‘Elo Wọhọ Ikpẹ’
1 Udevie ebi abọ-ẹzi gbe uruemu ọrọ eyero-akpọ inẹnẹ na, enọ e be gọ Jihova, Ọghẹnẹ uzẹme na, nọ i bu te oware wọhọ ima ezeza na a bi “lo wọhọ ikpẹ” evaọ ekwotọ 234 wariẹ akpọ na họ. (Fil. 2:15) Onana o lẹliẹ omai wo ohẹriẹ. Ẹvẹ ma re ro dhesẹ elo ọghaghae uzẹme nọ o no obọ Jihova ze na via?—2 Kọr. 3:18.
2 Uruemu Mai: Ahwo a rẹ kaki vuhu uruemu mai mu gaga. (1 Pita 2:12) Aye jọ o muẹrohọ nnọ ibe-oruiruo riẹ jọ nọ ọ rrọ Osẹri o wo uruemu ẹwo gbe obufihọ, yọ ọ rẹ ta eme etọtọ hayo hwẹ kpahe aroza ogbegbe he. Nọ amọfa a tẹ gwọlọ ru Osẹri na eva dha ẹkwoma eme etọtọ nọ a rẹ jọ iraro riẹ ta, ọ rẹ fọ tou je dikihẹ ga kẹ oware nọ u woma. Okpomahọ vẹ onana u wo kẹ aye na? Ọ ta nọ: “Uruemu riẹ o were omẹ te epanọ me ro muọ enọ họ ẹnọ kpahe Ebaibol na. Me te muọ Ẹme Ọghẹnẹ họ ewuhrẹ jẹ họ-ame uwhremu na.” O fibae nọ: “Uruemu riẹ họ oware nọ o lẹliẹ omẹ muọ ẹrọwọ Isẹri Jihova họ ẹkiẹriwi.”
3 Uruemu mai kpahe udu-esuo, eriwo mai kpahe iruẹru akpọ, gbe ẹme-unu owoma mai o lẹliẹ Isẹri Jihova wo ohẹriẹ wọhọ ahwo nọ a be rria lele itee ikpehru Ebaibol na. Iruo iwoma itieye na e sae wha orro se Jihova je si amọfa ziọ egagọ riẹ.
4 Ẹme-Unu Mai: Uzẹme, ahwo nọ a ruẹ uruemu uwoma mai a sae nwane riẹ oware nọ ma je wo ohẹriẹ hẹ, ajokpanọ ma t’ẹme kẹ ai kpahe ẹrọwọ mai. Kọ ahwo nọ who bi lele ru iruo hayo ahwo nọ wha gbẹ rrọ isukulu, a riẹ nnọ whẹ yọ omọvo Isẹri Jihova? Kọ whọ rẹ gwọlọ uvẹ nọ who re ro nwene ẹme gheghe kpohọ isẹri ise? Kọ o rrọ ọtamuo ra re who ‘ru elo ra lo evaọ iraro ahwo’ eva oke nọ u kiehọ kpobi?—Mat. 5:14-16.
5 Erugba iruo mai wọhọ ewhowha elo o gwọlọ ẹzi oma-urodheidhe. Uruemu ẹwẹ-kpobi nọ ma re wo o te w’omai siọ eware nọ i w’uzou hu ba, re ma sae dawo ẹgba mai kpobi evaọ iruo uzuazọ-usiwo orọ usiuwoma ota gbe ilele i ruo na.—2 Kọr. 12:15.
6 Ẹkwoma uruemu gbe ẹme-unu mai, j’oma gbe lo wọhọ ikpẹ. Ma te ru ere, o rẹ sae wọ amọfa ku oma gbe omai rehọ orro kẹ Jihova.