Whọ Se Ba Ha!
1. Edhere vẹ ma re ro ru ewoma kẹ ahwo?
1 Nọ ma tẹ be rọ ajọwha ta usiuwoma Uvie Ọghẹnẹ kẹ ahwo nọ a rrọ ẹkwotọ mai yọ ma bi ru ewoma kẹ ae. (Itẹ 3:27) Ovuẹ ofa o riẹ hẹ nọ u woma vi ovuẹ akpọ owoma evaọ otọ esuo Ọghẹnẹ nọ a rẹ vuẹ ahwo-akpọ. Otẹrọnọ who bi wobọ ziezi evaọ usiuwoma ota oke gheghe hayo ebe ifihọ ada, rekọ who bi wuhrẹ obe kugbe ohwo ọvo ho, kọ who gbe fi ei họ ute ra re who wo obe-uwuhrẹ Ebaibol jọ?
2. Eme ọ rẹ sai ru omai nọ ma gbe mu obe-uwuhrẹ Ebaibol họ họ?
2 Eva ẹsejọ, ẹbẹbẹ jọ nọ ọ mae rro nọ u re ru otu mai jọ nọ a gbe ru obe-uwuhrẹ Ebaibol ha họ oghẹrẹ iroro nọ a wo kpahe iẹe. Ahwo jọ a bi ru obe-uwuhrẹ Ebaibol ho fikinọ a roro nọ a te sai ru ei hi hayo fikinọ a wo uvẹ hẹ. Iroro nọ ma jẹ fihọ obotọ na e sai ti fiobọhọ k’owhẹ nọ whọ te sai ro wobọ evaọ eru obe-uwuhrẹ Ebaibol.—Mat. 28:19; Iruẹru 20:20.
3. Eme o ru omai te ahwo nọ a re wuhrẹ amọfa Ebaibol na?
3 Iroro ọ Mẹ Te He: Ẹsejọhọ fikinọ whọ riẹ obe tere he hayo fiki oware ofa jọ who roro nọ who te epanọ who re ro ru obe-uwuhrẹ Ebaibol kugbe ohwo ho. Ileleikristi ikpe-udhusoi ọsosuọ nọ e jẹ ta usiuwoma na a jọ ahwo nọ a kpohọ isukulu ikpehru hu nọ a rri fihọ ahwo gheghe. Eme o fiobọhọ kẹ ae wuhrẹ amọfa uzẹme na? “A lele Jesu gbẹjọ.” (Iruẹru 4:13) A wuhrẹ mi Owuhrẹ Ologbo na Jesu, ọnọ a kere iwuhrẹ gbe ona usiuwoma ota riẹ fihọ Ebaibol na kẹ omai. O tẹ make rrọ nọ who kpohọ isukulu tere he, uwuhrẹ kpahe Ọghẹnẹ gbe ẹjiroro riẹ nọ who bi wo ẹsikpobi evaọ ukoko na u vi uwuhrẹ ofa kpobi.—Aiz. 50:4; 2 Kọr. 3:5.
4. Eme ma rẹ sai wuhrẹ no oriruo Emọs ze?
4 Evaọ ẹsejọ, Jihova ọ rehọ eruẹaro rọ whọku isu hayo ahwo jọ nọ e rrọ ọkwa okpehru nọ e thuzi. Ahwo itieye na jọ, wọhọ Emọs, a jọ ahwo nọ a no iviuwou iruori ze. Emọs ọ ta nọ: “Mẹ rọ ọruẹaro ho, hayo ọmọ ọruẹaro gbe he; rekọ mẹ o thuru-erao, jegbe [ọruẹrẹ] ọgbọ-ire emakọ.” (Emọs 7:14) Ghele na, Emọs ọ siọ ovuẹ ẹdhoguo Jihova ba ewhowho kẹ Amazaya ozerẹ egagọ ọmọ-eruẹ na ha. (Emọs 7:16, 17) Ma rẹ kareghẹhọ ẹsikpobi inọ iruo Ọghẹnẹ ma bi ru na yọ o ti fiobọhọ k’omai te kẹ iruo nọ ọ k’omai na.—2 Tim. 3:17.
5. Fikieme u je fo nọ ma daoma re ma mu obe-uwuhrẹ Ebaibol họ kugbe ohwo jọ o tẹ make rrọ nọ eware e da omai abọ fia?
5 Uvẹ nọ O Riẹ Hẹ: O tẹ make rrọ nọ who re wo uvẹ tere he, ẹsejọhọ who fi oke họ nọ who re ro wobọ evaọ odibọgba na ẹsikpobi. Obe-uwuhrẹ Ebaibol nọ ma re ru kugbe ahwo yọ abọjọ odibọgba na nọ o rẹ kẹ omaweromẹ gaga. O rrọ uvẹ-ọghọ obọdẹ re ma ruẹ Ẹme Jihova nọ ọ be jọ oma ohwo nọ ma bi wuhrẹ obe kugbe ruiruo. (Hib. 4:12) Eva e rẹ were Jihova nọ ma te fi ewoma omobọ mai jọ họ akotọ re ma sai fiobọhọ kẹ ohwo jọ “te riẹ uzẹme na.” (1 Tim. 2:4) Makọ ikọ-odhiwu dede a rẹ ghọghọ nọ ohwo o te kurẹriẹ je bi wo ẹnyaharo abọ-ẹzi.—Luk 15:10.
6. Uvẹ-ọghọ vẹ ma wo nọ ma be rọ wha oreva Ọghẹnẹ haro?
6 O rrọ oreva Ọghẹnẹ “re ahwo kpobi a wo usiwo, re a ze te riẹ uzẹme na.” (1 Tim. 2:4) Uvẹ-ọghọ nọ ma wo nọ ma bi ro ruiruo lele oreva Ọghẹnẹ o rro kẹhẹ, nọ ma bi ro ru ebe-iwuhrẹ Ebaibol kugbe amọfa!