Uzou 1

‘Jọ Olele Mẹ’​—Eme Jesu O Wo Họ Iroro?

1, 2. Uzizie vẹ a kẹ ahwo-akpọ no nọ o mai woma, kọ enọ vẹ ma rẹ sae nọ omobọ mai?

OWARE vẹ a zizie owhẹ kẹ no nọ o mae were owhẹ? Whọ sai roro kpahe okejọ nọ a zizie owhẹ kpohọ obọdẹ ehaa jọ, ẹsejọhọ ehaa-orọo imava jọ nọ e kẹle owhẹ oma gaga. Hayo whọ sae kareghẹhọ okenọ a zizie owhẹ kẹ emamọ iruo jọ. Ababọ avro, oma o were owhẹ thesiwa. Rekọ obọdẹ uzizie jọ o riẹ nọ u tube woma vi enana kpobi. Mai omomọvo a kẹ uzizie nana. Yọ owọ nọ ma jẹ kpahe uzizie na u re kpomahọ uzuazọ mai gaga. Oyena yọ iroro nọ e mai wuzou nọ ma rẹ jẹ evaọ uzuazọ.

² Uzizie vẹ oye? Uzizie nọ Jesu Kristi, Ọmọ ọvo Jihova Ọghẹnẹ Erumeru na ọ kẹ, onọ a kere fihọ Ebaibol na. Evaọ Mak 10:21, Jesu ọ ta nọ: ‘Nyaze whọ jọ olele mẹ.’ Uzizie nana u te omai omomọvo nẹnẹ re. U fo re ma nọ omobọ mai nọ, ‘Eme me re ru kpahe uzizie nana?’ Ẹsejọhọ who bi roro nọ: ono ọ rẹ siọ obọdẹ uzizie utioye? O sai gbe owhẹ unu inọ ahwo buobu a siọ uzizie nana. Fikieme?

3, 4. (a) Eware vẹ ahwo a rri ghaghae nọ ọzae nọ ọ nọ Jesu kpahe uzuazọ ebẹdẹ bẹdẹ na o wo? (b) Iruemu iwoma vẹ Jesu ọ ruẹ evaọ oma osu nana nọ o fe na?

³ Rehọ oriruo ọzae jọ nọ Jesu o zizie evaọ oware wọhọ ikpe idu ivẹ (2,000) nọ e vrẹ. Ọzae nana yọ ohwo nọ a jẹ kẹ adhẹẹ gaga. O wo eware esa jọ nọ ahwo a rri ghaghae gaga—ọ jọ oke-udhu riẹ, o fe, ọ tẹ jẹ jọ osu. Ebaibol e ta nọ ọzae nana ọ jọ “ẹghele,” “okpohwo” koyehọ osu, o te je ‘fe gaga.’ (Matiu 19:20; Luk 18:18, 23) Rekọ oware ofa jọ o riẹ kpahe ọzae nana nọ u wuzou vi enana. O yo kpahe Jesu, Owuhrẹ Ologbo na, yọ oware nọ o yo o were riẹ.

⁴ Isu oke yena buobu a jẹ kẹ Jesu adhẹẹ hẹ, onọ u fo rie. (Jọn 7:48; 12:42) Rekọ osu nana o wo ohẹriẹ. Ebaibol e ta nọ: “Epanọ [Jesu] ọ be rọ nyavrẹ obọ edhere na, ọjọ ọ tẹ dhẹ bru ei, [kigwẹ] kẹ e, nọ e nọ, ‘owuhrẹ ezi, eme me re ruẹ re mẹ reuku uzuazọ ebẹdẹ bẹdẹ?’” (Mak 10:17) Muẹrohọ epanọ o jọ ọzae nana oja te re o lele Jesu ta ẹme, nọ ọ rọ dhẹ bru ei evaọ iraro ahwo, nwane wọhọ epanọ iyogbere e hai ru. Ofariẹ, avọ adhẹẹ o te kigwẹ fihọ aro Kristi. Onana u dhesẹ nọ o wo omaurokpotọ, jẹ gwọlọ riẹ oware nọ o re ru re ọ sai wo emamọ usu kugbe Ọghẹnẹ. Iruemu itieye na e rẹ were Jesu gaga. (Matiu 5:3; 18:4) Agbẹta, nọ ‘Jesu o ri rie, o te you rie.’ (Mak 10:21) Didi uyo Jesu ọ kẹ ọzae nana?

