Ma rẹ Vuẹ Amọfa Kpahe Ẹruore Uvie Na
1 Evaọ edẹ urere ebẹbẹ nana, ahwo buobu a rrọ ababọ ẹruore. (Ẹf. 2:12) Amọfa a rọ ẹro so ekwakwa efe, isu akpọ na, iwuhrẹ egbaeriariẹ ọgbọna, gbe eware efa. Eva e be were omai inọ ma wo uvi ẹruore kẹ obaro na, ẹruore nọ o muẹro “nọ u kie omai uduvi.”—Hib. 6:19.
2 Evaọ otọ esuo Uvie Ọghẹnẹ, akpọ na o ti zihe ruọ aparadase. A te kpare ahwo nọ a whu no ziọ uzuazọ. (Iruẹru 24:15) Uvuhu, okienyẹ, ẹyao, owho, gbe uwhu e gbẹ te jọ họ. (Ol. 9:18; Mat. 12:20, 21; Evia. 21:3, 4) Enana yọ eyaa Jihova jọ nọ i ti rugba kẹle. Evaọ usu eware nọ ma wo ẹruore kpahe na, ovẹ whọ be mai rẹro riẹ?
3 Whowho Emamọ Usi: Mai ọvo ma rẹ riẹ kpahe ẹruore Uvie na ha. Uyoyou kẹ Ọghẹnẹ gbe erivẹ mai o rẹ w’omai rọ aro kele Jesu, ma vẹ ‘vuẹ ovuẹ emamọ usi na kẹ iruori, . . . woro obusino kẹ enọ a mu jegbe ude oruẹ kẹ ituaro, je fiobọhọ kẹ enọ a kienyẹ wo omofọwẹ.’ (Luk 4:18) Pọl ukọ na o whowho emamọ usi na evaọ eki gbe oria kpobi nọ ọ jọ ruẹ ahwo. Ọ rehọ oma riẹ kpobi kẹ iruo odibọgba na. (Iruẹru 18:5) Ma tẹ be rọ aro kele oriruo ajọwha riẹ evaọ odibọgba na u ti fiobọhọ k’omai nọ “awa akpọ na, gbe eviẹhọ efe” i gbe ti gbe ẹruore mai hotọ họ.—Mak 4:19.
4 Nọ ma tẹ nyaku ahwo nọ a dhesẹ isiuru kpahe ovuẹ na ha, hayo ahwo nọ a wọso omai, o rẹ lẹliẹ ẹruore mai kpahe Uvie na whrehe he. Ma rẹ ‘ruabọhọ ewhowhovia ẹruore mai na whawha ababọ enuho.’ (Hib. 10:23) Ma be “vuọoma usiuwoma na ha.” (Rom 1:16) Ẹsejọhọ imuẹro egaga gbe akothiho mai nọ a be ruẹ o te wọ ahwo jọ gaviezọ.
5 Dede nọ u fo re ma ta ẹme te uyero akpọ nọ u bi dhe eyeyoma nọ u bi ru eruẹaruẹ Ebaibol gba, orọnikọ mai yọ enọ e be wha ovuẹ okpẹtu hu. Ukpoye, odibọgba mai o tẹrovi ẹruore Uvie na—emamọ usi orọ Uvie Ọghẹnẹ. Joma whowho emamọ usi nana avọ imuẹro gbe ajọwha re ma ruẹse yọrọ ‘ẹruore na rite urere.’—Hib. 6:11.