Ebabọ Eria Egagọ nọ A Ru Lọhọ E Be Wha Ujiro se Jihova
1, 2. (a) Owọ vẹ idibo Ọghẹnẹ a jẹ no re a sae rẹrote ẹvi nọ a bi wo evaọ edẹ urere nana? (b) Enọ vẹ ma re roro kpahe evaọ ẹme nana?
1 Ẹvi ologbo nọ ọ rrọ ukoko Jihova evaọ edẹ ivuẹvu enana o wha riẹ ze no nọ ahwo Jihova a bi ro bru obọ kpotọ evaọ eware buobu. Anwọ ikpe jọ ze na, ma ru eware lọhọ no evaọ abọ ebe-ikere gbe efihọ-ada rai, ọruẹrẹfihotọ ikokohọ, gbe araha igho kẹ eria egagọ mai re ma sae rẹrote ẹvi nana nọ a ruẹaro riẹ na. (Aiz. 54:1-4; 60:22) Epọvo na re, ma ru inwene no re evaọ ebabọ gbe eroruiruo eria egagọ mai re ma sae nyate ẹgwọlọ na.
2 Anwọ ikpe jọ ze na, ma jọ Nigeria bọ Egwa Uvie ekpokpọ buobu no, gbe eria ikokohọ nọ i bu vi udhegbene (Egwa Uvie nọ a rẹ sae jọ ru ikokohọ gbe Egwa Okokohọ dẹẹ.) Ẹvẹ eware nọ ma ru lọhọ i ro fiobọhọ k’omai sai ru onana no? Oghẹrẹ vẹ ma ro ru eware lọhọ evaọ ebabọ eria egagọ mai enana? Eme ma rẹ sai ru rọ tha ọruẹrẹfihotọ nana uke?
Eria Egagọ nọ A Ru Lọhọ
3. Eware sa-sa vẹ a ru lọhọ no evaọ Egwa Uvie?
3 Egwa Uvie: Ẹjiroro nọ a rọ to ọruẹrẹfihotọ ebabọ Egwa Uvie evaọ ekwotọ nọ a jo wo ugho tere he họ, re a sae bọ Egwa Uvie fihọ eria nana nọ ẹgwọlọ na ọ jẹ rrọ gaga na, yọ Nigeria ọ rrọ usu erẹwho yena. Re a sae bọ Egwa Uvie buobu, ukoko na o kẹ omaa oghẹrẹ nọ a rẹ bọ iwou na gbe oghẹrẹ eware nọ a re ru họ ai. Usu eware jọ nọ ma ruẹ nọ a ru lọhọ no evaọ Egwa Uvie nọ a be bọ evaọ Nigeria họ, ekpala nọ a rẹ keria, eria nọ a je kuame, a gbẹ be rọ ọda ralọ iwou na jọ họ, i gbe bi wo oria nọ ohwo nọ ọ rẹ rẹrote Ọgwa Uvie ọ rẹ rria ha, a be rọ isimeti ru otọ rai gheghe, a gbẹ be rọ eblọko di ogba wariẹ ejọ họ họ yọ a gbe bi fi isilini họ ejọ họ. Ikoko nọ i bu vrẹ 3,000 evaọ Nigeria a bi ru iwuhrẹ evaọ egwa itieye nọ a ru onaa họ tere he rekọ yọ e rrọ kpatiẹ ghele na.
4. Ẹvẹ whọ rẹ sai dhesẹ Egwa Uvie nọ a rẹ sae jọ ru ikokohọ, kọ eme a jarai ru lọhọ?
4 Egwa Uvie nọ A rẹ Sae Jọ Ru Ikokohọ: Idibo Ọghẹnẹ a be hai kuomagbe isiasa ẹgbukpe evaọ ikokohọ. Evaọ ofẹ jọ Nigeria, ugbo nọ inievo jọ i re no ze kpohọ ikokohọ u thabọ gaga. Evaọ eria jọ, inievo jọ a rẹ fa ame vrẹ re a tẹ sai te eria ikokohọ na. Re u fi obọ họ kẹ inievo itieye na, ma bọ Egwa Uvie nọ a rẹ sae jọ ru ikokohọ fihọ eria sa-sa no. Egwa itieye na i wo eplatfọmo nọ i kpehru tere he, ofẹ nọ ogbotu na ọ rẹ keria evaọ etoke okokohọ i wo igbẹhẹ hẹ, otọ egwa na i ku whrẹrẹ hẹ, yọ ekpala nọ i wo oria nọ a rẹ rọ oma rẹrẹ hẹ a rẹ keria nọ a te bi ru okokohọ. Fikinọ egwa nana e rro tere he, o soriẹ ze nọ a be hae rọ ghale ikogho jọ fihọ eko sa-sa kẹ ikokohọ rai.