Uzizie nọ A rẹ Ruẹ Obọ Riẹ Hẹ

5. Didi ẹme Jesu ọ kpahe kẹ ọmoha nọ o fe na, kọ ẹvẹ ma rọ riẹ nọ orọnikọ uvuhu họ “oware ovo” nọ o kare riẹ hẹ? (Je rri oruvẹ-obotọ na.)

⁵ Jesu o dhesẹ nọ Ọsẹ riẹ ọ fodẹ oware nọ ohwo o re ru re ọ sai wo uzuazọ ebẹdẹ bẹdẹ. O si iroro ọmoha na kpohọ Ikereakere na, ọmoha na ọ tẹ ta nọ n’otọ avọ otọ ze o bi ro koko Uzi Mosis na. Rekọ fikinọ Jesu ọ rẹ sae riẹ oware nọ o rrọ ohwo udu, ọ ruẹ oware jọ kpahe ọmoha nana. (Jọn 2:25) O muẹrohọ inọ u wo oware jọ nọ u bi ru ei bẹbẹ kẹ osu nana re ọ gọ Ọghẹnẹ. Fikiere Jesu ọ tẹ ta nọ: “Oware ovo u kiọkọ kẹ owhẹ.” Eme họ “oware ovo” yena? Jesu ọ ta nọ: “Kpo, zẹ eware kpobi nọ who woi, whọ rọ kẹ iyogbere.” (Mak 10:21) Kọ Jesu ọ be ta nọ re ohwo ọ sae gọ Ọghẹnẹ ọ rẹ jọ oyogbe koikoi? Ijo.a Kristi ọ jẹ rọ onana dhesẹ oware jọ nọ u wuzou gaga.

6. Uzizie vẹ Jesu ọ kẹ ọmoha jọ, kọ eme oghẹrẹ nọ ọmoha nana ọ rehọ uzizie na u dhesẹ kpahe iẹe?

⁶ Jesu ọ ta oware nọ o kare ọzae na nọ ọ kẹe obọdẹ uzizie jọ, inọ: ‘Nyaze whọ jọ olele mẹ.’ Rri uvẹ-ọghọ nọ u te ọmoha nana obọ: Ọmọ Ọghẹnẹ Erumeru na ọ rọ unu obọ riẹ zizie ei re ọ jọ olele riẹ! Jesu ọ tẹ jẹ ya eyaa osohwa jọ kẹe, onọ a rẹ ruẹ obọ riẹ hẹ. Ọ ta nọ: “Who re ti wo efe eva obọ odhiwu.” Kọ ọmoha na ọ jẹ obọdẹ uzizie nana rehọ? Ikere na e ta nọ: “O te mu ovao họ fiki ẹme na, ọ tẹ nyavrẹ avọ uweli, epanọ ọ rọ ọ nọ o wo eware ibuobu.” (Mak 10:21, 22) Eme ọ Jesu yena nọ ọmoha na o rẹro rai hi na i ru nọ ẹbẹbẹ nọ ọmoha na o wo o ro dhesẹ oma via. O se efe riẹ avọ ọghọ gbe orro nọ o bi no efe na ze gboja gaga. U yoma kẹhẹ inọ uyoyou nọ o wo kẹ eware eyena o rro gaga vi uyoyou nọ o wo kẹ Kristi. Fikiere, “oware ovo” nọ o kare ọzae na họ eva riẹ kpobi nọ o re ro you Jesu gbe Jihova. Fikinọ ọmoha na o wo uyoyou utioye he, ọ tẹ siọ uzizie obọdẹ yena. Kọ ẹvẹ uzizie nana u ro kpomahọ owhẹ?

