Ewuhrẹ Ọnya Ẹsikpobi —Oware nọ A Rẹ Rọ Karo
1 Iviuwou Ileleikristi a rẹ rọ iwuhrẹ ukoko nọ a rẹ nya ẹsikpobi karo. Rekọ iruẹru uzuazọ inẹnẹ e rẹ sai ru onana jọ use-abọ. Kọ iruẹru uwou, okọ, hayo iruo isukulu e be rọ ẹmẹrera rehọ oke nọ whọ ruẹrẹ họ kẹ egagọ Jihova? Eriwo Jihova nọ ma re wo u ti fi obọ họ kẹ omai tẹro vi eware nọ ma rọ karo.—1 Sam. 24:6; 26:11.
2 Ọzae Izrẹl jọ o keke aro fihọ siọ eriwo Jihova ba eroro kpahe ọ tẹ nyai hwu ire eva ẹdẹ Ẹdijala. O sae jọ nọ ọ jọ udu riẹ roro nọ o bi ru onana rọ gwọlọ kẹ uviuwou riẹ, hayo inọ o rrọ oware evere gheghe. Dede na, ẹkwoma ẹdhọ nọ a gu rie, Jihova o dhesẹ nnọ eware abọ-iwo nọ a re le evaọ oke nọ a fihọ kẹ egagọ yọ oware osese he.—Ik. 15:32-36.
3 Ẹnyate Use-Abọ Na: Oke iruo okọ nọ a re ru re o se ewuhrẹ ọnya ba ekpomahọ yọ use-abọ rọkẹ ahwo buobu. Ahwo jọ a fi use-abọ nana kparobọ no ẹkwoma ega iruo rai nọ a lele tẹme, oke iruo nọ a nwene kugbe ibe iruiruo, ẹgwọlọ iruo nọ oke rai o mai kiehọ, hayo eyero uzuazọ rai nọ a ru lọhọ. Ababọ avro, omodawọ utioye na fiki egagọ uzẹme o rẹ were Ọghẹnẹ gaga.—Hib. 13:16.
4 Iruo isukulu e sae wha use-abọ ze re. Uzoge jọ ọ ta nnọ, “Me re ru iruo isukulu mẹ jọ no taure me te kpohọ ewuhrẹ, me je zihe no ewuhrẹ ze no me ve ru enọ i kiọkọ.” Otẹrọnọ emọ na e gbẹ sai ru iruo isukulu nọ a ta kẹ ai nọ a jọ obọ uwou ru na re he evaọ aso nọ a ro kpohọ ewuhrẹ, esẹgbini jọ a nyae ta kẹ iticha emọ rai no inọ iwuhrẹ Ileleikristi yọ oware nọ a rọ karo evaọ uviuwou rai.
5 Emamọ omaa gbe ọrọwokugbe yọ ugogo eware nọ i re fi obọ họ nọ a je ru iruẹru uwou gba evaọ oma o ruẹrẹ kpahe kẹ ekpohọ iwuhrẹ evaọ ẹruoke wọhọ iviuwou. (Itẹ 20:18) A re wuhrẹ makọ emaha na dede re a gọ ẹgọ jẹ ruẹrẹ oma kpahe kẹ ekpohọ ewuhrẹ evaọ oke nọ a fihọ. Esẹgbini e rẹ sae rehọ oriruo rai wuhrẹ emọ rai epanọ iwuhrẹ i wuzou te.—Itẹ 20:7.
6 Nọ itunyẹ eyero oke nana i bi vihọ na, o roja re ma kpohọ iwuhrẹ ukoko ẹsikpobi. Joma ruabọhọ eriwo Jihova nọ ma re wo, je ru iwuhrẹ nọ ma rẹ nya ẹsikpobi họ oware ọsosuọ.—Hib. 10:24, 25.