5. (a) Edhere vẹ a bi ro ru eware lọhọ evaọ ebabọ Egwa Okokohọ? (b) Ọkpọvio vẹ a bi lele evaọ ebabọ iwou nọ a re wohọ?
5 Egwa Okokohọ: Nọ ikogho i te bu te epanọ a re ro wo ọgwa okokohọ, uwou ogha o rẹ jẹ iroro epanọ a rẹ rọ bọ ọgwa okokohọ fihọ oria na. Egwa Okokohọ jọ nọ ma bọ re vẹre he, ma be bọ ae reno enẹna, ma tẹ jẹ be bọ ekpokpọ jọ nọ ma bi ru onaa họ tere he. Enana yọ egwa nọ i wo igbẹhẹ hẹ, nọ otọ rai o whrẹrẹ tere he, avọ umutho ifisi jọ, gbe eria ame-okuo nọ a re kieviẹ jo ne nọ ohwo na ọvo ọ jẹ rọ obọriẹ ku ame fihọ rọ wozẹ isọ na vrẹ. U te no ere no, ẹsejọ ma rẹ bọ uwou ovo hayo ivẹ nọ a re wohọ, rekọ evaọ eria nọ iwou e rẹ jọ bẹ ẹgwọlọ ọvo ma je bi ru onana. Iwou nana yọ iwou nọ ma ru onaa họ tere he keme ma be rọ isimeti ralọ igbẹhẹ rai hi, yọ ma bi ru onaa họ otọ rai tere gbe he. Orọnikọ iwou nana e rrọ kẹ ahwo kpobi nọ a be ziọ okokohọ evaọ etẹe he, rekọ e rrọ kẹ enọ i gine wo ẹgwọlọ gaga ọvo. Evaọ ẹsejọ nọ iwou nana i gbe te ahwo nana wohọ họ, ẹko-iruo uwou na a rẹ gwọlọ iwou efa mi ahwo, ehọtẹle, isukulu, gbe eria efa.
Eware nọ A bi Ru Lọhọ na O be Wha Emamọ Iyẹrẹ Ze
6. Eme ebabọ eria egagọ mai nọ ma bi ru lọhọ na o be wha ze?
6 Eme o no eware nọ a bi ru lọhọ na ze no? U bi ru ei lọhọ nọ ukoko na o be sae rọ rehọ igho nọ ma wo rọ rẹrote eware buobu nọ i wuzou. U ru nọ inievo buobu a ro wo emamọ eria nọ a be jọ ru iwuhrẹ enẹna. (2 Kọr. 8:10-15) Fikinọ a be rọ ekwakwa okegbe na nọ ahwo buobu a riẹ ro ru iruo ebabọ na, o wha riẹ ze no nọ ahwo buobu a be sai ro wobọ evaọ ebabọ na, nọ u bi ru iruo na vẹrẹ gaga. Fikinọ a bi ru enaa buobu fihọ ae he, ẹruorote egwa nana o gbẹ be bẹ tere he, u bi ru ei lọhọ kẹ ikoko gbe ikogho nọ e be rehọ egwa na ruiruo re a sae rẹrote ai.—Gal. 6:5; Fil. 1:10.
7, 8. Kọ Jihova ọ be ghale omodawọ mai nọ ma bi ro ru eware lọhọ na? Kẹ oriruo.
7 U gine mu omai ẹro inọ Jihova ọ be ghale ọruẹrẹfihotọ ọrọ eru lọhọ ebabọ eria egagọ mai na. Anwẹnọ ma ro mu ọruẹrẹfihotọ nana họ evaọ November 1999, rite ekuhọ March 2008, ma bọ Egwa Uvie 16,992 no evaọ ekwotọ 114. Evaọ usu enana erọ Nigeria i bu te 2,011. Evaọ etoke ọvo yena, ma jọ Nigeria bọ eria okokohọ 25 no—ejọ Egwa Uvie nọ a rẹ sae jọ ru ikokohọ gbe Egwa Okokohọ dẹẹ. Enana kpobi i ru odẹ Jihova gbe usi Uvie riẹ do te ahwo buobu oma no.