7. Fikieme u je mu omai ẹro inọ uzizie Jesu na u te omai nẹnẹ?

⁷ Orọnikọ ọzae yena ọvo Jesu ọ kẹ uzizie na ha, yọ orọnikọ umutho ahwo jọ ọvo ho. Jesu ọ ta nọ: “Otẹrọnọ ohwo jọ ọ rẹ te rọ kpahe omẹ, jọ ọ . . . rọ kpahe omẹ kẹdẹ kẹdẹ.” (Luk 9:23) Muẹrohọ inọ eme ọ Jesu nana i dhesẹ nọ ohwo kpobi nọ u no eva ze ọ rẹ sae jọ olele riẹ. Ahwo evezi itieye na Ọghẹnẹ o re si bru Ọmọ riẹ. (Jọn 6:44) Oghẹrẹ ahwo kpobi Jesu ọ kẹ uzizie nana, orọnikọ edafe, iyogbere, ahwo unuakpọ jọ, hayo enọ e jẹ rria etoke riẹ na ọvo ho. Fikiere, uzizie Jesu na inọ ‘Nyaze whọ jọ olele mẹ’ na u gine te owhẹ re. Fikieme u ro fo re who lele Jesu? Kọ eme onana o gwọlọ mi owhẹ?

Fikieme Ma jẹ Jọ Olele Jesu?

8. Oware vẹ ahwo-akpọ kpobi a gwọlọ, kọ fikieme?

⁸ Uzẹme jọ o riẹ nọ ma rẹ vro ho: Mai kpobi ma gwọlọ emamọ osu. Orọnikọ ahwo kpobi a rẹ rọwo inọ a wo ẹgwọlọ nana ha, rekọ uzẹme riẹ họ ohwo kpobi o wo rie. Jihova ọ kẹ Jerimaya ọruẹaro riẹ ẹgba kere uzẹme nana nọ a rẹ vro ho na: “O ỌNOWO mẹ riẹ nọ ohwo o wo iroro obọ riẹ hẹ, ohwo o wo ogaga nọ o ro su oma obọ riẹ hẹ.” (Jerimaya 10:23) Ahwo-akpọ a wo ẹgba hayo udu nọ a re ro su omobọ rai hi. N’otọ ze ahwo-akpọ a bi ro su omobọ rai thọ. (Ọtausiuwoma Na 8:9) Evaọ oke Jesu, isu na a je kienyẹ ahwo, gboja kẹ ae, je su ai thọ. Jesu o muẹrohọ inọ iwhrori na e “wọhọ igodẹ nọ i wo othuru hu.” (Mak 6:34) Epọvo na ahwo-akpọ a rrọ nẹnẹ. Ma gwọlọ osu nọ ma rẹ sai fievahọ. Kọ Jesu yọ osu nọ ma re fievahọ? Ma wo ẹjiroro buobu nọ ma sai ro yo nnọ Ee.

9. Eme o lẹliẹ Jesu wo ohẹriẹ no isu efa kpobi?

⁹ Orọ ọsosuọ, Jihova Ọghẹnẹ họ ọnọ ọ salọ Jesu. Ahwo-akpọ nọ a gba ha, nọ a rẹ sae viẹhọ a ve je rri eware thọ họ enọ e be hae salọ isu ahwo-akpọ. Jesu yọ osu nọ o wo ohẹriẹ. Odẹ-ovao riẹ u dhesẹ onana via. Otofa “Kristi” gbe “Mesaya” họ “Ọnọ A Wholo.” Ẹhẹ, Osu Ehrugbakpọ na họ ọnọ ọ rọ ẹzi wholo Jesu jẹ rehọ iẹe mu obọdẹ ọkwa riẹ na. Jihova Ọghẹnẹ ọ ta kpahe Ọmọ riẹ nọ: “Ri, Odibo mẹ nọ mẹ sanọ, oyoyou mẹ, ọnọ ọ were ẹzi mẹ ziezi. Me re ti fi Ẹzi mẹ họ iẹ.” (Matiu 12:18) Ọmemama na họ ọnọ ọ riẹ osu nọ ọ mai woma kẹ omai. Areghẹ Jihova o wo ibe he, fikiere ma re fieva kpobi họ ohwo nọ ọ salọ.—Itẹ 3:5, 6.

