Rọ Aro Kele Eruẹaro Na—Emọs
1. Fikieme oriruo Emọs o sai ro fi obọ họ kẹ omai?
1 Kọ who re roro ẹsejọ nọ who te ohwo nọ ọ rẹ ta usiuwoma na ha fikinọ whọ riẹ obe tere he hayo fikinọ uviuwou ra u wo ugho tere he? O tẹ rrọ ere, oriruo Emọs u ti fi obọ họ kẹ owhẹ ta usiuwoma na. Emọs ọ jọ othuru-igodẹ, yọ ọ jẹ hai ru iruo ọwhẹrẹ emerae jọ evaọ ẹgbukpe. Ghele na, Jihova ọ rehọ e riẹ whowho ovuẹ jọ nọ u wuzou gaga. (Emọs 1:1; 7:14, 15) Epọvo na o rrọ nẹnẹ re, Jihova ọ rẹ rehọ ahwo nọ e roma kpotọ ru iruo riẹ. (1 Kọr. 1:27-29) Eme ọfa ma sai wuhrẹ mi Emọs ọruẹaro na nọ u re fi obọ họ kẹ omai ta usiuwoma na?
2. Fikieme ma re ro dikihẹ ga nọ a te bi kpokpo omai?
2 Dikihẹ Ga nọ A tẹ be Wọso Owhẹ: Amazaya yọ ozerẹ nọ ọ jẹ gọ ọmọ-eruẹ evaọ uvie erua ikpe Izrẹl. Nọ o yo eme eruẹaruẹ Emọs, o te do ku ọruẹaro na. O wọhọ ẹsenọ ọ jẹ ta kẹe nọ: ‘Kpohọ obọ uwou ra. Nya siọ omai ba. Ma wo egagọ mai.’ (Emọs 7:12, 13) Amazaya o ku eme nọ Emọs ọ ta rẹriẹ kẹ Jeroboam ovie na, re ọ ruẹse whaha iruo riẹ. (Emọs 7:7-11) Rekọ ozọ u mu Emọs ho. Evaọ oke mai na, isu egagọ a rẹ gwọlọ nọ egọmeti i fi obọ họ kẹ ae re a ruẹsi kpokpo Isẹri Jihova. Rekọ Jihova ọ kẹ omai imuẹro inọ ohwo ọvo ọ te sae whaha idibo riẹ kpobi usiuwoma ota ha.—Aiz. 54:17.
3. Eware vẹ ma be ta usiuwoma kpahe nẹnẹ?
3 Whowho Ẹdhoguo Jihova gbe Eghale nọ E Rrọ Obaro Tha: Dede nọ Emọs ọ ruẹaro kpahe ọraha nọ u ti te uvie erua ikpe Izrẹl, whọ rẹ jọ obọ ekuhọ obe Emọs na ruẹ nọ ọ ta kpahe eyaa Jihova inọ ọ te ghale ahwo riẹ, a vẹ te wariẹ bọ ẹwho na. (Emọs 9:13-15) Epọvo na nẹnẹ re, ma rẹ ta kpahe “ẹdẹ oziẹobro” Ọghẹnẹ nọ o be tha na, rekọ u te no onana no, ma rẹ jẹ ta kpahe eghale nọ “uvie na” o te wha ze. (2 Pita 3:7; Mat. 24:14) Nọ Jihova ọ tẹ raha ahwo oyoma no evaọ Amagẹdọn, o ve ti zihe akpọ na ruọ aparadase.—Ol. 37:34.
4. Ẹvẹ u ro mu omai ẹro nọ ma te sai ru oreva Jihova?
4 O rẹ sae jọ bẹbẹ kẹ omai re ma rọ egagọ Jihova karo je ru oreva riẹ evaọ akpọ nana nọ ahwo a be jọ wọso omai fiki usiuwoma ota na. (Jọn 15:19) Ghele na, ma riẹ nọ Jihova o ti fi obọ họ kẹ omai ru oreva riẹ wọhọ epanọ o fi obọ họ kẹ Emọs na.—2 Kọr. 3:5.