Iruo nọ Ọghẹnẹ Ọ be Tha Uke
1 Evaọ usu idibo Ọghẹnẹ nẹnẹ, umutho jọ ọvo i kpohọ isukulu ikpehru, fe efe, hayo wo ọkwa okpehru evaọ eyero nana. Fiki oyena, ahwo jọ a rẹ se usiuwoma ota mai wọhọ oware nọ u fioka ha. (Aiz. 53:3) Dede na, iruo ewuhrẹ Ebaibol nọ ma bi ru na o wha omosasọ gbe ẹruore se ima ahwo buobu no wariẹ akpọ na soso họ. Kọ ẹvẹ ahwo gheghe a sai ro wo iyẹrẹ itieye nọ e viodẹ tobọ no? Ẹkwoma uketha Ọghẹnẹ ọvo. (Mat. 28:19, 20; Iruẹru 1:8) Pọl ukọ na ọ ta nọ: ‘Ọghẹnẹ ọ salọ eware ekuako akpọ na re o jọ omaovuọ kẹ enọ i wo ogaga.’—1 Kọr. 1:26-29.
2 Ikọ na gbe Ileleikristi ikpe-udhusoi ọsosuọ efa buobu “a riẹ obe he yọ a jọ ahwo gheghe.” (Iruẹru 4:13, NW ) Ghele na, a rọ aruọwha ru iruo usiuwoma ota nọ a kẹ rai na, yọ Jihova ọ ghale omodawọ rai. Ghelọ ezadhe gbe ọwọsuọ nọ ọ jariẹ, ‘ẹme Ọnowo na ọ gbẹ jẹ rro whawha avọ obọ okparọ.’ Oware ovo o sae whaha iruo na ha keme Ọghẹnẹ ọ jẹ thae uke. (Iruẹru 5:38, 39; 19:20) Epọvo na o rrọ re evaọ oke mai na. Makọ ọwọsuọ nọ isu egaga a gbamu bi ro te omai ọ be sae whaha eviharo emamọ usi na ha.—Aiz. 54:17.
3 Ujiro Kpobi O Rrọ Rọkẹ Ọghẹnẹ: Kọ uvẹ aruoriwo nọ ma wo wọhọ egbodibo Ọghẹnẹ u re ru nọ ma jẹ rọ oma mai seha? Vievie. Be ta kpahe odibọgba Oleleikristi na, Pọl o kere nọ: “Ma wo efe ọnana eva eware nọ a rehọ ẹkpẹ ma, yọ ogaga ulogbo nọ othesiwa nọ o riẹe kọ orọ Ọghẹnẹ, orọnikọ obọ mai u nọ ze he.” (2 Kọr. 4:7) Pọl o vuhumu inọ ẹkwoma ẹgba nọ Ọghẹnẹ ọ kẹ riẹ ọvo ọ sae rọ wha iruo odibọgba riẹ haro.—Ẹf. 6:19, 20; Fil. 4:13.
4 Ma re vuhumu re inọ “fiki obufihọ nọ uno obọ Ọghẹnẹ ze” ọvo ma be sai ro ru iruo usiuwoma ota na gba. (Iruẹru 26:22) Ẹkwoma usiuwoma na nọ ma bi whowho kẹ akpọ-soso, Jihova ọ be rehọ omai ru iruo evaọ edhere ologbo ro nuhu erẹwho na—oka ẹdhoguo ọraha nọ ọ be tha kẹle na. (Hag. 2:7) Ẹvẹ uvẹ-ọghọ nọ ma wo o rro te, nọ ma rọ rrọ ‘ibe iruiruo Ọghẹnẹ’ evaọ iruo ilogbo ivuẹvu abọ-ẹzi na!—1 Kọr. 3:6-9.