10. Fikieme oriruo Jesu o jẹ rrọ onọ o mai woma nọ ahwo-akpọ a re lele?

¹⁰ Orọ avivẹ, Jesu o fi obọdẹ oriruo họ otọ kẹ omai. Osu nọ ọ mai woma họ ọnọ o re wo uruemu nọ o rẹ were ahwo riẹ, oghẹrẹ uruemu nọ a rẹ raro kele. Jesu o fi emamọ oriruo h’otọ kẹ enọ o je su, je fi obọ họ kẹ amọfa zihe ruọ emamọ ahwo. Oghẹrẹ ohwo vẹ whọ gwọlọ inọ osu ra ọ rẹ jọ? Ọnọ o wo aruọwha? Areghẹ? Ohrọoriọ? Kọ ẹvẹ kpahe ithihakọ evaọ otọ uyero obẹbẹ? Nọ who bi wuhrẹ kpahe uzuazọ nọ Jesu o yeri evaọ otọakpọ na, whọ te ruẹ inọ Jesu o wo ekwakwa nọ ma fodẹ na gbe efa buobu. Jesu ọ raro kele Ọsẹ obọ odhiwu riẹ gbagba, fikiere o wo ekwakwa-aghae Ọghẹnẹ vọvọ. Ọ ginẹ jọ ohwo ọgbagba evaọ kabọ kabọ. Fikiere ma rẹ sae raro kele Jesu evaọ eware kpobi nọ o ru, ẹme kpobi nọ ọ ta, gbe uruemu kpobi nọ o dhesẹ. Ebaibol e ta nọ o “fi oriruo họ-otọ kẹ owhai re wha rọ kpahe ithihi riẹ.”—1 Pita 2:21.

11. Ẹvẹ Jesu o ro dhesẹ inọ ọye họ “othuru igodẹ owoma” na?

¹¹ Orọ avesa, Kristi o ru epanọ ọ ta gba inọ: “Mẹ họ othuru igodẹ owoma.” (Jọn 10:14) Ahwo nọ e jẹ rria evaọ etoke Jesu a wo otoriẹ eme nana ziezi. Ithuru-igodẹ a jẹ hai ru iruo gaga re a sae rẹrote igodẹ rai. “Othuru igodẹ owoma” o re fi uzuazọ riẹ họ ọza fiki igodẹ riẹ. Wọhọ oriruo, Devidi, ọsẹ-ode Jesu, ọ jọ othuru-igodẹ evaọ okenọ ọ jọ uzoge, o fi uzuazọ riẹ họ ọza isiava nọ ọ họre erao ijihẹ ivẹ nọ e wọ igodẹ riẹ. (1 Samuẹle 17:34-36) Orọnikọ Jesu o fi uzuazọ riẹ họ ọza kẹ ilele riẹ ọvo ho. O tube whu kẹ ai dede. (Jọn 10:15) Bro isu ahwo-akpọ a rẹ sai ru onana?

12, 13. (a) Ẹvẹ othuru-igodẹ o re ro dhesẹ inọ ọ riẹ igodẹ riẹ, kọ ẹvẹ igodẹ e rẹ rọ riẹ othuru rai? (b) Fikieme whọ rọ gwọlọ inọ Othuru-Igodẹ Owoma na ọ jọ osu ra?

¹² Jesu ọ jọ “othuru igodẹ owoma” na evaọ edhere ọfa. Ọ ta nọ: “Mẹ riẹ e rọ obọ mẹ erọ obọ mẹ e riẹ omẹ.” (Jọn 10:14) Dai roro ẹme nọ Jesu ọ jọ etenẹ ta na. Rọkẹ ohwo nọ ọ rrọ othuru-igodẹ hẹ, owa igodẹ na ọvo ọ rẹ ruẹ. Rekọ othuru-igodẹ na ọ riẹ igodẹ riẹ ọvuọvo. Ọ rẹ riẹ enọ i te eyẹ no nọ e te gwọlọ obufihọ riẹ, enọ a yẹ obọ nọ ọ te wọ fikinọ awọ rai e re ga tere he, gbe enọ e be mọ hayo enọ e nwoma. Igodẹ na e riẹ othuru rai re. I re vuhu urru riẹ, e rẹ gaviezọ kẹ urru othuru-igodẹ ọfa ha. E tẹ jọ urru othuru rai yo oghẹrẹ edo ọkpakpata jọ, e rẹ j’owọ vẹrẹ vẹrẹ. Obonọ o su rai nya i re kpohọ. Yọ ọ riẹ uzedhe oria nọ o re su ai kpohọ. Ọ riẹ obonọ emamọ ẹbe gbe ame e rrọ, gbe obonọ oma o rẹ jọ fọ igodẹ riẹ. Nọ ọ be sẹro rai na, igodẹ na e riẹ inọ oma o fọ rai.—Olezi 23.

