Enọ Ahwo nọ A Se Ebe
Amono họ “ikọ-odhiwu nọ a salọ” nọ a ta ẹme te evaọ 1 Timoti 5:21 na?
Pọl ukọ na o kere ileta jọ se Timoti nọ ọ jọ ọkpako ukoko re. Ọ vuẹ riẹ nọ: “Mẹ be jọ aro Ọghẹnẹ gbe Kristi Jesu gbe ikọ-odhiwu nọ a salọ na ta kẹ owhẹ nọ who ru lele ehrẹ nana ababọ omagbẹre hayo ọriẹwẹ.”—1 Tim. 5:21.
Orọnikọ ahwo idu udhuhrẹ-gbene (144,000) nọ i ti kpobọ odhiwu na họ ikọ-odhiwu nọ a be jọ etẹe ta ẹme te na ha. Okenọ Pọl o ro kere ileta na se Timoti, yọ a ri mu Ileleikristi nọ a rọ ẹzi wholo na họ ẹkpare kpobọ odhiwu hu. Nọ o rrọ ere na, koyehọ ikọ na gbe Ileleikristi efa nọ a rọ ẹzi wholo na a ri ti zihe ruọ ikọ-odhiwu no ho evaọ oke yena. Fikiere ma sae ta nọ orọnikọ ae họ “ikọ-odhiwu nọ a salọ” na ha.—1 Kọr. 15:50-54; 1 Tẹs. 4:13-17; 1 Jọn 3:2.
Yọ orọnọ “ikọ-odhiwu nọ a salọ” na họ ikọ-odhiwu nọ i no obọ odhiwu ze ti ru umuomu hu evaọ oke Noa. Orọnọ abọ Jesu ikọ-odhiwu yena a rrọ họ rekọ abọ Setan, a tẹ rọ ere zihe ruọ idhivẹri. (Emu. 6:2; Luk 8:30, 31; 2 Pita 2:4) Yọ kẹle na, a ti fi te Ẹdhọ avọ ikọ imuomu riẹ họ ọgọdọ odidi, a vẹ te jọ etẹe ikpe odu (1,000). Yọ a te si ai no etẹe ze no, a ve ti kpe aikpobi no.—Jud 6; Evia. 20:1-3, 10.
O wọhọ nọ “ikọ-odhiwu nọ a salọ” nọ Pọl ọ ta ẹme te na yọ ikọ-odhiwu nọ e rrọ obọ odhiwu nọ i bi yoẹme kẹ “Ọghẹnẹ gbe Kristi Jesu.” Yọ a ta ẹme te Ọghẹnẹ avọ Jesu evaọ oria Ebaibol ọvo yena.
Ikọ-odhiwu nọ i bi yoẹme kẹ Ọghẹnẹ evaọ obọ odhiwu a rrọ buobu gbidi gbidi. (Hib. 12:22, 23) Ma du roro nọ ikọ-odhiwu nọ e rrọ obọ odhiwu na kpobi, iruo evona a bi ru evaọ oke ọvona ha. (Evia. 14:17, 18) Kareghẹhọ nọ ukọ-odhiwu ọvuọvo ọye Jihova o vi nyai kpe egbaẹmo ahwo Asiria nọ i bu te idu udhuzii-gbisoi (185,000). (2 Iv. 19:35) Ẹsejọhọ ikọ-odhiwu buobu a ti vi nyai “koko eware kpobi nọ e be wha ezoruẹ ze gbe ahwo nọ a bi koko uzi hi họ, a ve si ai no Uvie [Jesu].” (Mat. 13:39-41) Yọ ẹsejọhọ efa a ti “koko eriẹ nọ a salọ na” kpobọ odhiwu. (Mat. 24:31) O sae jẹ jọ nọ, efa e riẹ nọ a ta kẹ inọ ‘a thọ omai evaọ idhere mai kpobi.’—Ol. 91:11; Mat. 18:10; je rri Matiu 4:11; Luk 22:43.
O wọhọ nọ “ikọ-odhiwu nọ a salọ,” nọ a ta ẹme te evaọ 1 Timoti 5:21 na yọ ikọ-odhiwu nọ a kẹ obọdẹ iruo inọ a rẹrote idibo Ọghẹnẹ. Pọl ọ be jọ etenẹ ta kẹ inievo ukoko na inọ a rọ adhẹẹ kẹ ekpako na. Yọ Pọl ọ ta kẹ ekpako na re inọ a ru iruo rai “ababọ omagbẹre hayo ọriẹwẹ.” Ọ ta kẹ ae re inọ a du rọ okpakpa jiroro hayo bruoziẹ hẹ, rekọ a re rorote ziezi. U gine wuzou gaga re ekpako na a lele ohrẹ nọ Pọl ọ kẹ rai na. Keme evaọ “aro Ọghẹnẹ gbe Kristi Jesu gbe ikọ-odhiwu nọ a salọ na” a bi jo ru iruo rai. Eware kpobi nọ ma ta ẹme te na i dhesẹ nọ a kẹ ikọ-odhiwu jọ iruo nọ a re ru nọ ukoko na o rẹ rọ nyaharo. Iruo jọ họ, re a thọ idibo Ọghẹnẹ, je fiobọhọ kẹ ae evaọ iruo usi uwoma ota na. A vẹ jẹ vuẹ Jihova oware nọ a muẹrohọ.—Mat. 18:10; Evia. 14:6.