A Mu Efe họ Omai Obọ
1 Pọl ukọ na o rri iruo usiuwoma ota nọ Ọghẹnẹ ọ kẹ riẹ na ghaghae, o te sei nọ “efe.” (2 Kọr. 4:7) O thihakọ ebẹbẹ gbe ukpokpoma nọ o je ru iruo na. O rolo obọ evaọ iruo na ha, ọ ta usiuwoma kẹ ohwo kpobi nọ ọ nyaku. Ọ nya idhere nọ e rẹ bẹbẹ jẹ vọ avọ enwoma evaọ otọ oyaya gbe abade. Ẹvẹ ma sae rọ rehọ aro kele Pọl je dhesẹ nọ ma rri odibọgba mai ghaghae? (Rom 11:13) Eme o ru odibọgba mai họ efe nọ a rẹ ruẹ obọ riẹ hẹ?
2 Efe nọ Ọ Mai Woma: Ẹsibuobu efe akpọ na ọ rẹ wha ebẹbẹ buobu lele oma, yọ irere nọ i re noi ze e rrọ ubroke gheghe. Evaọ abọdekọ riẹ, odibọgba mai ọ rẹ wha irere ibẹdẹ bẹdẹ se omai gbe amọfa. (1 Tim. 4:16) U bi fiobọhọ kẹ ahwo evezi te riẹ Jihova, ru inwene nọ i fo evaọ uzuazọ rai, je wo uvi ẹruore ọrọ uzuazọ ibẹdẹ bẹdẹ. (Rom 10:13-15) Ẹkwoma odibọgba mai nọ ma re rri ghaghae, uzuazọ mai u re wo uvi otofa, ma re wo evevọwẹ, gbe uvi ẹruore kpahe obaro.—1 Kọr. 15:58.
3 Dhesẹ Inọ Who Rri Efe Nana Ghaghae: Epanọ ma rri oware ghae te u re dhesẹ oma via evaọ oghẹrẹ nọ ma re ru ei. O ginẹ rrọ uvẹ ọghọ ulogbo re ma rehọ oke gbe ẹgba mai ro jiri Jihova! (Ẹf. 5:16, 17) U fo re oghẹrẹ nọ ma be rehọ oke mai ruiruo u dhesẹ inọ ma rri eware abọ-ẹzi ghae vi eware abọ-iwo. Nọ ma wo ovuẹ oghaghae nọ ma rẹ vuẹ amọfa na, u fo re ma rehọ ajọwha whowho iei je fi ẹro hotọ re ma rehọ uvẹ kpobi nọ u rovie fihọ rọ ta usiuwoma.
4 Evaọ ẹsibuobu, ahwo nọ a wo ekwakwa eghaghae a rẹ ko ai dhere he, rekọ a re dhesẹ ai via re amọfa a rue rai. Ma te rri odibọgba mai wọhọ efe, o ti dhesẹ oma via evaọ uzuazọ mai. (Mat. 5:14-16) Avọ udu mai nọ o vọ avọ ovuhumuo, joma rọ aro kele Pọl ukọ na ẹsikpobi, re ma jẹ rehọ uvẹ kpobi nọ u rovie fihọ ro dhesẹ inọ ma rri odibọgba mai ghaghae, rri rie wọhọ efe ọghaghae.