ na. Ẹkwoma ẹko-iruo ọnana, a ru omaa-ebabọ oriruo gbe obe nọ a kere ekwakwa ebabọ fihọ no, je ru ọruẹrẹfihotọ ewuhrẹ ọrọ ahwo kpobi nọ a bi w’obọ evaọ ebabọ Ọgwa Uvie. Inievo nọ e rọ ẹko-iruo ọnana a rẹ rẹrote iruẹru inievo udhusoi buobu nọ e fialoma via kẹ ebabọ Ọgwa Uvie. A rẹ kiẹ omaa ebabọ kpobi riwi taure a te ti ru ebe ebabọ na jẹ rọwo fihọ ebabọ na.
17 Egbẹgwae Ebabọ Ubrotọ a re wo evuẹ gbe ohrẹ mi ẹko-iruo ọnana, enọ i re fiobọhọ kẹ ae re a fiobọhọ kẹ ikoko wo otọ, omaa ebabọ, gbe uvẹ-uzi rọkẹ ebabọ Egwa Uvie. Ahwo Egbẹgwae Ebabọ Ubrotọ na a re je fiobọhọ kẹ ikoko re a te kẹ obufihọ igho no obọ Society ze. Ma hrẹ ikoko nọ e be gwọlọ otọ nọ a rẹ bọ fihọ hayo enọ e gwọlọ bọ Ọgwa Uvie re a ta kẹ Ogbẹgwae Ebabọ Ubrotọ nọ a ghale rai fihọ. A rẹ sae rọ ere whaha ebẹbẹ buobu ẹkwoma ewuhrẹ no eware nọ e via vrẹ no gbe evuẹ ekpokpọ Society ze. Egbẹgwae Ebabọ Ubrotọ na a rẹ ta kẹ Ẹko-Iruo Ebabọ Ọgwa Uvie na, enọ e rẹ jiroro omaa nọ u re fiobọhọ kẹ ikoko bọ Egwa Uvie evaọ omoke kpẹkpẹe ẹkwoma obufihọ inievo nọ i wo ona. Nọ orọnọ ẹgwọlọ na ọ rọ ruaro na, o te rehọ ikpe jọ taure ikoko kpobi evaọ Nigeria i te ti wo Egwa Uvie nọ e rọ kpatiẹ. Fiki ẹjiroro ọnana, ma re wo odiri. Rekọ, nọ ikoko e be hẹrẹ re a rẹriẹ aro ku ebabọ rai na, inievo na e rẹ sae tha ebabọ na uke ẹkwoma azọhọ nọ a re ru.
18 Fiba ukeotha, ewuhrẹ, gbe ọkpọvio nọ Egbẹgwae Ebabọ Ubrotọ i re wo no obọ Ẹko-Iruo Ebabọ Ọgwa Uvie na ze, a be rehọ Ẹko-Iruiruo Ebabọ Ọgwa Uvie ro mu re a ruiruo evaọ otọ ọkpọvio ẹko-iruo ọkpokpọ ọnana. Re a sai ru ẹko-iruiruo enana via, Society o rovie abọ ọkpokpọ ọrọ iruo obọdẹ odibọgba oke-kpobi no. A re se iruiruo na idibo ebabọ Ọgwa Uvie. Wọhọ epanọ idibo iruo obọdẹ oke-kpobi edekọ, wọhọ ekobaro obọdẹ gbe ahwo Ebẹtẹle a ru no, idibo enana a bi dhesẹ ẹzi wọhọ ọrọ Aizaya, be ta nọ: “Mẹ na! Vi omẹ.” (Aiz. 6:8) Fiki nọ a riẹ kpahe ona ebabọ Society, inievo enana a rọ obufihọ ulogbo kẹ ikoko evaọ ebabọ gbe ẹbọ reno Egwa Uvie. Makọ Ogbẹgwae Ebabọ Ubrotọ hayo Ẹko-Iruiruo Ebabọ Ọgwa Uvie a bi fiobọhọ kẹ ukoko nọ o gwọlọ Ọgwa Uvie ọkpokpọ, uzedhe iruo ebabọ na yọ iruo ukoko nọ o be bọ ọgwa na. Obufihọ ofa kpobi nọ a kẹ ẹkwoma Society a re rri rie wọhọ obufihọ ofiba. Onana u dhesẹ nọ okenọ ukoko o tẹ be bọ Ọgwa Uvie, ahwo kpobi evaọ ukoko na, te enọ i wo ona ebabọ gbe enọ i wo ho, a rẹ thae uke ẹkwoma ẹnya lele omaa oke nọ Ẹko-Iruo Ebabọ Ọgwa Uvie na ọ ruẹrẹfihọ na.