8 Nọ a jẹ bọ Ọgwa Uvie jọ evaọ Delta State, iwhowho-uvie buobu a kare iwou eki rai a tẹ fialọ oma via kẹ iruo na. Ẹdẹjọ nọ a ku iruo họ no, ohwo jọ nọ o wo isiuru kpahe ukoko na nọ ọ ziọ iruo na ọ ta nọ: “Egagọ rai họ egagọ uzẹme na. O te were omẹ re mẹ jọ omọvo egagọ rai na.” O te mu ẹnyaharo họ ewo evaọ uwuhrẹ riẹ, u kri hi o te te owhowho-uvie nọ ọ re họ-ame he. Evaọ Akwa Ibom State, nọ osu ẹwho jọ nọ a be bọ Ọgwa Uvie fihọ o yo nọ a ku ibitho nọ a be rọ bọ Ọgwa Uvie na fihọ ugbo fiki edhere nọ o yoma, o te woro uzi kẹ ẹwho na soso re a ruẹrẹ edhere na oka soso. A tẹ rọ ibro eblọko ro di egọdọ nọ e jọ edhere na kpobi. Ofariẹ, ọ kẹ aye gbe ọmọ riẹ uvẹ re a kpohọ iwuhrẹ mai. Ọ ta nọ: “Eva e be were omẹ gaga inọ oware utiona o be via evaọ ẹwho mẹ.”
Tha Ọruẹrẹfihotọ Eria Egagọ nọ A Ru Lọhọ Uke
9. Idhere esa vẹ ma rẹ rọ tha eria egagọ mai uke?
9 Wọhọ ahwo Jihova, ma gwọlọ rehọ eva mai kpobi tha ọruẹrẹfihotọ nana uke. Ma rri eria egagọ mai nọ a be rọ odẹ Jihova se ghaghae. Ma gwọlọ gbabọkẹ iwou nana re i si adhẹẹ no egagọ mai hi. Fikiere, eme ma re ru? Ma sai wobọ evaọ (1) ẹruorote rai, (2) jarai ru eware nọ a rọ fiki riẹ bọ ai, gbe (3) unevaze nọ ma re ru kẹ eroruiruo gbe ẹruorote rai. Wọhọ ezae ẹrọwọ anwae, ma gwọlọ ru wọhọ epanọ a vuẹ omai na.—Emu. 6:22; Ọny. 7:6.
10. Idhere vẹ ma sai ro wobọ evaọ ẹruorote eria egagọ mai?
10 Ẹruorote: Uwou kpobi o gwọlọ ẹruorote, yọ o gwọlọ ugho re a sae rẹrote uwou. Re a sai ru onana, o gwọlọ azọhọ unevaze gbe iruiruo nọ e rẹ fialọ oma via. O rrọ uvẹ-ọghọ re ohwo o wobọ evaọ abọ ivẹ na. Re a rẹrote Ọgwa Uvie na, ekpako ukoko a re wo omaa kẹ iruo ẹruorote ẹsikpobi. Onana o kẹre te ewhere ọgwa na nọ ewuhrẹ kpobi ọ tẹ fa no, orufuọ ọgwa na ẹsiẹvo amara, ẹbe-ofio, eflawa nọ a rẹ gbẹre kpatiẹ, gbe ẹsejọ iruo ilogbo wọhọ ọwariẹ-ralọ uwou na gbe aruẹrẹ efa. Re a rẹrote Egwa Okokohọ, noke t’oke, a re zizie ikogho hayo ikoko sa-sa re a fiobọhọ evaọ orufuọ gbe iruo ẹruorote. Ẹsejọ, a rẹ gwọlọ obufihọ enọ i wo onaa-iruo jọ, wọhọ enọ i re ru ekpọ-ame fihọ iwou, ikpẹ-ẹlẹtriki, ebọ-iwou, ekapenta gbe akọ-iruo efa re a rẹrote eware nana nọ e rrọ ọgwa na. Ma rẹ sae tha eria nana uke ẹkwoma unevaze nọ ma rẹ rọ fialọ oma via ma vẹ rọ onaa-iruo mai fiobọhọ oke-kpobi nọ a se omai kẹ iruo evaọ Ọgwa Uvie hayo Ọgwa Okokohọ.—Ol. 110:3.
