Eme Whọ Rọ Karo?
1 Ikoko egagọ buobu i re fi ẹgba họ iruo ezi nọ a re ru kẹ amọfa, wọhọ iwou isukulu hayo eria imu nọ a rẹ bọ. Rekọ, dede nọ “oware uwoma gbe ọghoruo” o be thọrọ Isẹri Jihova ẹro ho, a rehọ obọ nọ a re fihọ kẹ ahwo evaọ abọ-ẹzi karo.—Hib. 13:16.
2 Oriruo Ikpe-Udhusoi Ọsosuọ: Jesu o ru iruo iwoma buobu evaọ etoke odibọgba otọakpọ riẹ, rekọ isẹri ise kẹ uzẹme na họ iruo nọ ọ rọ karo. (Luk 4:43; Jọn 18:37; Iruẹru 10:38) O juzi kẹ ilele riẹ re a ‘ru ilele ahwo erẹwho kpobi, . . . re a wuhrẹ ai.’ (Mat. 28:19, 20) Yọ o dhesẹ nnọ ahwo nọ a fi ẹrọwọ họ iẹe a re ti ru iruo ilogbo nọ i vi eriẹ evaọ iruo nọ o muhọ na. (Jọn 14:12) Jesu ọ rehọ iruo usiuwoma ota na karo keme u re fi obọ họ kẹ ahwo wuhrẹ kpahe edhere usiwo.—Jọn 17:3.
3 Pọl ukọ na o rri iruo usiuwoma ota riẹ wọhọ ‘ọgbahọ,’ ute nọ ọ rẹ sai gbabọ kẹ hẹ. (1 Kọr. 9:16, 17) U no rie eva ze re ọ lahiẹ oma, thihakọ edawọ, hayo ruẹ uye nọ o gwọlọ kpobi re ọ sai ru iruo odibọgba riẹ gbunu. (Iruẹru 20:22-24) Pita ukọ na avọ ogbẹnya riẹ a dhesẹ oghẹrẹ ẹzi ọvo na re. Ghelọ uye ukpe gbe uwou-odi nọ a fi rae họ, ‘a ruabọhọ isẹri ise kpahe uwuhrẹ Jesu Kristi ababọ eriosehọ.’—Iruẹru 5:40-42.
4 Kọ ẹvẹ kpahe omai? Ma be rọ iruo ewhowho emamọ usi Uvie gbe ilele-iruo na karo? Wọhọ Jesu, kọ ma wo uvi ọdawẹ kẹ ahwo nọ “a rọ oyoya, a tẹ jẹ vaha wọhọ igodẹ nọ i wo othuru hu”? (Mat. 9:36) Eware nọ e be via evaọ akpọ na nẹnẹ gbe eruaruẹ Ebaibol i dhesẹ vevẹ no inọ eyero omuomu nana ọ kẹle ekuhọ no! Epanọ iruo usiuwoma ota na i wuzou te nọ ma re wo họ iroro o rẹ wọ omai nọ ma jẹ ruabọhọ ẹta usiuwoma na avọ ọwhọ.
5 Kiẹ Iyero Ra Riwi: Nọ o rrọ nọ iyero omobọ-ohwo i re nwene ẹsikpobi na, u re woma re ma hai roro n’oke ruoke sọ ma sai ru inwene jọ re ma sai w’obọ vọvọ evaọ iruo odibọgba na. Oniọvo-ọmọtẹ jọ nọ o ru ọkobaro oke-kpobi evaọ etoke ikpe ọ 1950, 1960, gbe 1970 o ruẹ nọ o gba riẹ họ re o no iruo ọkobaro na fiki ẹbẹbẹ ẹyao. Nọ oke o be nyaharo na, oma riẹ u te mu ei uvẹ họ ẹkẹ. Ọ tẹ wariẹ kiẹ iyero riẹ riwi je ku ei họ nnọ ọ rẹ wariẹ muọ iruo ọkobaro họ. Rri epanọ eva e were riẹ te nọ o kpohọ Isukulu Iruo Ekobaro na yọ ọ kpako te ikpe 90 no! Kọ ẹvẹ kpahe owhẹ? Kọ whọ be kẹle eriosehọ no iruo hayo enwrotọ no isukulu no? Nọ iyero ra i te nwene, kọ whọ te sae ru iruo ọkobaro?
6 Okenọ Jesu o muẹrohọ nọ Mata “ọ jẹ ruawa iruo ẹbẹ-othere,” ọ rọ edhere ẹwo ta kẹe nọ o re ti wo eghale buobu otẹrọnọ o ru eware lọhọ. (Luk 10:40-42) Kọ whọ sai ru eyero uzuazọ ra lọhọ? Kọ o ghinẹ r’oja re ọzae uwou-orọo avọ aye riẹ a nwane jọ iruo egọmeti? Otẹrọnọ a ru inwene, kọ iruo omọvo e sae kuọ uviuwou na soso? Ahwo buobu a wo irere abọ-ẹzi no ẹkwoma inwene nọ a ru re a sai wo abọ ologbo evaọ odibọgba na.
7 Jọ mai kpobi ma lele oriruo nọ Jesu avọ ikọ na a fihotọ na! Ma rẹ sai wo imuẹro eghale Jihova kẹ omodawọ ogaga mai re ma sai w’abọ vọvọ evaọ iruo ewhowho emamọ usi Uvie nọ e rọ oja na.—Luk 9:57-62.