Kọ Whọ jọ Iweze Ọsosuọ Dhesẹ Epanọ Ma re Ru Obe-Uwuhrẹ Ebaibol No?
Ma tẹ ta kẹ ahwo jọ nọ ma gwọlọ wuhrẹ Ebaibol kugbe ae, a rẹ ta nọ a gwọlọ họ hayo inọ a be hai wuhrẹ Ebaibol evaọ obọ ichọche rai. A roro nọ oghẹrẹ nọ ma re ro wuhrẹ Ebaibol na u wo ohẹriẹ no orọ egagọ efa ha, fikiere a riẹ epanọ o te were ai oma je fi obọ họ kẹ ai te he. Fikiere, evaọ iweze ọsosuọ na, ukpenọ whọ rẹ t’ẹme kpahe uwuhrẹ Ebaibol, rehọ iminiti jọ dhesẹ oghẹrẹ nọ ma re ru ei. Wọhọ odẹme: Orọnikọ whọ rẹ ta kẹ ai ọvo ho inọ whọ riẹ ẹbẹ ethere, gbe inọ whọ te wha emu se ai oke ofa; rekọ kẹ ai omojọ ẹsiẹsiẹe na. Enẹ whọ sae rọ rehọ iminiti kakao ọvo ro ru ei wọhọ epanọ a dhesẹ fihọ Odibọgba Uvie Mai ọrọ March 2006 ẹwẹ-obe avọ 6:
“Ko who roro nọ eme nana i ti rugba ẹdẹjọ? [Se Aizaya 33:24, jẹ kuvẹ kẹ uyo.] Jọ me dhesẹ oware jọ k’owhẹ kpahe ẹme nana.” Rehọ obe ọ Ebaibol Wuhrẹ na kẹe, je rovie kpohọ edhe-ẹme avọ 22 evaọ ẹwẹ-obe avọ 36. Se onọ edhe-ẹme na, jẹ ta kẹ ohwo na re o muẹrohọ uyo na nọ who bi se edhe-ẹme na. Kẹsena whọ vẹ wariẹ nọ onọ na, jẹ gaviezọ kẹ uyo ohwo na. Se ikere efa nọ e rrọ edhe-ẹme na. N’onọ jọ nọ whọ te kuyo riẹ evaọ iweze n’otha, wha ve fi oke jọ họ nọ who ti ro zihe. Obe-uwuhrẹ Ebaibol who muhọ no na!