11. Ẹvẹ ma sai ro dhesẹ adhẹẹ kẹ eria egagọ mai nọ ma te kpohọ iwuhrẹ gbe ikokohọ?
11 Rehọ Ae Ru Iruo avọ Areghẹ: Ma gwọlọ rehọ eria egagọ mai ru oware nọ a rọ fiki riẹ bọ ae. Onana u dhesẹ nọ ma re ru eware evaọ edhere nọ o re dhesẹ adhẹẹ gbe ovuhumuo kẹ eware abọ-ẹzi. (1 Kọr. 10:31) Wọhọ oriruo, ma gbẹ rọ oria ame-okuo ruiruo evaọ edhere nọ u fo ho, o sae wha araha ologbo ze. Ma tẹ be raha ame kufiẹ, o sae whae ze nọ amọfa a gbẹ ruẹ ame ro ruiruo ho yọ ma be rọ ere raha igho ukoko na kufiẹ. Istovu nọ i bi kuye iwiri hayo ire nọ a re ro there ẹbẹ evaọ uwou ẹbẹ-othere nọ o rrọ ogege na o sae lẹliẹe mu iwiri. U wuzou re ma nya lele ithubro nọ a kẹ kpahe oghẹrẹ nọ ma rẹ rọ eria enana ruiruo. Ma rẹ rehọ eware kpobi nọ a ru fihọ eria egagọ mai, te ifisi nọ e rrọ Egwa Okokohọ, ro ruiruo lele ẹjiroro nọ a ro ru ai. Fikinọ ọmọ jọ o fi oware nọ u fo ho họ oria nọ a re ne fihọ eva Ọgwa Okokohọ jọ, o wha araha-ugho buobu ze. Fikiere, ebe ame-okuo nọ a re se etọlẹt-rolu gbe ame ọvo a re ro ruiruo evaọ oria ame-okuo na re o siọ ighogho ekpọ na ba e di no. Eware ẹlẹtriki obọmai, te ifonu nọ ma re dhehọ ekwakwa ẹlẹtriki eva Ọgwa Okokohọ hayo Egwa Uvie, o sae wha ẹbẹbẹ ze jẹ lẹliẹ owha na gbẹdẹ hrọ kẹ ekwakwa ẹlẹtriki na. A rehọ eria egagọ mai mudhe kẹ Jihova no, fikiere, egagọ Jihova ọvo e rrọ kẹ. Ajọ uvumọ ohwo ọ rehọ uvẹ nọ o ro kpohọ iwuhrẹ hayo okokohọ ro le okọ riẹ hayo ta kpahe ekiọthuọ obọriẹ hẹ. Ma rẹ daoma kpobi re uruemu mai gbe orọ emọ mai evaọ eria enana o wha emamọ odẹ se egagọ uzẹme.
12. Ẹvẹ ma be sai ro wo ugho rọ rẹrote araha nọ o kpomahọ eria egagọ mai? (Rri ẹkpẹti nọ ọ rrọ ẹwẹ-obe avọ 5 gbe ọrọ obotọ na.)
12 Eru Unevaze: Re ma sai wo ugho rọ rẹrote araha sa-sa evaọ ikoko mai gbe ẹruorote Ọgwa Uvie na, ma re ru unevaze fihọ etehe-unevaze nọ a kere “Local Congregation Expenses” (“Araha Ukoko Mai”) fihọ eva Ọgwa Uvie na. Evaọ eria okokohọ, re ma sae rẹrote araha sa-sa gbe ẹruorote ọgwa na, ma re ru unevaze fihọ itehe-unevaze nọ a fihọ eria sa-sa evaọ oria okokohọ na nọ ma te kpohọ ikokohọ okogho gbe erọ obọdẹ. (Rri ẹkpẹti nọ ọ rrọ ẹwẹ-obe avọ 5 gbe ọnọ ọ rrọ obotọ na rọkẹ oruvẹ kpahe unevaze nọ ma re ru fiki eria egagọ mai.) Ẹvẹ ma re rri onana? U fo nọ ma rri rie wọhọ abọjọ egagọ mai kẹ Jihova.—Itẹ 3:9, 10; 2 Kọr. 9:7.
