Rọ Aro Kele Kristi Evaọ Odibọgba Ra
1 Jesu o fi oriruo hotọ k’omai nọ ma rẹ nya lele evaọ odibọgba mai. Uyoyou udidi nọ o wo kẹ Ọghẹnẹ gbe ahwo u dhesẹ oma via evaọ iyero sa-sa gbe idhere buobu. O wuhrẹ ahwo nọ a wo omarokpotọ uzẹme na je dhesẹ uyoyou-ẹwo kẹ ahwo nọ a be ruẹ uye gbe enọ a kienyẹ.—Mat. 9:35.
2 Oriruo Jesu gbe Iwuhrẹ Riẹ: Re ọ seba ereghe no odibọgba riẹ, Jesu ọ whaha oma udhehọ isuẹsu hayo iruẹru nọ ahwo oke yena a gwọlọ ro ru uyero rai woma. Yọ ọ kuvẹ hẹ re eware abọ-iwo efa i reghe iei no iruo usiuwoma ota na. (Luk 8:1) Ọ tẹrovi ewhowho emamọ usi Uvie Ọghẹnẹ wọhọ oware nọ u ti ku ebẹbẹ ahwo-akpọ kpobi họ. Jesu o wo iruo buobu nọ o re ru, yọ oke nọ o re ro ru iruo na u tulo ho. Okenọ ahwo nọ a rrọ obọ Kapaniọm a gwọlọ nọ Jesu ọ daji obei, ọ tẹ ta kẹ ilele riẹ nọ: “Wha nyaze, ma kpo ewho ekẹloma edekọ, kpere mẹ jọ etẹe vuẹ ovuẹ re; keme fiki onana mẹ jẹ ze.”—Mak 1:38.
3 Nọ o wuhrẹ ilele riẹ no, Jesu o te vi ae vrẹ avọ ugogo uthubro nana: “Wha hẹ vuẹ nọ, ‘Uvie odhiwu o kẹle ino.’ ” (Mat. 10:7) O wuhrẹ ilele riẹ inọ isiuru Uvie na a rẹ rọ karo evaọ uzuazọ rai. (Mat. 6:33) Eme urere nọ Jesu ọ vuẹ ilele riẹ taure o te ti zihe kpohọ odhiwu i dhesẹ oware nọ a re ru kẹ ae vevẹ. Ọ ta nọ: “Fikiere wha wuhrẹ ahwo erẹwho kpobi.”—Mat. 28:19.
4 Epanọ Uvie na U Wuzou Te: Ugogo oware nọ Jesu ọ jẹ ta kpahe họ Uvie Ọghẹnẹ, yọ ọ ta udu họ ilele riẹ awọ inọ a rọ aro kele iei. Omodawọ ohwo-akpọ o sai ku ebẹbẹ ahwo-akpọ họ họ. (Jeri. 10:23) Uvie Ọghẹnẹ ọvo họ oware nọ u ti ru odẹ Riẹ fo, je ku ebẹbẹ ahwo-akpọ họ bẹdẹ bẹdẹ. (Mat. 6:9, 10) Uzẹme Uvie na nọ ma re wuhrẹ ahwo nọ “a bi dimẹ je bi bo fiki eware oma-uzue nọ a bi ruẹ” evaọ akpọ na u re fiobọhọ k’omai rria uzuazọ nọ o vọ avọ evawere gbe evevọwẹ enẹna je kru ẹruore obaro na ghaghae.—Izik. 9:4.
5 Jesu o gbe wo obọ ulogbo evaọ ewhowho emamọ usi Uvie Ọghẹnẹ, yọ ọ k’omai imuẹro uketha riẹ. (Mat. 28:20) Ẹvẹ ma be rọ aro kele oriruo nọ Jesu o fihotọ te evaọ odibọgba mai? (1 Pita 2:21) Evaọ edẹ urere nana, joma dao ẹgba mai kpobi re ma nya lele oriruo nọ Jesu o fihotọ k’omai evaọ odibọgba na!