Si Kẹle Ahwo Nọ Who You Ziezi
1 Amono ma re you? Orọ ọsosuọ kpobi, ma you Jihova. (Mak 12:30) O te kẹ uyoyou mai gbe egagọ udu mai kpobi fiki eware kpobi nọ o ru kẹ omai no evaọ edhesẹvia uyoyou udidi riẹ kẹ omai. (Rom 5:8) Wọhọ Ọnọtahwonigbo, Ozerẹ Okpehru, gbe Ovie mai, ma wo uyoyou udidi kẹ Jesu Kristi. (1 Pita 1:8) Imava orọo a re you ohwohwo. (Ẹf. 5:25, 33) A re you emọ rai, jẹ yọrọ ae evaọ idhere Jihova. (Tait. 2:4) Yọ ahwo kpobi evaọ ukoko na a wo owha-iruo nọ a re ro you ohwohwo.—1 Pita 1:22.
2 Ẹdhọ ọ be daoma re o ru omai si oma no ahwo nọ u fo nọ ma re dhesẹ uyoyou kẹ. Re ọ sai ru ẹjiroro riẹ gba, ọ be rehọ iruẹru gbe idhere ẹghẹ buobu ro ruiruo. Wọhọ oriruo, ọ sai reghe omai ẹkwoma oma nọ ma re duhọ usu akpọ na nọ i re mi omai abọ ologbo oke mai no hayo tube ru nọ ma gbe wo uvẹ kẹ iwuhrẹ enya hayo wobọ evaọ odibọgba na ha. Hayo ọ sai ru omai nọ ma jẹ rehọ oke thethei ro rri etẹlivisiọno, ividio, se hayo vi uwou evaọ ekọmputa, hayo kiẹ Itanẹte riwi. Eme a re ru nọ Oleleikristi ọ tẹ rrọ otọ otunyẹ no akpọ na ze hayo ọ tẹ be rẹriẹ ovao dhe odawọ?
3 U fo nọ ma re si kẹle Jihova ziezi, jẹ wọso Ẹdhọ. (Jem. 4:7, 8) Nọ ma bi se je gbe bi wuhrẹ kpahe uzuazọ Jesu gbe odibọgba riẹ na, ovuhumuo nọ ma re wo kẹ oriruo nọ o fihotọ kẹ omai o rẹ wọ omai nya lele ithihi riẹ kpekpekpe vi epaọ ọsosuọ. (1 Pita 2:21; Jọn 4:34) Rọ kpahe oyerikugbe uviuwou, ma rẹ yọrọ oma kpahe iroro ọ mẹrẹjọmẹsa akpọ na. Ahwo uviuwou a rẹ daoma re a hae raha oke kugbe je ru eware kugbe.—Izie. 6:7.
4 A be jọ ukoko na wuhrẹ omai kpobi nọ ma you ohwohwo je ru ere vọvọ, koyehọ ma re si kẹle inievo mai nọ ma gbẹ rrọ orọwọ na kpekpe vi epaọ ọsosuọ. (Gal. 6:9, 10; 1 Tẹs. 4:9, 10) Ma re ru onana ẹkwoma obọ nọ ma re wo ẹsikpobi evaọ iwuhrẹ ukoko gbe odibọgba na, je weze kpohọ iwou inievo Ileleikristi mai re ma ta udu họ ae awọ. Ma tẹ nya lele edhere nana u re fi obọ họ kẹ omai dadamu nọ edawọ hayo ẹgwọlọ obọdẹ jọ ọ tẹ roma via.
5 Makọ oghẹrẹ edawọ nọ ma rẹriẹ ovao dhe hayo iyero nọ ma rrọ kẹhẹ, nọ ma si kẹle Jihova na, ọ te se omai ba vievie he. (Hib. 13:5) Kristi Jesu ọ yaa eyaa kẹ omai inọ ọ rẹ te jọ kugbe omai rite urere eyero nana. (Mat. 28:20) Okugbe orọo na ọ rẹ ga vi epaọ ọsosuọ ẹkwoma usu okpekpe nọ uviuwou u re wo nọ a sai ro mudhe kẹ itunyẹ nọ i bi no akpọ na ze.
6 Joma gbaemu re ma si kẹle ahwo nọ ma you vi epaọ ọsosuọ. Jaja amọfa oma re a wo uyoyou je ru iruo iwoma evaọ ukoko na, je wo uyoyou udidi kẹ ohwohwo nọ urere eyero anwae nana o bi si kẹle na.—Hib. 10:23, 24; 1 Pita 4:8.