13, 14. Ẹvẹ mai kpobi gbe omomọvo ọ sai ro dhesẹ nọ ma be tha ọruẹrẹfihotọ nọ a bi ro ru eria egagọ mai lọhọ na uke gbe nọ u kiehọ omai oma?
13 Evaọ ẹme unevaze kẹ eroruiruo gbe ẹruorote ọrọ eria egagọ mai, ma gwọlọ si oma kpemu hayo “jẹ uwou Ọghẹnẹ mai kufiẹ” hẹ. Unevaze mai yọ oka ovuhumuo mai gbe nọ o rrọ isiuru mai re amọfa a wo erere no ọruẹrẹfihotọ nana ze re. (2 Irv. 15:7; Neh. 10:32, 39b) A tẹ ruẹ nọ otọ nọ ma wo u kiehọ kẹ oria nọ a rẹ bọ uwou egagọ mai fihọ họ, a rẹ zẹe, a vẹ rehọ ugho na kugbe ro ru iruo ebabọ nọ a be jọ akpọ-soso ru na. Dede nọ Egwa Uvie nọ e rrọ ruaro, nọ a ru onaa họ ziezi ahwo jọ a rẹ gwọlọ, jọ onọ a bọ kẹ omai o da omai ẹro, keme a roro kpahe uyero oria nọ a bọ Ọgwa Uvie na fihọ na taure a tẹ te bọe. (2 Kọr. 8:14, 15) Nọ oware jọ o tẹ nwane raha, wha rẹ ruẹrẹ iẹe ababọ oke oraha taure ebẹbẹ efa e tẹ te romavia.
14 Oke nọ u wuzou gaga ma rrọ na, nọ ahwo Ọghẹnẹ a bi jo dhesẹ ajọwha ologbo. Wha te ru lele eware nọ ma ta evaọ uko-obeva nana, u mu omai ẹro inọ unevaze nọ wha be rọ rehọ oma rai, onaa-iruo rai, azọhọ unevaze rai rọ tha ọruẹrẹfihotọ nana uke, jẹ be rehọ eria egagọ mai nọ a ru lọhọ rekiyọ i wo ọghọ na ru iruo avọ areghẹ, u ti dhesẹ ẹsikpobi inọ u no omai eva ze re ma nya lele ukoko Jihova.—Filim. 21.
[Etehe nọ e rrọ ẹwẹ-obe avọ 5]
UNEVAZE KẸ EGWA UVIE
◼ Rọkẹ Ẹbọ Ọgwa Uvie Evaọ Obaro: Ikoko nọ e be ma omaa nọ a rẹ bọ Ọgwa Uvie a sai ru ọtamuo unuigho nọ a rẹ hai kokohọ. A re ru unevaze nana fihọ etehe-unevaze nọ a kere “Local Congregation Expenses” fihọ eva Ọgwa Uvie na. A rẹ rehọ Contribution Remittance Form (S-20) ro vi igho nana kpobọ uwou ogha eva urere amara kpobi.
◼ Rọkẹ Eroruiruo Ọgwa Uvie: Ukoko kpobi nọ a bọ Ọgwa Uvie kẹ no u re ru ọtamuo unuigho nọ a rẹ hai vi kpohọ uwou ogha rọkẹ eroruiruo ọgwa na. A re ru unevaze nana fihọ etehe-unevaze nọ a kere “Local Congregation Expenses” fihọ eva Ọgwa Uvie na. A rẹ rehọ Contribution Remittance Form (S-20) ro vi igho nana kpobọ uwou ogha eva urere amara kpobi.
◼ Rọkẹ Ọruẹrẹfihotọ Obufihọ Ọgwa Uvie: Ikoko kpobi nọ i wo Ọgwa Uvie a re ru ọtamuo unuigho nọ a re ro ru unevaze kamara kamara kẹ ọruẹrẹfihotọ nana nọ o rẹ lẹliẹ ai wo ugho h’obọ nọ a sae rọ dhogbo ariẹsehe oware jọ evaọ Ọgwa Uvie na o wha omonwa idudhe se ohwo jọ. A re ru unevaze nana fihọ etehe-unevaze nọ a kere “Local Congregation Expenses” fihọ eva Ọgwa Uvie na. A rẹ rehọ Contribution Remittance Form (S-20) ro vi igho nana kpobọ uwou ogha eva kamara kamara hayo kukpe kukpe.