¹³ Kọ ogbẹrọnọ oghẹrẹ osu otiọye whọ gwọlọ? Othuru-Igodẹ Owoma na o tube tete ilele riẹ viere. Ọ ya eyaa inọ o ti fi obọ họ kẹ owhẹ yeri uzuazọ evawere enẹna, o ve ti je ru ere bẹdẹ bẹdẹ. (Jọn 10:10, 11; Eviavia 7:16, 17) Fikiere, u fo re ma riẹ oware nọ o gwọlọ re ma lele Kristi.

Oware nọ U Dhesẹ re A Jọ Olele Jesu

14, 15. Re ohwo ọ sae jọ olele Jesu, fikieme u gbe ro te he re ohwo o se oma riẹ Oleleikristi hayo re ọ ta inọ o you Jesu?

¹⁴ Ima ahwo buobu nẹnẹ a roro inọ a jẹ uzizie Kristi na rehọ no. Fikiere a bi se oma rai Ileleikristi. Ẹsejọhọ a rrọ ichọche jọ fikinọ etẹe esẹgbini rai a yẹ rai fihọ. Hayo a sae ta inọ a you Jesu gaga a tẹ jẹ jẹe rehọ no wọhọ Osiwi rai. Kọ oyena u ru rai họ uvi ilele Jesu? Kọ oye Jesu o wo họ iroro nọ o zizie omai re ma jọ ilele riẹ? Orọnikọ oye ọvo ho.

¹⁵ Dai roro kpahe erẹwho Kristẹndọm, koyehọ erẹwho nọ ahwo buobu a jọ se oma rai ilele Jesu. Kọ a bi lele iwuhrẹ Jesu Kristi? Manikọ ma be jọ erẹwho yena ruẹ omukpahọ, okienyẹ, ethube, gbe ẹdhoguo-okienyẹ wọhọ epanọ akpọ na soso ọ rrọ na? Mohandas Gandhi, osu ahwo Hindu nọ a rẹ kẹ ọghọ gaga na, ọ ta okejọ nọ: “Mẹ riẹ uvumọ ohwo nọ o ru ewoma kẹ ahwo-akpọ vi Jesu hu. Evaọ uzẹme, oware ovo o jọ Egagọ-Ileleikristi thọ họ.” O fibae nọ: “Whai Ileleikristi wha wo ẹbẹbẹ na. Wha bi ru lele iwuhrẹ rai hi.”

16, 17. Eme o be hae kare enọ i se oma rai Ileleikristi, kọ eme a re ro vuhu uvi ilele Jesu?

¹⁶ Jesu ọ ta inọ uruemu a ti ro vuhu uvi ilele riẹ orọnikọ ẹmeunu hayo odẹ ọvo ho. Wọhọ oriruo, ọ ta nọ: “Orọnọ kohwo kohwo nọ ọ ta kẹ omẹ nọ, ‘Olori, Olori,’ ọ rẹ sae ruọ eva uvie odhiwu hu, rekọ ọnọ o ru oreva Ọsẹ mẹ nọ ọ rọ obọ odhiwu.” (Matiu 7:21) Fikieme ahwo buobu nọ a bi se Jesu Olori rai a gbe bi ro ru oreva Ọsẹ riẹ hẹ? Kareghẹhọ ọmoha nọ o fe na. “Oware ovo” jọ o be hae kare enọ i se oma rai Ileleikristi, koyehọ uvi uyoyou kẹ Jesu gbe Ọnọ o vi rie ze na.

¹⁷ Ẹvẹ ma sae rọ ta ere? Kọ ima ahwo buobu nẹnẹ nọ i bi se oma rai Ileleikristi a be hae ta nnọ a you Kristi? Ee. Rekọ orọnikọ unu ọvo ma rẹ rọ ta nnọ ma you Jesu gbe Jihova ha. Jesu ọ ta nọ: “Ohwo o te you omẹ, o re koko eme mẹ.” (Jọn 14:23) O te je dhesẹ oma riẹ wọhọ othuru-igodẹ, ta nọ: “Igodẹ mẹ i re yo uru mẹ, mẹ riẹ rai, i re lele omẹ.” (Jọn 10:27) Ẹhẹ, uruemu ma re ro dhesẹ inọ ma you Kristi orọnikọ unu ọvo ma rẹ rọ tae he.

