Rri Uvẹ-Ọghọ nọ Whọ be rọ Ta Usiuwoma na Ghaghae
1. Ẹvẹ ahwo buobu evaọ akpọ na a rri iruo usiuwoma ota mai?
1 Ahwo buobu evaọ akpọ Setan a rri iruo usiuwoma ota mai na wọhọ oware “ugheghẹ.” (1 Kọr. 1:18-21) Ma gbẹ yọroma ha, eriwo ọthọthọ nana ọ rẹ sae wha elọhoma se omai nọ ma gbe wo ọwhọ kẹ odibọgba na ha. (Itẹ 24:10; Aiz. 5:20) Fikieme ma re ro rri uvẹ-ọghọ nọ ma rọ rrọ Isẹri Jihova ghaghae?—Aiz. 43:10.
2. Fikieme ma sai ro rri iruo odibọgba na wọhọ “iruẹru ozerẹ”?
2 “Iruẹru ozerẹ”: Pọl ukọ na o dhesẹ odibọgba na wọhọ “iruẹru ozerẹ.” (Rom 15:15, 16) Ẹvẹ odibọgba na o rọ wọhọ “iruẹru ozerẹ”? Ma tẹ be jariẹ w’obọ u re ru omai jọ ‘ibe iruiruo’ Jihova ọnọ “ọ rọ fuafo na” je fiba erufuọ odẹ riẹ. (1 Kọr. 3:9; 1 Pita 1:15) Jihova o rri iruo usiuwoma ota mai na wọhọ ‘idheidhe ujiro,’ fikiere odibọgba na yọ abọjọ egagọ mai nọ u wuzou gaga.—Hib. 13:15.
3. Eme u ru ewhowho emamọ usi na rrọ uvẹ-ọghọ ulogbo?
3 Ewhowho emamọ usi na yọ uvẹ-ọghọ ulogbo nọ umutho ahwo a wo. A tẹ kẹ ijẹle iruo itieye a rẹ rọ evawere nabi ru iruo na ziezi. (1 Pita 1:12) Rekọ, mai ahwo-akpọ nọ a gba ha nọ “a rehọ ẹkpẹ ma” eye Jihova ọ rọ uvẹ-ọghọ ulogbo nana kẹ!—2 Kọr. 4:7.
4. Ẹvẹ ma sai ro dhesẹ nọ ma rri odibọgba na ghaghae?
4 Oware nọ Ma rẹ rọ Karo: Fikinọ iruo odibọgba na o rrọ ghaghae gaga kẹ omai, o rọ usu ‘eware nọ e mai woma’ hayo wuzou evaọ uzuazọ mai. (Fil. 1:10) Fikiere, ma re fi oke họ koka koka nọ ma re ro kpohọ usiuwoma. Nọ ohwo o te rri uvẹ-ọghọ nọ ọ rọ rrọ usu ogba-ile nọ a riẹ evaọ akpọ-soso ghaghae, ọ rẹ ruẹrẹ oma kpahe kẹ ehaa kpobi nọ a gwọlọ jọ kporo, jẹ daoma re o wo ẹnyaharo evaọ onaa riẹ. Epọvo na re, u fo re ma ruẹrẹ oma kpahe taure ma te ti kpohọ usiuwoma re ma sae ‘ta ẹme uzẹme na ziezi,’ ma vẹ jẹ daoma wo ẹnyaharo evaọ ‘onaa ewuhrẹ’ mai.—2 Tim. 2:15; 4:2.
5. Ono iruo odibọgba mai e be da ẹro?
5 Whọ jọ eme iyoma nọ ahwo a rẹ ta kpahe iruo odibọgba na e wha elọhoma se owhẹ hẹ. Kareghẹhọ inọ ibuobu e gbẹ rrọ ẹkwotọ mai nọ e gwọlọ nọ ma ta usiuwoma kẹ ai. Rekọ, orọnikọ ahwo-akpọ ma gwọlọ ru eva were he. Oware nọ o mai wuzou họ epanọ Jihova o bi rri iruo mai, yọ o rẹ were iẹe gaga nọ ma tẹ be dawo ẹgba mai kpobi.—Aiz. 52:7.