Odibọgba Oleleikristi na —Iruo nọ E Mai w’Uzou kẹ Omai
1 Mai kpobi ma wo oghẹrẹ iruo sa-sa nọ ma re ru hrọ. Re a ru ẹgwọlọ uviuwou ohwo gba yọ ute nọ u no obọ Ọghẹnẹ ze. (1 Tim. 5:8) Dede na, iruo nọ i lele ute yena nọ u no obọ Ọghẹnẹ ze na e rẹ karo kẹ iruo usiuwoma Uvie gbe iruo ilele-iruo na ha.—Mat. 24:14; 28:19, 20.
2 Jesu ọ k’omai oriruo nọ ma re lele evaọ ‘ẹkake guọlọ Uvie na.’ (Mat. 6:33; 1 Pita 2:21) Dede nọ umutho ekwakwa iwo jọ ọvo o wo, o duoma riẹ kpobi họ oreva Ọsẹ riẹ uruo. (Luk 4:43; 9:58; Jọn 4:34) Ọ dawo ẹgba riẹ kpobi evaọ uvẹ kpobi nọ o ro se isẹri. (Luk 23:43; 1 Tim. 6:13) Ọ ta udu họ ilele riẹ awọ re a wo isiuru egaga evona evaọ iruo ivuẹvu na.—Mat. 9:37, 38.
3 Aruorokele Jesu Nẹnẹ: Ma rẹ sae rọ aro kele oriruo Jesu ẹkwoma oma nọ ma rẹ dawo re ma rria uzuazọ olọlọhọ nọ o tẹro vi odibọgba Oleleikristi na. Otẹrọnọ ma wo umutho ẹgwọlọ uzuazọ, joma kezọ kẹ ohrẹ Ebaibol na re ma siọ ekwakwa akpọ nana ba ele ga hrọ. (Mat. 6.19, 20; 1 Tim. 6:8) Ẹvẹ o rẹ mai woma te re ma gwọlọ ru ẹkabọ mai evaọ iruo usiuwoma ota na kẹre viere! Ma tẹ rẹriẹ aro dhe iyero ebẹbẹ, joma dao ẹgba mai wọhọ epanọ Jesu o ru, re ma siọ awa-ọruọ uzuazọ uvẹ ba ẹkẹ re i ruru uzedhe iruo ewhowho emamọ usi Uvie na.—Luk 8:14; 9:59-62.
4 Makọ ahwo nọ a wo ewha-iruo a be rehọ iruo usiuwoma ota na karo. Oniọvo jọ nọ o wo uviuwou ulogbo, ọnọ o wo emamọ iruo, yọ ọ rrọ ọkpako evaọ ukoko Ileleikristi na ọ ta nnọ: “Me rri odibọgba na wọhọ akiruo mẹ.” Oniọvo-ọmọtẹ jọ nọ ọ rrọ ọkobaro ọ ta nnọ: “Iruo ọkobaro e ghare vi emamọ iruo okọ thethabọ.”
5 Epanọ iyero mai e rrọ kpobi, joma lele oriruo Jesu. Evaọ oghẹrẹ vẹ? Ẹkwoma odibọgba Oleleikristi na nọ ma re ru fihọ akiruo mai.