Ẹvẹ Omakugbe Ileleikristi U Wuzou Te?
1 “Uziobọ ovo o sai mu uthu no uzou ze he.” Eme eyena e nwane wariẹ eme nọ Ebaibol na ọ ta kpahe ugogo ẹgwọlọ ohwo-akpọ jọ—omakugbe. (Itẹ 18:1) Omakugbe Ileleikristi mai u re ru ẹgwọlọ nana gba. Evaọ idhere vẹ nọ e rẹ kẹ erere?
2 Evaọ Odibọgba Na: Erere jọ nọ ọ mae rro họ oghẹrẹ nọ inievo mai a rẹ bọ omai ga jẹ thọ omai uke evaọ odibọgba ẹgbede na. Jesu o vi ilele riẹ “imimava” nyae ta usiuwoma na. (Mak 6:7; Luk 10:1) Rọwo kugbe oriruo nana, evaọ okenọ ma te bi lele amọfa ruiruo evaọ usiuwoma ota na, ma rẹ ruẹ uzẹme Ọtausiwoma Na 4:9, 10. Nọ ma be wha odibọgba mai haro kugbe na, ẹrọwọ, ẹmeoyo, gbe uyoyou egbẹnya mai e rẹ k’omai aruọwha je ru ọwhọ mai kpokpọ.
3 Rọkẹ Obufihọ Omobọ Ohwo: Okugbe-inievo mai na ọ tẹ jẹ rrọ ehri uduotahawọ gbe ọkpọvio evaọ eyerikugbe otunyẹ gbe ẹwhaha edawọ. Egbẹnyusu Ileleikristi mai a sae kpọ iroro mai kpohọ ikereakere nọ i duobọte ọdawẹ mai. A sae tubẹ lẹ fiki mai, wọhọ epanọ ma re ru kẹ ae re. (2 Kọr. 1:11) Yọ ababọ avro, emamọ oriruo rai ọ rẹ wọ omai evaọ emamọ iruo jẹ bọ omai ga.
4 Eva Iwuhrẹ: Ma rẹ reawere oghale omakugbe Ileleikristi nọ ma te bi kpohọ iwuhrẹ ukoko ẹsikpobi. (Hib. 10:24, 25) Ọruẹrẹfihotọ iwuhrẹ na ọ rẹ vọ avọ uthubro abọ-ẹzi, yọ iwuhrẹ nọ ma rẹ jọ u re ru omai si kẹle ibe ẹrọwọ mai. Omakugbe enana e rẹ k’omai uvẹ nọ ma rẹ rọ gaviezọ kẹ inievo mai nọ a be ta ẹrọwọ rai via, makọ no obọ eplatfọmo ze hayo evaọ udevie ogbotu na. (Rom 1:12) Uyoyou omakugbe mai o rẹ ga viere nọ ma tẹ be t’ẹme kugbe taure iwuhrẹ i te ti muhọ gbe okenọ e tẹ fa no. Etoke itieye na e rẹ k’omai uvẹ nọ ma re ro gbiku eware nọ e rẹ bọ ẹrọwọ ga nọ ma rọ ẹro ruẹ. U re kpomahọ uruemu mai wowoma evaọ okenọ ma te ku usu kugbe ahwo nọ a you Jihova, Ẹme riẹ, iruo riẹ, gbe ahwo riẹ ziezi.—Fil. 2:1, 2.
5 Ma gwọlọ egbẹnyusu Ileleikristi mai na. Ababọ rai, ẹnya evaọ edhere ọhwahwa nọ o re su kpohọ uzuazọ na o rẹ bẹ viere. Rekọ, avọ ẹrọwọ gbe uduotahawọ rai, ma rẹ sae ruabọhọ ẹnya kpohọ akpọ ọkpokpọ ẹrẹreokie Jihova.—Mat. 7:14.