Ezi Ekareghẹhọ Na—Okenọ Ma re ro Fiba Iruo Na!
1. Fikieme ma rẹ rọ jọ March, April, gbe May fiba oke nọ ma be hae rọ ta usiuwoma vẹre?
1 Kọ whọ rẹ sai fiba iruo odibọgba ra evaọ ezi Ekareghẹhọ nọ ọ be tha na? Iwhowho-uvie nọ e te jọ ilivi hayo ehọlide a rẹ sae rehọ oke nana ta usiuwoma. Muhọ no April 2 vrẹ, ma ti w’obọ evaọ usi-uwhowho obọdẹ nọ ma ti ro zizie ahwo nọ a wo isiuru re a kuomagbe omai evaọ April 17 ru Ekareghẹhọ na. Kẹsena, ma vẹ te daoma bọ isiuru enọ e ziọ Ekareghẹhọ na ga je zizie ae re a ziọ ovuẹ ogbotu obọdẹ nọ a te kẹ evaọ oka nọ u ti muhọ evaọ April 25. Ababọ avro, ẹjiroro buobu e riẹ nọ ma re ro fiba odibọgba mai evaọ March, April, gbe May.
2. Obọdẹ edhere jọ vẹ ma sai ro fiba odibọgba mai?
2 Ọkobaro Obufihọ: Obọdẹ edhere jọ nọ ma re ro fiba oke usiuwoma ota mai họ ọkobaro obufihọ nọ ma rẹ rehọ. Nọ orọnọ iruo e vọ omai kpobi obọ na, o gwọlọ nọ ma rẹ ma omaa kpahotọ je ru inwene jọ evaọ omaa mai. (Itẹ 21:5) Whọ rẹ sae va iruẹru jọ nọ i wuzou tere he evaọ iruẹru ra kpohọ oke ofa. (Fil. 1:9-11) Kọ whọ gbẹ ta iroro ra nọ whọ gwọlọ ro ru ọkobaro obufihọ kẹ amọfa evaọ ukoko na sọ a sai kuomagbe owhẹ?
3. Ẹvẹ iviuwou a sai ro ru re a fiba iruo odibọgba rai?
3 U ti woma re wha ta kpahe itee nọ wha wo wọhọ uviuwou evaọ Uwuhrẹ Ebaibol Uviuwou owọwọ rai n’otha. (Itẹ 15:22) Nọ uviuwou o tẹ be thọ ohwohwo uke, ahwo uviuwou na jọ a sai ru ọkobaro obufihọ evaọ amara ọvo hayo bu viere. Kọ otẹrọnọ onana o gbẹ lọhọ họ? Uviuwou na o rẹ sai ru ọruẹrẹfihotọ re a kpohọ usiuwoma evaọ owọwọ sa-sa hayo ta usiuwoma krẹkri evaọ Ẹdẹ-Ọmaha gbe Ẹdoka.
4. Eghale vẹ ma ti wo nọ ma te fiba odibọgba mai evaọ ezi Ekareghẹhọ na?
4 Jihova ọ be ruẹ omodawọ mai evaọ egagọ riẹ, yọ onana o be dae ẹro fia. (Hib. 6:10) Omarọkẹ iruo Jihova gbe obufihọ kẹ amọfa o rẹ wha oghọghọ ze. (1 Irv. 29:9; Iruẹru 20:35) Kọ whọ sai fiba iruo odibọgba ra evaọ ezi Ekareghẹhọ nana re who wo oghọghọ gbe eghale nọ i re noi ze?