Wha Rrọ ‘Afe Ughe’!
1 Pọl ukọ na o kere nọ: ‘Ma zihe ruọ afe ughe kẹ akpọ na no, jẹ rọkẹ ikọ-odhiwu gbe ahwo.’ (1 Kọr. 4:9) Eme onana u dhesẹ, kọ ẹvẹ u re kpomahọ omai evaọ odibọgba mai nẹnẹ?
2 Rọkẹ ahwo Kọrint, o wọhọ nọ eme na ‘afe ughe’ o kareghẹhọ ae abọ ekuhọ ọrọ ohọre ẹgbede ahwo Rom, onọ a rẹ jọ rehọ ahwo nọ a brukpe no rọ nya aro iriughe idu buobu vrẹ taure a te ti whu uwhu olahiẹ. Epọvo na re, ogbotu ologbo—te ahwo gbe enjẹle—a muẹrohọ uye nọ Ileleikristi ikpe-udhusoi ọsosuọ na a ruẹ fiki isẹri-ise kẹ Uvie na. (Hib. 10:32, 33) Uruemu ẹyọrọ ẹgbakiete rai u duobọte iriughe buobu, wọhọ epanọ akothiho mai o bi ru evaọ afe-ughe edẹ ọgbọna na. Amono ma rrọ afe-ughe kẹ?
3 Rọkẹ Akpọ na gbe Ahwo: Ẹsejọ ekwakwa awhusi e rẹ n’iyẹrẹ kpahe iruẹru ahwo Jihova. Nọ ma re wo ovuhumuo kẹ iyẹrẹ ezi nọ e rọ uzẹme avọ oruọzewọ kpahe iruo mai na, ma re je rẹro iyẹrẹ iyoma nọ otu ọwọsuọ a rẹ vaha n’oke ruoke. Ghele na, ma rẹ ruabọhọ oma mai udhesẹ via wọhọ egbodibo Ọghẹnẹ “eva ẹdhọemu oyoma oguo gbe ẹdhọemu ezi oguo.” (2 Kọr. 6:4, 8) Rọkẹ iriughe nọ i wo udu-oruọzewọ o rẹ jọ vevẹ nnọ mai họ ilele uzẹme Jesu Kristi na.
4 Rọkẹ Enjẹle: Emama ẹzi i bi muẹrohọ omai re. Ẹdhọ gbe idhivẹri riẹ a bi rri—rekọ avọ “ofu ọgaga,” be gwọlọ da ‘iruo isẹri-ise kẹ Jesu na’ ji. (Evia. 12:9, 12, 17) Enjẹle ẹrọwọ Ọghẹnẹ a re rri jẹ ghọghọ evaọ okenọ makọ ọrahauzi ọvo o te kurẹriẹ. (Luk 15:10) O rẹ bọ omai ga re ma riẹ nọ enjẹle i bi rri odibọgba mai na wọhọ iruo ekpakpata, erọ erere nọ a bi ru evaọ otọakpọ nẹnẹ!—Evia. 14:6, 7.
5 Who te zere ọwọsuọ hayo roro nọ odibọgba ra ọ be wha erere ze he, kareghẹhọ nọ whọ rọ oria nọ ehrugbakpọ o bi jo muẹrohọ owhẹ. Akothiho ẹrọwọ ra o bi dhesẹ eware buobu kpahe ẹgbakiete ra. Ukuhọ riẹ, “uvi ohọre orọwọ” ra u ti fiobọhọ k’owhẹ ‘yọrọ uzuazọ ebẹdẹ bẹdẹ whawha.’—1 Tim. 6:12.