Ẹkpẹti Onọ

◼ Kọ u fo re ma kere adrẹse obọmai nọ ma rẹ rọ rehọ ekọmputa vi uwou (nọ Oyibo o re se e-mail) fihọ ebe mai nọ ma re fihọ ada?

Iwhowho-uvie jọ a rehọ idhere sa-sa ro kere adrẹse e-mail obọrai fihọ emagazini hayo emebe-evẹvẹ nọ a bi fihọ ada no. A bi ru ere re ahwo nọ a rehọ ebe na a sae rọ adrẹse na vi uwou se ai rọ yare evuẹ efa. Iroro itieye na re a ro fiobọhọ kẹ enọ i wo isiuru yọ emamọ iroro. Rekọ, joma kareghẹhọ inọ, ma be hai kere e-mail adrẹse ukoko na fihọ emu emagazini hayo emebe-evẹvẹ kpobi. Fikiere, u re woma otẹrọnọ ma du kere adrẹse e-mail obọmai fihọ ebe na ha.

Owhowho-uvie ọ tẹ gwọlọ nọ ọ rẹ rehọ ẹwẹ-obe gheghe ro kere adrẹse hayo inọmba ifonu riẹ kẹ ahwo evaọ ẹkwotọ riẹ, maero nọ o te bi ru ozihebro, oyena yọ ẹme obọriẹ. Mai ọvo ma rẹ daoma re ma zihe bru ahwo nọ a dhesẹ isiuru ukpenọ ma re vu ae wa inọ a tẹ gwọlọ a se hayo kere se omai kẹ evuẹ efa. Nọ ma te bi lele ohwo ta ẹme ovao dhe ovao ẹsiẹe ma sai mai ro dhesẹ uvi isiuru kpahe ohwo na.