Ahwo nọ A be Mae Wereva Evaọ Akpọ Na
1 “Oghọghọ u te ahwo nọ [Jihova] ọ rọ Ọghẹnẹ rai!” (Ol. 144:15) Eme eyena i dhesẹ Isẹri Jihova wọhọ ahwo nọ e be mai wereva evaọ akpọ na. Oghọghọ ofa o riẹ hẹ vi orọ ẹgọ Ọghẹnẹ uzẹme ọvuọvo nọ ọ rrọ uzuazọ na, Jihova. Nọ ọ rrọ “Ọghẹnẹ nọ o wo [evawere]” na, a rẹ jọ oma ọ enọ e be gọe ruẹ evawere riẹ. (1 Tim. 1:11) Kọ abọjọ egagọ mai vẹ i bi ru omai wereva ere na?
2 Ẹjiroro nọ Ma be rọ Wereva: Jesu ọ k’omai imuẹro nnọ evawere i re no ‘ẹgwọlọ abọ-ẹzi mai nọ ma re se gboja’ ze. (Mat. 5:3) Ebaibol na nọ ma re wuhrẹ kẹse kẹse gbe iwuhrẹ Ileleikristi mai kpobi nọ ma re kpohọ u re ru ẹgwọlọ ọyena gba. Ewuhrẹ kpahe uzẹme Ẹme Ọghẹnẹ o k’omai ufuoma no erue gbe ẹthọthọ egagọ no. (Jọn 8:32) Ikereakere na i te je wuhrẹ omai edhere uzuazọ nọ ọ mai woma nọ ma re yeri. (Aiz. 48:17) Fiki oyena, ma be reawere ọ uvi omakugbe Ileleikristi evaọ ọgbakugbe inievo evawere mai.—1 Tẹs. 2:20; 1 Pita 2:17.
3 Ma re wo evevọwẹ ilogbo no ẹmeoyo kẹ itee ikpehru Ọghẹnẹ erọ uruemu ze, keme ma riẹ nọ onana o rẹ thọ omai je ru eva were Jihova. (Itẹ 27:11) Ọniyẹrẹ obeusi jọ ọ ta nnọ: “Ghelọ itee egaga rai, Isẹri Jihova e kare evawere he. A be wereva. Emaha gbe ekpako [nọ e rrọ udevie rai] a re dhesẹ oma ọ obọdẹ oghọghọ jẹ rrọ kpatiẹ.” Ẹvẹ ma sai ro fi obọ họ kẹ amọfa wo oghẹrẹ uzuazọ evawere mai na?
4 Fiobọhọ kẹ Amọfa Duku Evawere: Akpọ na ọ vọ avọ ọkora, yọ ahwo a wo eriwo nọ o muebi kpahe obaro na. Dede na, ma wo eriwo ọsasa, keme ma riẹ nnọ ẹdẹ jọ uweri kpobi o te vrẹ no. (Evia. 21:3, 4) Fikiere, ma re w’obọ evaọ odibọgba na avọ ọwhọ, be gwọlọ ahwo udu oruọzewọ nọ ma rẹ ghale ẹruore gbe orọwọ mai kpahe Jihova kẹ.—Izik. 9:4.
5 Oniọvo-ọmọtẹ ọkobaro jọ ọ ta nọ: “Uvumọ oware o riẹ hẹ nọ o rẹ kẹ evawere te obufihọ kẹ amọfa re a riẹ kpahe Jihova gbe uzẹme riẹ.” Joma dao ẹgba mai kpobi re ma ta udu họ amọfa buobu awọ re a jẹ obe-uwuhrẹ Ebaibol rehọ. Jihova nọ ma rẹ gọ gbe amọfa nọ ma re fi obọ họ kẹ re a gọe o rẹ kẹ evawere nọ e mae rro.—Iruẹru 20:35.