◼ Rọkẹ Araha-Ugho nọ U Kpomahọ Ọgwa Uvie: Ukoko kpobi nọ u wo Ọgwa Uvie u wo owha-iruo ẹruorote Ọgwa Uvie rai, te iruo esese gbe ilogbo. Kukpe kukpe ugboma ekpako na a rẹ jiroro unuigho nọ a roro nọ ukoko na o sai ro ru unevaze kamara kamara kẹ ẹruorote na, a ve whowho iei kẹ ukoko na. A re ru unevaze nana fihọ etehe-unevaze nọ a kere “Local Congregation Expenses” fihọ eva Ọgwa Uvie na. A tuduhọ ikoko kpobi awọ no re a wo ẹkpa-ugho evaọ ebanke kẹ ẹjiroro nana. Hayo, a sae hae rehọ igho na kẹ uwou ogha kru evaọ otọ ọruẹrẹfihotọ congregation deposit.
◼ Rọkẹ Ebabọ Egwa Uvie Akpọ-Soso: Onana yọ unevaze nọ a rẹ rọ tha ọruẹrẹfihotọ ebabọ Egwa Uvie evaọ orẹwho mai gbe erẹwho efa uke. A re ru unevaze nana fihọ etehe-unevaze nọ a kere “Rọkẹ Ebabọ Egwa Uvie Akpọ-Soso” (“Kingdom Hall Construction Worldwide”) fihọ, yọ a re vi igho nana kpobọ uwou ogha kamara kamara. Ukoko kpobi u wo uvẹ-ọghọ nọ a re ro ru unevaze nana, o tẹ make rọnọ a muọ Ọgwa Uvie rai họ ẹbọ no. Orọnikọ ẹkpẹti nana ọ rrọ kẹ ọtamuo nọ wha ru fiki eroruiruo Ọgwa Uvie rai hi, rekọ o rrọ kẹ ọruẹrẹfihotọ ebabọ Egwa Uvie akpọ-soso.
[Etehe nọ e rrọ ẹwẹ-obe avọ 6]
UNEVAZE KẸ ERIA OKOKOHỌ
◼ Rọkẹ Eroruiruo Ọgwa Okokohọ: Ikoko kpobi a re ru ọtamuo unuigho nọ a re ro ru unevaze nọ a re vi kpobọ uwou ogha kẹ eroruiruo Ọgwa Okokohọ, hayo Ọgwa Uvie nọ a sae jọ ru ikokohọ. A re ru unevaze nana fihọ etehe-unevaze nọ a kere “Local Congregation Expenses” fihọ eva Ọgwa Uvie na. A rẹ rehọ Contribution Remittance Form (S-20) ro vi igho nana kpobọ uwou ogha eva urere amara kpobi. Unevaze kpobi nọ a ru fihọ itehe-unevaze evaọ ikokohọ ilogbo i re kpohọ ẹkpa-ugho iruo akpọ-soso na, nọ u kugbe igho nọ a be rọ bọ Egwa Okokohọ gbe Egwa Uvie.
◼ Rọkẹ Araha-Igho Sa-sa Evaọ Oria Okokohọ: Ikogho nọ e be jọ oria okokohọ ru ikokohọ ae a rẹ rọ igho ze kẹ ẹruorote oria okokohọ na, nya lele omaa ẹgbukpe nọ a ru. Omomọvo ọ sai ru unevaze fihọ itehe-unevaze nọ e rrọ oria okokohọ na kẹ araha nana nọ a te kpohọ ikokohọ okogho gbe erọ obọdẹ. Nọ ẹgwọlọ jọ ọ tẹ romavia, ma rehọ iẹe nọ ugho nọ ikogho nọ e be jọ oria okokohọ na ru ekokohọ a ro ru unevaze kẹ ẹruorote u te ru araha na ha, ọsẹro okogho na ọ rẹ vuẹ se ikoko na kpobi re a ru unevaze kẹ araha otiọye na.—Rri od-IS, ẹwẹ-obe avọ 130.
[Uwoho nọ e rrọ ẹwẹ-obe avọ 3]
Ọgwa Uvie nọ A Sae Jọ Ru Ikokohọ, Kaduna
[Uwoho nọ e rrọ ẹwẹ-obe avọ 4]
Ọgwa Uvie, Mayowa
[Uwoho nọ e rrọ ẹwẹ-obe avọ 5]
Ọgwa Okokohọ, Benin City