Ọruẹrẹfihotọ Okokohọ Okogho Ọkpokpọ
1 Re ma dikihẹ ga evaọ ẹrọwọ evaọ akpọ nọ ọ dọmu hu na, ma re fi eva họ Jihova hrọ. Eme onana o ghinẹ gwọlọ dẹẹ? Ẹvẹ eva nọ ma re fihọ Jihova u re kpomahọ uzuazọ mai gbe orọ uviuwou mai? Ẹvẹ u re ro fi obọ họ k’omai za okpomahọ akpọ Setan dhe? Ọruẹrẹfihotọ okokohọ okogho ọrọ ukpe iruo ọ 2003 na o te k’iyo enọ enana. Uzoẹme riẹ họ “Fi Eva họ Jihova re Who Ru Ewoma.”—Ol. 37:3.
2 Eva nọ ma re fihọ Jihova o rẹ jọ oware etoke obọdẹ jọ hayo etoke ẹgwọlọ ọkpakpata jọ ọvo ho. U re kpomahọ uzuazọ ikẹdẹ kẹdẹ mai kpobi. A fi ẹgba họ onana evaọ ẹme emuhọ na, “Fi Eva họ Jihova eva Etoke Kpobi.” (Ol. 62:8) Ọzọhọkugbe-eriariẹ ọrọ abane na “Edhesẹ Via Evaifihọ Jihova” o ti dhesẹ k’omai epanọ ma re ro duku je fi evuẹ nọ i no Ebaibol ze h’iruo, enọ e rẹ sai fi obọ họ k’omai bọ orọo obokparọ, rẹriẹ aro dhe ebẹbẹ nọ e rẹ roma via evaọ uviuwou na, je ru ẹgwọlọ iwo mai gba.
3 Akpọ Setan ọ be daoma gba eriwo ọgẹgẹle ọrọ oware ogbagba gbe othọthọ h’omai je ru omai reghe kpahe oware nọ o r’oja gbe onọ o r’oja ha. (Aiz. 5:20) Eme na “Yọrọ Oma kẹ Eware Ifofe Uzuazọ” gbe “Whaha Oware Uyoma—Jọ Enọ I Re Ru Ewoma” i ti fi ẹgba họ ọtamuo mai re ma yọrọ itee ikpehru Jihova.—Emọs 5:14.
4 Okenọ Jihova ọ te rehọ ọraha te eyero eware omuomu nana, o te gwọlọ nọ idibo Ọghẹnẹ i fi eva họ iẹe vọvọ. A ti ru onana vevẹ evaọ ovuẹ ogbotu na, “Esiwo No Uye Akpọ O Kẹle No.” U te no oyena no, a ti zizie omai re ma kiẹ oma mai riwi evaọ abọ ẹme na “Kọ A ti Kele Owhẹ Wọhọ Ọnọ O Te kẹ Uvie Ọghẹnẹ?” Omaa na u ti kuhọ avọ uduotahawọ na “Fi Eva họ Eyaa Jihova.”
5 Abọ-ologbo jọ ọrọ okokohọ kpobi họ ẹme ọ ame-ọhọ na. Ohwo kpobi nọ ọ gwọlọ họ-ame ọ rẹ vuẹ ọsẹro ukoko na ababọ oke oraha re a sai ru ọruẹrẹfihotọ nọ o fo.
6 Evaọ etoke awa-ọruọ nana, Jihova ọvo họ ehri uvi evaifihọ gbe oma-dọmu. (Ol. 118:8, 9) Jọ mai kpobi ma bọ eva nọ ma fihọ iẹe ga ẹkwoma ọruẹrẹfihotọ okokohọ okogho na soso nọ ma rẹ jọ.