19 Obọnana ẹgwọlọ ọ riẹ rọkẹ ahwo unevaze efa re a fiobọhọ evaọ ebabọ Egwa Uvie. A vi efọmo buobu nọ a rẹ rọ jọ ahwo unevaze ebabọ Ọgwa Uvie ro se igboma ekpako kpobi no. Ahwo unevaze ebabọ Ọgwa Uvie a wo ohẹriẹ no idibo ebabọ Ọgwa Uvie fikinọ a re se ai re a ti ruiruo kugbe Ẹko-Iruiruo Ebabọ Ọgwa Uvie evaọ etoke eka ivẹ rite emerae esa. A rẹ kẹ ahwo unevaze itieye na oria nọ a re wohọ gbe emu nọ a rẹ ria evaọ etoke iruo ebabọ nọ a bi jo fiobọhọ na, a rẹ sae kẹ ae ugho ofa rai. Usu ahwo unevaze ebabọ Ọgwa Uvie enana Society ọ be jọ rehọ idibo ebabọ Ọgwa Uvie ro mu. Otẹrọnọ who wo isiuru kpahe uvẹ-ọghọ iruo nana, whọ sae nyabru ọsẹro ukoko ra, ọnọ ọ te ta kẹ owhẹ sọ who te re whọ rehọ efọmo na. Ma be mae gwọlọ inievo-emezae nọ i te evaọ abọ-ẹzi enọ i wo utho eriariẹ jọ kpahe ebabọ. Maero inievo-emezae enana e rẹ jọ ahwo abọ-ẹzi, avọ omarokpotọ, je wo unevaze re a ruiruo kugbe ahwo nọ a ro mu re a kobaro na. A gbẹ maki se owhẹ obọnana ha, a ti fi efọmo ra họ efaele bẹsenọ ẹgwọlọ ọ rẹ romavia.
20 Fiba omodawọ enana nọ Society o bi ru na, ma gwọlọ emamọ ọrọwokugbe mi ekpako ukoko gbe ikoko na. Ẹsejọhọ omaa-ebabọ oriruo nọ Ẹko-Iruo Ebabọ Ọgwa Uvie Society na o kẹ o were omai hi. Ohrẹ gbe ọkpọvio nọ ahwo ẹro Ẹko-Iruo Ebabọ Ọgwa Uvie na a kẹ, nọ a bi fi ọkpọvio nọ Society ọ kẹ h’iruo na, o sai kpomahọ oware nọ ma m’omaa riẹ evaọ obonẹ hayo gwọlọ vẹre. Ẹsejọhọ oghẹrẹ nọ Ẹko-Iruiruo Ebabọ Ọgwa Uvie na a bi ro ru ebabọ rai u wo ohẹriẹ no onọ ma riẹ kpahe. Rekọ, nọ orọnọ ute mai họ, orọnikọ re ma bọ okpuwou jọ kẹ ohwo hayo ukoko jọ họ na, rekọ re ma nyate ẹgwọlọ rọkẹ eria ewuhrẹ na, eva e rẹ were omai re ma ruiruo-kugbe enọ a ro mu re a kobaro evaọ abọ ọnana. (1 Tẹs. 5:12, 13; Hib. 13:17) Ẹhẹ, re ma sae nyate ẹgwọlọ obọnana rọkẹ Egwa Uvie evaọ umutho oke, ma rẹ daoma hrọ, te evaọ oma mai ofialọvia, obusino oke hayo ekwakwa mai, hayo ẹkwoma ẹnya lele ọkpọvio.—Fil. 2:2-4.
Iwou nọ E rẹ Kẹ Jihova Orro
21 Ọgwa Uvie nọ ọ rọ kpatiẹ, nọ a riẹ bọ, jẹ be rẹrote ziezi ọ rẹ kẹ Jihova orro. A se omai omomọvo jegbe ukoko re ma kiẹ ekwakwa mai riwi jẹ ruẹ epanọ ma rẹ sai ro fiobọhọ evaọ ebabọ Egwa Uvie. Ẹkwoma ẹta kẹ Ẹko-Iruo Ebabọ Ọgwa Uvie na ẹkwoma Ogbẹgwae Ebabọ Ubrotọ nọ a ghale owhai fihọ taure wha te ti mu ebabọ họ (makọ ebabọ ekpokpọ, ẹbọ reno ọgwa nọ a muhọ no vẹre, hayo enwene ona hayo enwene omaa Ọgwa Uvie nọ a bọ reno vẹre), wha ti wo erere no evuẹ gbe eriariẹ nọ a wo no ze. Ẹgwọlọ rọkẹ Egwa Uvie efa evaọ Nigeria ọ rọ ruaro yọ ma re fi ei ba elẹ mai ẹsikpobi. Ẹnyate ẹgwọlọ ọnana ọ te jọ iruo ebabọ nọ e mae rro kpobi nọ ma ru no evaọ orẹwho onana. Re ma nyate ute mai, mai kpobi ma rẹ rọwokugbe ekpọvio nọ a kẹ ẹkwoma Ẹko-Iruo Ebabọ Ọgwa Uvie Society na vọvọ jẹ rọ unevaze jẹ ekpọvio na rehọ. Nọ ma be nya lele ọruẹrẹfihotọ Society rọkẹ ebabọ Egwa Uvie na, ma riẹ inọ o te rehọ oke jọ taure ikoko kpobi a tẹ sai wo Ọgwa Uvie obọrai. Ẹvẹ oghọghọ nọ ma te ruẹ o te rro te evaọ okenọ ikoko kpobi a te sai kuomagbe ẹsikpobi evaọ Egwa Uvie nọ e rọ kpatiẹ rọkẹ ewuhrẹ Jihova, nọ ma riẹ nnọ mai kpobi ma w’obọ evaọ erugba onana!—Ol. 122:1; Mae. 4:2.
[Picture on page 3]
Ọgwa Uvie oriruo nọ o wo oria ẹkeria 185 nọ a bọ fihọ Warri
[Picture on page 4]
Ọgwa Uvie oriruo nọ o wo oria ẹkeria 100 nọ a bọ fihọ Agbor
[Picture on page 5]
Ọgwa Uvie oriruo nọ o wo oria ẹkeria 150 nọ a bọ fihọ Owode-Yewa