18, 19. (a) Ẹvẹ ewuhrẹ kpahe Jesu u re kpomahọ omai? (b) Eme họ ẹjiroro obe nana, kọ ẹvẹ o te rọ jọ erere kẹ enọ i rri oma rai inọ a rrọ ilele Jesu kri no?

¹⁸ Uruemu mai u re dhesẹ oghẹrẹ ohwo nọ ma rrọ evaọ obeva. Ma tẹ gwọlọ dhesẹ emamọ uruemu, udu mai ma rẹ kaki wuhrẹ. Jesu ọ ta nọ: “Onana họ uzuazọ ebẹdẹ bẹdẹ, re a riẹ owhẹ nọ whẹ ọvo họ uvi Ọghẹnẹ, gbe Jesu Kristi ọnọ who vi.” (Jọn 17:3) Ma te wo eriariẹ egbagba kpahe Jesu, u ti duobọte udu mai. Ma ti you rie viere, ma vẹ jẹ gwọlọ raro kele iei kẹdẹ kẹdẹ vi epaọ ọsosuọ.

¹⁹ Onana họ ẹjiroro nọ ma ro kere obe nana. Orọnikọ ma be te jọ obe na gbiku uzuazọ kpobi nọ Jesu o yeri hi, rekọ obe na u ti fi obọ họ kẹ omai lele Jesu vi epaọ anwẹdẹ.b U ti fi obọ họ re ma sae rọ Ikereakere na kiẹ oma mai riwi jẹ nọ oma mai nọ, ‘Kọ me bi gine lele Jesu?’ (Jemis 1:23-25) Ẹsejọhọ whọ be hai rri oma ra anwẹdẹ wọhọ ogodẹ nọ Othuru-Igodẹ Owoma na o bi su. Kọ u gbe woma re whọ kiẹ oma ra riwi sọ eria jọ e riẹ nọ whọ sai jo ru inwene? Ebaibol e ta kẹ omai nọ: “Wha nọ oma rai, sọ wha ghine kru orọwọ rai.” (2 Ahwo Kọrint 13:5) O ginẹ gwọlọ inọ ma kiẹ oma mai riwi sọ ma bi yo urru Jesu, Othuru-Igodẹ Owoma nọ Jihova o ro mu re o su omai.

20. Eme ma ti wuhrẹ kpahe evaọ uzoẹme n’otha na?

²⁰ Jọ obe nana u fi obọ họ kẹ owhẹ bọ uyoyou ra kẹ Jesu gbe Jihova ga ziezi. Uyoyou nana u ti fi obọ họ kẹ owhẹ wo udhedhẹ gbe omofọwẹ evaọ akpọ anwae nana, who ve ti je jiri Jihova bẹdẹ bẹdẹ nọ ọ rọ kẹ omai Othuru-Igodẹ Owoma na. Rekọ re ma te ru onana, ma rẹ riẹ ohwo nọ Kristi ọ rrọ ziezi. Fikiere ma te jọ Uzou avọ 2 kiẹ kpahe ọkwa Jesu evaọ ẹjiroro Jihova.

[Oruvẹ-obotọ]

[Ẹkpẹti nọ o rrọ ẹwẹ-obe avọ 13]

Uzizie Sa-sa nọ Ọmọ Ọghẹnẹ Ọ Kẹ Ahwo

Dae rehọ iẹe inọ Jesu ọvo ọ rọ unu riẹ kẹ owhẹ uzizie sa-sa nọ e rrọ obotọ na. Eme whọ hai ru, kọ fikieme?

“Lele omẹ.”—Matiu 9:9; Luk 9:59; Jọn 1:43.

“Ohwo nọ ọ guọlọ nọ o re lele omẹ, jọ ọ vro oma riẹ re ọ tọlọ uruveghe riẹ ọ rọ kpahe omẹ.”—Matiu 16:24.

“Whai e ruẹ uye gbe enọ e wha owha ogbẹgbẹdẹ kpobi, wha bru omẹ ze, mẹ rẹ kẹ owhai udhedhẹ. Rehọ owhowha mẹ wha, wha wuhrẹ [mi] omẹ.”—Matiu 11:28, 29.

“Ohwo nọ uruame u bi kpe, o bru omẹ ze te da.”—Jọn 7:37.

[Uwoho nọ o rrọ ẹwẹ-obe avọ 4]

“Eme me re ruẹ re mẹ reuku uzuazọ ebẹdẹ bẹdẹ?”