‘Jọ A Ru Odẹ Ọghẹnẹ Fo’
1. Eme họ uzoẹme okokohọ okogho ọrọ 2012, kọ diẹse a rehọ e riẹ no ze?
1 Uvẹ-ọghọ riẹ o rro kẹhẹ nọ a be rọ rehọ odẹ Jihova, Osu Ehrugbakpọ na se omai! Ọghẹnẹ ọvo ọ kẹ omai uvẹ-ọghọ na inọ a rehọ odẹ riẹ se omai, yọ maero anwọ ukpe 1931 ze a rọ rehọ odẹ na Isẹri Jihova riẹ omai. (Aiz. 43:10) Jesu o rri odẹ Ọsẹ riẹ kpehru gaga, onọ u ru nọ o ro fi ei họ oria ọsosuọ evaọ olẹ nọ o wuhrẹ ilele riẹ. (Mat. 6:9) Eme nọ Jesu ọ ta a rehọ uzoẹme okokohọ okogho ọrọ 2012 no ze. Oyehọ ‘Jọ A Ru Odẹ Ọghẹnẹ Fo.’
2. Didi eme ma bi rẹro nọ ma ti yo?
2 Eme nọ Ma ti Yo: Evaọ Ẹdẹ-Ọmaha, a te jọ ẹme na “Ru Amọfa Riẹ Odẹ Ọghẹnẹ Wọhọ Egbodibo Oke-Kpobi” ta kpahe oware nọ iruo odibọgba oke-kpobi na o rọ rrọ iruo nọ o rẹ kẹ erere evaọ uzuazọ. Ma te jẹ gaviezọ kẹ ẹme-ọzọhọkugbe na “Yọroma re Whọ Siọ Ekela ba Ẹwhase Odẹ Jihova,” nọ u ti fi obọ họ kẹ omai riẹ epanọ ma sae rọ whaha ekiero eta ene jọ. A te jọ ẹme na “Oware nọ O jẹ Gwọlọ nọ A re Ru Odẹ Ọghẹnẹ Fo” kuyo enọ nana, Eme u re fi obọ họ kẹ omai gbẹ rehọ ajọwha ta usiuwoma na nọ ahwo a gbẹ be maki dhesẹ isiuru tere he? gbe, Eme u re fi obọ họ kẹ omai nọ ma je ru iruo odibọgba na ziezi? Evaọ Ẹdoka, ma te reawere ẹme-ọzọhọkugbe abọ-ene, kpahe epanọ ma sai ro ru odẹ Ọghẹnẹ fo ẹkwoma iroro mai nọ ma rẹ kpọ, ẹmeunu, iroro-ejẹ gbe uruemu mai. Ovuẹ ogbotu nọ uzoẹme riẹ o te jọ “Jihova O ti Ru Odẹ Ulogbo Riẹ Fo Evaọ Amagẹdọn” o te were ahwo ọkpokpọ oma gaga.
3. Didi uvẹ-ọghọ ma wo, kọ ẹvẹ okokohọ na o ti ro fi obọ họ kẹ omai?
3 Uviemenẹ Jihova o ti ru odẹ riẹ fo. (Izik. 36:23) Rekọ evaọ enẹna, ma wo obọdẹ uvẹ-ọghọ nọ ma sai ro ru oware kpobi nọ o rẹ wha orro se odẹ ofuafo Jihova. U mu omai ẹro inọ okokohọ okogho nana u ti fi obọ họ kẹ omai omomọvo riẹ epanọ ma sae rọ nyate utee mai wọhọ enọ a be rọ odẹ Ọghẹnẹ se.