Ẹvẹ Ma Sai ro Fi Obọ họ kẹ Ahwo nọ E Ziọ Ekareghẹhọ Na?
1. Eme ahwo a ti yo jẹ rọ ẹro ruẹ evaọ March 22, 2008?
1 Evaọ March 22, 2008, ima ahwo buobu wariẹ akpọ na họ a ti yo ovuẹ obọdẹ jọ jẹ rọ ẹro ruẹ oware obọdẹ jọ. Ahwo nọ a te ziọ Ekareghẹhọ na a ti yo kpahe uyoyou ulogbo Jihova nọ o dhesẹ ẹkwoma ọmọ riẹ nọ o siobọno rọ ta ahwo-akpọ no igbo. (Jọn 3:16) A ti wuhrẹ kpahe Uvie na, gbe epanọ Jihova ọ te rọ rehọ iẹe ru ẹjiroro riẹ kẹ otọakpọ na gba. (Mat. 6:9, 10) A te rọ ẹro ruẹ uyoyou gbe okugbe ọrọ ahwo Ọghẹnẹ jẹ ruẹ uruemu ọrara odederehọ mai.—Ol. 133:1.
2. Ẹvẹ ma sai ro fi obọ họ kẹ emọ-uwuhrẹ Ebaibol nọ e ziọ Ekareghẹhọ na?
2 Emọ-Uwuhrẹ Ebaibol: Ahwo jọ nọ e te jariẹ na yọ ahwo nọ ma mu Ebaibol na họ ewuhrẹ kugbe obọ. Dhesẹ ai kẹ inievo na. Ta kẹ ae kpahe iwuhrẹ sa-sa nọ ma re ru evaọ ẹkpoka na, jẹ rehọ ae nya Ọgwa Uvie na wariẹ. Evaọ etoke ovuẹ na, ọkovuẹ na ọ te tuduhọ ahwo otiọye na awọ inọ a daoma nyaharo evaọ ewuhrẹ kpahe Ọghẹnẹ re a sai ru usu rai kugbei ga. Whọ sae rọ eme riẹ na jọ ro mu ẹme họ rọ ta udu họ emọ-uwuhrẹ ra awọ.
3. Eme ma rẹ sai ru rọ tuduhọ enọ e siọ iruo Uvie ba no nọ e ziọ Ekareghẹhọ na?
3 Enọ E Siọ Iruo Uvie ba No: Ejọ nọ e te nyaze na yọ iwhowho-uvie nọ e siọ iruo Uvie na ba no. Daoma yere ae sasasa. Rekọ whọ nọ ae enọ rọ kiẹ kabọ kabọ uzuazọ rai kpobi riwi hi hayo ta oghẹrẹ eme nọ i re kpomovuọ họ ae oma ha. A te ru Ekareghẹhọ na no, ekpako na a re weze bru enọ e siọ iruo Uvie ba no nọ e ziọ Ekareghẹhọ na, yere ai kẹ epanọ a rọ daoma nyaze, je zizie ai kẹ iwuhrẹ ukoko.
4. Ẹvẹ mai omomọvo ọ sai ro fi obọ họ kẹ amọfa nọ e nyaze?
4 Amọfa: Ejọ nọ e te jariẹ na a sae jọ egbẹrioma mai hayo imoni mai nọ mai ọvo ma zizie. Efa e sae jọ enọ ma zizie evaọ etoke usi-uwhowho obọdẹ na. Whọ tẹ ruẹ ahwo nọ whọ riẹ hẹ, nyabru ae who dede ae rehọ je dhesẹ oma ra kẹ ae. O sae jọ nọ a re ziọ iwuhrẹ mai ẹdẹvo ho. Lele ae tẹme re whọ riẹ epanọ whọ sai ro te ai oma. Who te weze bru ae hayo rọ ifonu se ae nọ emedẹ jọ e tẹ vrẹ nọ a ro ru Ekareghẹhọ na no, whọ sae rọ ere tuduhọ ai awọ jẹ tuọ obe-uwuhrẹ họ.
5. Eme ma rẹ sae ta ro mu obe-uwuhrẹ họ?
5 Ma sae rọ eme nọ a te jọ ovuẹ Ekareghẹhọ na ta ro mu ẹme họ ro dhesẹ obe Ebaibol Wuhrẹ na kẹ ohwo evaọ ozihebro. Wọhọ oriruo, ọkovuẹ na o ti se Aizaya 65:21-23. Evaọ oke ozihebro na, whọ sai si iroro ohwo kpohọ ovuẹ Ekareghẹhọ na jẹ tanọ, “Jọ me dhesẹ eghale efa nọ ẹtanigbo na o ru lọhọ k’owhẹ.” Kẹsena whọ vẹ tẹme kpahe ẹwẹ-obe avọ 4-5 erọ obe Ebaibol Wuhrẹ na. Hayo whọ sae tanọ, “Ahwo buobu a be hae nọ inọ, ‘Okevẹ ma te rọ ruẹ orugba eruẹaruẹ Aizaya na?’” Kẹsena whọ vẹ ta kpahe edhẹ-ẹme 1-3 evaọ uzou avọ 9. Edhere ọfa nọ ma sae rọ tuọ obe-uwuhrẹ Ebaibol họ họ, ma rẹ sae fodẹ eme jọ nọ ọkovuẹ Ekareghẹhọ na ọ ta, dhesẹ obe Ebaibol Wuhrẹ na kẹ ohwo na, je dhesẹ epanọ a re ru uwuhrẹ na.
6. Nọ ma bi yoẹme kẹ ujaje Jesu inọ ma kareghẹhọ uwhu riẹ na, didi uvẹ u rovie fihọ kẹ omai?
6 Jọ mai kpobi ma daoma gwọlọ edhere nọ ma re ro fi obọ họ kẹ emọ-uwuhrẹ Ebaibol, ahwo nọ a siọ iruo Uvie ba no, gbe amọfa nọ e te ziọ Ekareghẹhọ na. (Luk 22:19) Ababọ avro, Jihova ọ te ghale omodawọ mai kpobi evaọ odibọgba na.