Ruẹrẹ Oma Kpahe Ziezi kẹ Ekareghẹhọ Na
O rrọ oware evawere gbe uvẹ-ọghọ re mai Ileleikristi ma ruẹrẹ oma kpahe ziezi kẹ aso nọ ma ti ru ekareghẹhọ uwhu Jesu Kristi na. (Luk 22:19) Ugogo eware vẹ ma re ru rọ ruẹrẹ oma kpahe kẹ Ekareghẹhọ na?
◼ Oke gbe Oria: U fo re ohwo kpobi ọ riẹ oke gbe ugogo oria nọ a ti jo ru Ekareghẹhọ na. Otẹrọnọ ikoko nọ e te jọ Ọgwa Uvie ru Ekareghẹhọ na i bu vrẹ ọvo, o r’oja re ukoko nọ o te kaki ru na u muhọ evaọ oke nọ a fihọ na, jẹ kaki no Ọgwa na nọ a te kuhọ no fiki ukoko ofa nọ o be te jariẹ ru na, re ọruẹrẹfihotọ na kpobi ọ sae nya kpatiẹ. Wha daoma ru re unuẹthẹ, edhere owotọ, gbe oria nọ a rẹ dhẹ imoto fihọ e seba ẹkeke hrọ.
◼ Emebe-Uzizie: Kọ iwhowho-uvie kpobi a wo emebe-uzizie na, kọ a riẹ eme nọ e riẹ eva? Kọ who wuhrẹ oghẹrẹ nọ whọ te rọ rehọ iẹe zizie ahwo no? Amono who ti zizie? Wha daoma ziezi re wha rehọ emebe-uzizie kpobi nọ wha wo ro zizie ahwo.
◼ Ẹwọ Ahwo Kpohọ Oria na gbe Ẹwọ Zihe-Kpo Rai: O sae jọ nọ ahwo jọ nọ a wo isiuru gbe inievo Ileleikristi mai jọ a te gwọlọ obufihọ epanọ a re ro te oria Ekareghẹhọ na hayo oghẹrẹ obufihọ ọfa. Kọ wha ru ọruẹrẹfihotọ jọ no re wha fi obọ họ kẹ ahwo nana?
◼ Ebrẹdi gbe Udi: A rẹ wọ ebrẹdi gbe udi na bẹsenọ ọre o re kie diwi no ho. A re ru ọruẹrẹfihotọ re a wọ ebrẹdi gbe udi na se ọnọ a wholo kpobi nọ ọ sae nyaze he fikinọ oma riẹ o ga ha. A re wo oghẹrẹ ebrẹdi gbe udi nọ a gwọlọ na te obọ, a vẹ jẹ ruẹrẹ ae kpahe taure a te ti muhọ.—Rri Uwou-Eroro ọ March 1, 2003, ẹwẹ-obe avọ 10-11, edhe-ẹme avọ 14, 17.
◼ Ọgwa Uvie: A re ru ọgwa na fo tẹtẹtẹ evaọ ẹruoke. A rẹ kake wha imidhe, eglase, gbe emẹjẹ avọ ohọ-emẹjẹ nọ u kiehọ ze ọgwa na, a vẹ jẹ kake ruẹrẹ ae họ oria rai. Otẹrọnọ oria ofa a te jọ ru Ekareghẹhọ na, wha daoma ruẹ inọ wha ruẹrẹ emamọ ekwakwa ẹmeọta họ oria na re ahwo kpobi nọ a te jariẹ a sai yo ẹme na. A rẹ kake salọ eruẹrẹahwohọ avọ enọ e te wọ ebrẹdi gbe udi na taure oke u te ti te, a vẹ jẹ kẹ ae ithubro kpahe oghẹrẹ nọ a ti ruiruo na, gbe oware nọ u je fo re a wha ẹgọ nọ o kiehọ.
O gwọlọ nọ mai omomọvo gbe ukoko na soso ma ruẹrẹ oma kpahe ziezi kẹ Ekareghẹhọ uwhu Jesu Kristi nana nọ i wuzou gaga na. Ababọ avro, eghale Jihova i ti te ahwo kpobi nọ a dhesẹ uvi ovuhumuo kẹ oware nọ Jihova o ru kẹ ahwo-akpọ ẹkwoma idhe Ọmọ ọghaghae riẹ, Jesu Kristi.