A Rrọ Oma Kọkọ Họ —Rekọ A Bi Ru Iruo Buobu Ghele
1 Otẹrọnọ whẹ yọ ọmọvo ọ Isẹri Jihova buobu nọ e rrọ oma kọkọ họ, whọ rẹ sai ru iruo buobu evaọ odibọgba na ghele. Evaọ uzẹme, uyero ra o sai rovie obọdẹ uvẹ kẹ owhẹ nọ who re ro se isẹri jẹ tuduhọ amọfa awọ.
2 Isẹri-Ise: Ahwo buobu nọ o gbahọ re a thihakọ oria jọ nọ o da rae a bi wo obọ vọvọ evaọ odibọgba na. Wọhọ oriruo, oniọvo-ọmọtẹ jọ nọ oma-obẹrọ nọ a ru kẹe u kpomahọ ẹnyonya gbe ẹmeọta riẹ gaga ọ ruẹ nnọ otẹrọnọ ọzae riẹ ọ dhẹ omoto rai fihọ akotọ edhere nọ o re zurie, ọ rẹ sai w’obọ evaọ iruo emagazini ifihọ ada. Ẹdẹjọ, o fi emagazini 80 họ ada evaọ euwa ivẹ ọvo! Oghẹrẹ uyero ra na o rẹ sai je ru nọ whọ jẹ t’ẹme kẹ ahwo nọ a rẹ kaki te oma vẹre he. O tẹ rrọ ere, rehọ ahwo nana wọhọ ẹkwotọ obọdẹ ra.
3 Usiuwoma ota ra o rẹ sai w’iruo gaga! Nọ amọfa a bi muẹrohọ ọtamuo ra gbe epanọ uzẹme Ebaibol na u ru uzuazọ ra woma te no, a rẹ sai wo isiuru kẹ ovuẹ Uvie na. Ofariẹ re, nọ whọ tẹ nya ku ahwo nọ a be ruẹ uye idabolo jọ, eware nọ e via kẹ owhẹ no evaọ uzuazọ e sai fi obọ họ kẹ owhẹ kẹ ae omosasọ no Ẹme Ọghẹnẹ ze.—2 Kọr. 1:4.
4 Bọ Amọfa Ga: Kọ ikuigbe uzuazọ Laurel Nisbet e gbẹ kẹ owhẹ uduotahawọ, ọnọ ọ rria ikpe 37 evaọ emashini nọ o re fi obọ họ kẹ ohwo wẹ, ghele na o fi obọ họ kẹ ahwo 17 wo eriariẹ egbagba uzẹme Ebaibol na? Epọvo na re, oriruo ra ọ rẹ sae wọ ibe enọ e rọwo re a daoma gaga evaọ iruo Jihova.—g93-E 1/22 ẹwẹ. 18-21.
5 O tẹ make rrọ nnọ uyero ra o whaha owhẹ obọ nọ whọ rẹ jọ odibọgba na wo wọhọ epanọ whọ gwọlọ, whọ rẹ sae bọ amọfa ga ghele. Oniọvo-ọmọzae jọ ọ ta nnọ: “Me vuhumu inọ makọ ohwo nọ ọ ko dede ọ rẹ sai fi obọ họ kẹ amọfa gaga. Mẹ avọ aye mẹ ma rrọ uketha kẹ oghẹrẹ ahwo sa-sa evaọ ukoko na. Fiki ẹyao, ma re kpohọ oria ovo ho, ma rẹ jariẹ ẹsikpobi kẹ amọfa.” Dede na, fikinọ oma ra o rrọ kọkọ họ, ma riẹ nọ whọ sai ru te epaọ ọwhọ nọ who wo ho. Ghele na, avọ obufihọ jọ whọ sai w’obọ ziezi evaọ odibọgba na. Fikiere, otẹrọnọ whọ gwọlọ uketha jọ, whọ siọ ekpako na hayo amọfa evaọ ukoko na nọ a rẹ sai fi obọ họ kẹ owhẹ ba ẹvuẹ hẹ.
6 Jihova ọ be ruẹ oware kpobi nọ who bi ru re whọ gọe, yọ iruo ẹwẹ ra kpobi e be were iẹe. (Ol. 139:1-4) Nọ whọ be rọ ẹro so ẹe na, ọ rẹ sae kẹ owhẹ ogaga nọ who re ro ru odibọgba ra wo ẹvi gbe aghare.—2 Kọr. 12:7-10.