Ẹkpẹti Onọ

◼ Evaọ ẹdhọ nọ a jọ si ohwo no ukoko ho, fikinọ o dhesẹ uvi ekurẹriẹ, kọ u kiehọ re a dae obọ ji evaọ iruo usiuwoma ota na evaọ otọ iyero jọ?

Evaọ okenọ a tẹ whọku ohwo evaọ ẹdhoguo, a re fi awhaha jọ họ kẹe. Enana e sae jọ uyo nọ ọ rẹ kpahefihọ evaọ iwuhrẹ hẹ, ẹme hayo odhesẹvia nọ o re ru evaọ iwuhrẹ hẹ, hayo olẹ nọ a re sei re ọ lẹ kẹ ukoko na ha. Nọ orọnọ oruthọ riẹ yọ odhesẹvia ewhrehe abọ-ẹzi na, awhaha jọ nọ a re fihọ kẹe yọ ẹwo nọ o re ru owha-iruo riẹ vori. Oyena o vẹ kẹe uvẹ rọkẹ eware abọ-ẹzi wọhọ uwuhrẹ omobọ riẹ gbe eroro.

A re du d’obọ riẹ ji hi evaọ iruo usiuwoma ota gbe iyẹrẹ enẹ riẹ. (Rom 10:9, 10) Iruo usiuwoma ota na i re fiobọhọ sẹro ẹrọwọ mai. Fikiere, Oleleikristi kpobi o re w’obọ evaọ usiuwoma ota ẹsikpobi, rọ ẹkwoma iruo dhesẹ ẹrọwọ nọ ọ rọ udu riẹ via.

Kọ ẹvẹ otẹrọnọ oruthọ riẹ yọ onọ ahwo a riẹ kpahe gaga? O sae jọ oware areghẹ rọkẹ e, eva omoke jọ, re o w’obọ evaọ iruo usiuwoma ota na evaọ abọ ẹkwotọ na nọ a jọ riẹ kpahe ẹbẹbẹ na tere he. U re woma re a woi họ iroro inọ iruo usiuwoma ota na yọ uzedhe abọjọ egagọ mai rọkẹ Ọghẹnẹ, yọ ahwo Jihova kpobi a rẹ jariẹ w’obọ.—Mat. 24:14; 28:18-20.

Kọ ẹvẹ kpahe ohwo nọ a sino ukoko nọ a rehọ zihe ze? Kọ a rẹ kẹe uvẹ re o w’obọ evaọ usiuwoma ota na nọ a tẹ nwane rehọ iẹe no? E, rọwo kugbe iroro obehru na, a rẹ kẹe uvẹ re o w’obọ evaọ usiuwoma ota na nọ a tẹ rehọ iẹe no. Rọ kpahe uvẹ-ọghọ efa evaọ abọ ọnana, a re zihe enana ze kẹe ẹmẹrera nọ ogbẹgwae ẹdhoguo na u bi muẹrohọ ẹnyaharo abọ-ẹzi ohwo na.