Usiuwoma Ota—Uvẹ-Ọghọ Oghaghae
1 Evaọ okpẹdẹ kpobi, ima ahwo-akpọ buobu a bi wo erere no eware nọ Jihova ọ ma ze. (Mat. 5:45) Rekọ, umutho ahwo jọ ọvo a be reawere uvẹ-ọghọ oghẹrẹsa nọ a bi ro dhesẹ uyere kẹ Ọnọma rai, ẹkwoma ewhowho emamọ usi Uvie Ọghẹnẹ. (Mat. 24:14) Ẹvẹ who rri uvẹ-ọghọ nana ghare te?
2 Usiuwoma ota o rẹ wha orro se Ọghẹnẹ, jẹ wha ẹruore gbe udhedhẹ se ahwo nọ ẹvohẹ akpọ inẹnẹ na ọ be kẹ ọkora. (Hib. 13:15) Rọkẹ ahwo nọ a gaviezọ kẹ ovuẹ na, o rẹ kẹ ae ẹruore uzuazọ ibẹdẹ bẹdẹ. (Jọn 17:3) Iruo efa vẹ e rẹ sae kẹ erere otiọye? Pọl ukọ na o dhesẹ ovuhumuo nọ o wo kẹ odibọgba na via evaọ oghẹrẹ nọ ọ rọ whae haro. Ọ rehọ e riẹ ghaghae, wọhọ efe.—Iruẹru 20:20, 21, 24; 2 Kọr. 4:1, 7.
3 Uvẹ-Ọghọ Mai nọ Ma re Rri Ghaghae: Edhere jọ nọ ma re ro dhesẹ ovuhumuo kẹ uvẹ-ọghọ usiuwoma ota na họ ẹro nọ ma rẹ tọvi epanọ ma bi ru woma te evaọ odibọgba mai. Kọ ma be hae rehọ oke ziezi ruẹrẹ ẹme jọ họ nọ o re duobọte ahwo nọ ma be ta ẹme kẹ udu? Kọ ma sai wo ẹnyaharo evaọ ona nọ ma rẹ rọ rehọ Ikereakere na ruiruo gbe iroro nọ ma rẹ jẹ kugbe ahwo? Kọ ma bi ru ẹkwotọ nọ a ghale kẹ omai ziezi? Kọ ma sae to obe-uwuhrẹ Ebaibol họ je ru uwuhrẹ na ziezi? Wọhọ Ileleikristi ẹrọwọ, te erọ anwae gbe erọ ọgbọna, emamọ eriwo nọ ma wo kpahe iruo nana o be wọ omai wha iruo mai haro, yọ ma rri uvẹ-ọghọ nana ghaghae.—Mat. 25:14-23.
4 Nọ ma te bi lele owho, ẹyao, hayo iyero ebẹbẹ efa muabọ, o rrọ oware omosasọ re ma riẹ nọ omodawọ nọ ma be rọ rehọ ajọwha wobọ evaọ odibọgba na o rrọ omai ẹro ghaghae gaga. Ẹme Ọghẹnẹ ọ kẹ omai imuẹro inọ Jihova o rri omodawọ utioye nọ ma be rọ gọe na ghaghae, makọ umutho eware jọ nọ ma ru nọ amọfa a rri te oware ovo ho.—Luk 21:1-4.
5 Usiuwoma ota o rẹ kẹ evevọwẹ ziezi. Oniọvo-ọmọtẹ jọ nọ ọ kpako te ikpe 92 no ọ ta nọ: “Nọ me rri kpemu kpohọ ikpe 80 nọ mẹ rọ rehọ oma mudhe ru iruo kẹ Ọghẹnẹ no, mẹ ruẹ nọ uvẹ-ọghọ riẹ o rro kẹhẹ, yọ mẹ vioja riẹ vievie he! O hae jọ nọ mẹ sae wariẹ yeri uzuazọ mẹ no emuhọ ze, epọvo na mẹ hae yeri ei keme, evaọ uzẹme, ‘uyoyou-ẹwo Ọghẹnẹ u woma vi uzuazọ.’ ” (Ol. 63:3) Jọ mai oma mai ma rri uvẹ-ọghọ oghaghae nana nọ u no obọ Ọghẹnẹ ze na ghaghae—iruo usiuwoma ota Uvie na.