Kẹ Iyogbere Ẹruore
1 Jesu o dhesẹ obọdẹ isiuru kpahe iyogbere. Okejọ o jariẹ nọ ọ rehọ edhere igbunu kẹ ae emuore je siwi enọ e jẹ mọ, rekọ oware nọ ọ mai tẹrovi họ ewhowho “usiuwoma” na kẹ iwhrori. (Mat. 11:5) Iruo usiuwoma ota na o gbẹ be wha erere se iyogbere gbe amọfa nẹnẹ.—Mat. 24:14; 28:19, 20.
2 Uvi Ẹruore: Isu Kristẹndọm a be hae ya eyaa kẹ iyogbere ẹsikpobi inọ ekọ i ti kiehọ kẹ ae otẹrọnọ a fi ugho họ umudo ziezi. Rekọ, Ebaibol na i wuhrẹ inọ Uvie Ọghẹnẹ ọvo u ti ku uvuhu họ je ku ebẹbẹ ahwo-akpọ kpobi họ. (Ol. 9:18; 145:16; Aiz. 65:21-23) Nọ ma te bi dhesẹ oware nọ Ebaibol na u gine wuhrẹ kẹ iyogbere, yọ ma be kẹ ae ẹruore je bi fiobọhọ kẹ ae riẹ epanọ a rẹ rọ gọ Ọghẹnẹ.—Mat. 5:3.
3 Ahwo Farisi erọ edẹ Jesu a je rri iyogbere vo, je se ai ‘am-ha·’aʹrets, hayo “ahwo otọ na.” Rekọ Jesu o rri “azẹ rai,” hayo uzuazọ rai “ghaghae.” (Ol. 72:13, 14) Ma sae rọ aro kele Jesu je dhesẹ aruoriwo kẹ iyogbere ẹkwoma ẹwo gbe ọdawẹ nọ ma re dhesẹ kẹ ae. (Itẹ 14:31) U fo ho re ma ta eme orivo kpahe iyogbere hayo rri rai vo inọ a te ahwo nọ ma rẹ ta usiuwoma kẹ hẹ. Ibuobu ahwo nọ e be jẹ ovuẹ Uvie na rehọ yọ iyogbere.
4 Fiobọhọ kẹ Iyogbere Enẹna: Ehri-izi Ebaibol nọ ma re wuhrẹ iyogbere nọ e rrọ ẹkwotọ mai u re je fiobọhọ kẹ ae kẹnoma kẹ eware jọ nọ i re ru uvuhu ga. Wọhọ oriruo, Ebaibol na i mukpahe idieda-thomawa, edhọfi, oyẹlẹ, utaba-use hayo ivovavovo, gbe iruemu efa nọ e rẹ wha uvuhu ze. (Itẹ 6:10, 11; 23:21; 2 Kọr. 7:1; Ẹf. 5:5) Ikereakere na e ta udu họ omai awọ re ma wo uruemu oruọzewọ jẹ rehọ udu mai kpobi ruiruo, eware nọ a rẹ jọ oma oruiruo gwọlọ. (Kọl. 3:22, 23; Hib. 13:18) Evaọ ọkiẹriwo jọ nọ a ru, ibuobu ahwo nọ e rẹ rehọ ahwo iruo a ta nọ oruọzewọ họ oware nọ a rẹ mai fiẹrohọ nọ a tẹ be kiẹ ahwo nọ a gwọlọ rehọ iruo.
5 Jihova o gbolo aro kẹ uye nọ iyogbere a be ruẹ vievie he. Kẹle na, Jesu Kristi o ti siwi ‘iyogbere nọ i bi bo kẹ obufihọ.’ (Ol. 72:12) Bọo oke yena, ma wo uvẹ-ọghọ obọdẹ nọ ma rẹ rọ rehọ ovuẹ ẹruore nọ o rrọ Ebaibol na rọ sasa amọfa oma, te iyogbere.