‘Nyaze Whọ Jọ Olele Mẹ’
1. Didi uvẹ Uwuhrẹ Ebaibol Ukoko u ti rovie kẹ omai evaọ emera nọ e be tha na?
1 A jọ ebe Usiuwoma ene na gbiku ziezi kpahe uzuazọ nọ Jesu Ọmọ Ọghẹnẹ o yeri nọ ọ jọ otọakpọ. Nọ orọnọ Ileleikristi a rẹ “rọ kpahe ithihi riẹ [kpekpekpe]” na, o gwọlọ nọ ma rẹ ruẹrẹ oma kpahe jẹ gaviezọ ziezi nọ ma ti wuhrẹ obe ọ ‘Nyaze Whọ Jọ Olele Mẹ’ evaọ Uwuhrẹ Ebaibol Ukoko muhọ no oka ọ June 6, 2011 vrẹ na. (1 Pita 2:21; Mak 10:21) Eware sa-sa nọ Jesu o ru nọ ma rẹ rọ aro kele evaọ odibọgba na yọ eware nọ i fo nọ ma re wuhrẹ kpahe.
2. Ẹvẹ ma sai ro wo erere no oriruo akothiwo Jesu ze?
2 Oriruo nọ Jesu O Fihọ: Kọ a ta ikpehre eme kẹ owhẹ no ẹdẹjọ evaọ usiuwoma nuwou ruọ uwou? Nọ utioye o tẹ via kẹ omai, ma rẹ kareghẹhọ eme Jesu na inọ: “A te kpokpo mẹ, a re kpokpo owhai re.” (Jọn 15:20) Orọnikọ eme iyoma kpobi nọ a kpahe kẹ omai họ ukpokpoma ha. O make rrọ ere na, oghọghọ nọ ọ riẹ inọ o ti wo evaọ obaro u ru rie thihakọ oghẹrẹ edawọ kpobi. Ma sae tẹrovi epanọ ma re ro ru Jihova eva were gbe obọdẹ osohwa nọ u ti noi ze. Onana u ti fi obọ họ kẹ omai nọ ‘oma o gbẹ te rọ hayo lọhọ omai hi.’ (Hib. 12:2, 3; Itẹ 27:11) Nọ ma bi thihakọ evaọ odibọgba na, jọ u mu omai ẹro inọ Jesu ọ be tha omai uke.—Mat. 28:20.
3. Ẹvẹ ma sae rọ rehọ aro kele epanọ Jesu o rri odibọgba na?
3 “Fiki Onana A Je Vi Omẹ Ze”: Iruo usiuwoma ota na Jesu ọ rọ karo. (Luk 4:43) Ọ rehọ oma riẹ kpobi kẹ iruo odibọgba na. Ọ rehọ ovẹrẹ ru iruo na, je fi ẹro họ uvẹ kpobi nọ ọ rẹ rọ ta kpahe Uvie na. Nọ orọnọ mai yọ Ilele Jesu na, ẹvẹ ma sae rọ rehọ aro kele iei? Kọ ma be hae ruẹ ahwo nọ ma sae ta usiuwoma kẹ evaọ iruẹru okpẹdẹ mai? Jọ uyoyou nọ Kristi o dhesẹ kẹ omai o wọ omai ta usiuwoma na kẹre te epanọ o sae lọhọ te kpobi!—2 Kọr. 5:14.
4. Ẹvẹ ma sai ro wo ẹnyaharo evaọ odibọgba na?
4 “Ohwo Ọvo Ọ Re Ta Ẹme Wọhọ Ohwo Ọnana Ha”: Oghẹrẹ nọ Jesu o je ro wuhrẹ u gbe ahwo unu. (Jọn 7:46; Mat. 7:28, 29) Eme u ru rie wo ohẹriẹ no iwuhrẹ efa? O you uzẹme nọ o je wuhrẹ, o you ahwo nọ o je wuhrẹ, ọ tẹ jẹ rehọ onaa sa-sa wuhrẹ. Ma tẹ rọ aro kele Owuhrẹ Ologbo na, ma sai wo ẹnyaharo evaọ odibọgba mai.—Luk 6:40.
5. Eme ọ rẹ jọ utee mai nọ ma ti wuhrẹ ‘Nyaze Whọ Jọ Olele Mẹ’ na?
5 Enana yọ umutho gheghe evaọ usu eware nọ ma wuhrẹ kpahe Jesu. Eware eghaghae efa vẹ ma sai wuhrẹ mi ei? Nọ ma te kiẹ uzuazọ Jesu riwi evaọ Uwuhrẹ Ebaibol Ukoko na, jọ o jọ utee ra inọ whọ rẹ daoma rọ aro kele ẹmeunu gbe uruemu riẹ ro dhesẹ nọ whọ “riẹ uyoyou Kristi.”—Ẹf. 3:19.