Epanọ A re ro Wuhrẹ Ahwo Ọkpokpọ re A Ta Usiuwoma

1. Ẹvẹ oma o j’owhẹ evaọ ẹdẹ ọsosuọ nọ who kpohọ usiuwoma ota?

¹ Kọ whọ kareghẹhọ ẹdẹ ọsosuọ nọ who ro kpohọ usiuwoma n’uwou ruọ uwou na? Ẹsejọhọ, udu u bru owhẹ gaga. Otẹrọnọ ohwo nọ o wuhrẹ owhẹ obe hayo owhowho-uvie ọfa wha gbẹ jọ usu, eva e were owhẹ inọ o fi obọ họ kẹ owhẹ. Enẹna nọ whọ riẹ usiuwoma ẹta no na, who te ohwo nọ o re wuhrẹ ahwo ọkpokpọ epanọ a rẹ ta usiuwoma no.

2. Eme u fo nọ iwhowho-uvie ekpokpọ a re wuhrẹ?

² U fo re iwhowho-uvie ekpokpọ a wuhrẹ epanọ a re ro mu ẹme họ, rehọ Ebaibol na ta usiuwoma, ru izihebro, je wo ebe-iwuhrẹ Ebaibol. A re je wuhrẹ epanọ a rẹ rọ jọ eria sa-sa ta usiuwoma, wọhọ usiuwoma iyẹrẹ gbe eria ekiọthuọ. Whọ rẹ sai fi obọ họ kẹ ai wo ẹnyaharo ẹkwoma oriruo gbe ithubro ra.

3. Eme ma re ru re amọfa a sae raro kele omai?

³ Jọ Ọnọ A rẹ Sae Raro Kele: Jesu o dhesẹ oghẹrẹ nọ a rẹ ta usiuwoma kẹ ilele riẹ. (Luk 8:1; 1 Pita 2:21) Who te ru ọruẹrẹfihotọ re owhowho-uvie ọkpokpọ o lele owhẹ, ruẹrẹ eme elọlọhọ jọ kpahe nọ whọ rẹ rọ ta usiuwoma, onọ ọ rẹ sae raro kele, o sae jọ onọ o rrọ obe mai jọ. Kake jọ uwou ọsosuọ na hayo gbe ọrọ avivẹ na ta usiuwoma re owhowho-uvie na ọ sae gaviezọ k’owhẹ. Taure wha te ti te uwou ọfa, nọ owhowho-uvie na re ọ ta oware nọ o muẹrohọ evaọ ẹme ra. Onana u ti fi obọ họ kẹe ruẹ nọ o rẹ kẹ erere re o kuomagbe amọfa evaọ usiuwoma ota, je ti ru ei lọhọ kẹe re ọ jẹ ithubro kpobi nọ whọ te kẹe rehọ nọ ọ tẹ ta usiuwoma no.

4. Nọ owhowho-uvie ọkpokpọ ọ tẹ ta usiuwoma no, ẹvẹ ma sai ro fi obọ họ kẹe?

⁴ Kẹ Ithubro: Jesu ọ tẹ jẹ kẹ ilele riẹ ithubro kpahe oghẹrẹ nọ a rẹ rọ ta usiuwoma. (Mat. 10:5-14) Whọ sai fi obọ họ kẹ owhowho-uvie ọkpokpọ epọvo na re. Nọ ọ tẹ be ta usiuwoma, gaviezọ ziezi. Nọ wha te no uwou na no, jiri ei ziezi, o tẹ make rọnọ who muẹrohọ oria jọ nọ u fo nọ o re jo wo ẹnyaharo. Taure whọ tẹ te kẹe uthubro, whọ sae kẹe uvẹ re ọ wariẹ jọ unuẹthẹ ọfa ta usiuwoma sọ o ti wo ẹnyaharo vi epaọ ọsosuọ na. O sae jọnọ ozọ o jariẹ ẹro evaọ oke ọsosuọ. Kareghẹhọ inọ, iwhowho-uvie kpobi a wo onaa ọvona ha, yọ idhere sa-sa e riẹ nọ a sai ro ru oware ovona.—1 Kọr. 12:4-7.

5. Nọ ma tẹ be rọ iroro obọmai kẹ owhowho-uvie uthubro, eme ma rẹ sae ta?

⁵ Evaọ ẹsejọ owhowho-uvie ọkpokpọ ọ te ta k’owhẹ re who fi obọ họ kẹe wo onaa ziezi. Rekọ o gbe ru ere he, rehọ iroro obọra fi obọ họ kẹe. Ẹvẹ ma sae rọ rehọ areghẹ ru onana? Iwhowho-uvie jọ nọ i wo onaa ziezi a sae nọ inọ “Kọ mẹ sae ta oware jọ nọ u ti fi obọ họ k’owhẹ” hayo “Ẹvẹ who roro nọ ẹme ra na ọ jọ?” Hayo whọ rẹ sae ta nọ, “Nọ me mu usiuwoma họ ẹta obọ, o jọ bẹbẹ k’omẹ re . . . , rekọ oware nọ u fi obọ họ k’omẹ họ. . . ” Evaọ ẹsejọ, u re woma re who se oria jọ no obe ọ Reasoning ze kugbei. Re ọ seba ereghe, ta kpahe oware ovo jọ nọ u fo nọ o re jo wo ẹnyaharo evaọ ẹmeọta riẹ.

6. Ẹvẹ ‘utehru o rẹ rọ thọ utehru da’ evaọ iruo odibọgba na’?

⁶ Utehru A rọ Thọ Utehru Da: Pọl ọ tuduhọ Timoti ọnọ o wo onaa usiuwoma no awọ inọ ọ gbẹ ruabọhọ amọfa wuhrẹ je wo ẹnyaharo. (1 Tim. 4:13, 15) O tẹ make rọnọ u kri no nọ whọ be rọ ta usiuwoma, gbẹ hae daoma re who wo ẹnyaharo evaọ onaa ra. Wuhrẹ mi iwhowho-uvie efa nọ wha gbe kpohọ usiuwoma, makọ enọ i muhọ obọ, jẹ daoma fi obọ họ kẹ amọfa, maero iwhowho-uvie ekpokpọ, re a jọ egbodibo nọ i wo onaa.—Itẹ 27:17.