Rehọ Areghẹ Ru Iruo Na
1. Ẹvẹ 1 Ahwo Kọrint 9:26 u ro kiekpahe iruo usiuwoma ota na?
1 Pọl ukọ na o kere nọ: “Orọnọ mẹ rẹ dhẹ gheghe he, mẹ be họre wọhọ ọnọ ọ be rehọ [abọ] tehe idedeghe he.” (1 Kọr. 9:26) Pọl ọ rehọ eme yena dhesẹ inọ ọ tẹrovi utee riẹ re ọ gọ Ọghẹnẹ ziezi. Eme nana i kiekpahe iruo usiuwoma ota na re. Areghẹ ma re ro ru iruo usiuwoma ota na re emamọ iyẹrẹ e sai noi ze. Evaọ oghẹrẹ vẹ?
2. Wọhọ Pọl avọ etausiuwoma ikpe-udhusoi ọsosuọ, ẹvẹ ma sae rọ salọ ẹruoke gbe oria nọ ma rẹ jọ ta usiuwoma?
2 Kpohọ Eria nọ A Rẹ Jọ Ruẹ Ahwo: Pọl avọ etausiuwoma ikpe-udhusoi ọsosuọ efa a kpohọ usiuwoma ota evaọ oria nọ a riẹ nọ a te jọ ruẹ ahwo. (Iruẹru 5:42; 16:13; 17:17) Fikiere, o rẹ mai woma re ma ta usiuwoma n’uwou ruọ uwou evaọ owọwọ otẹrọnọ owọwọ ahwo a rẹ mae jọ uwou evaọ ẹkwotọ mai. Kọ ahwo a rẹ vọ eria nọ a rẹ jọ ruọ imoto evaọ ohiohiẹ nọ ahwo a te bi kpohọ iruo, hayo owọwọ nọ a bi no iruo ze? Okevẹ ahwo a rẹ mae rọ jọ eria nọ a rẹ jọ thueki? Onana o sae jọ ẹruoke nọ ma rẹ rọ ta usiuwoma evaọ eria itieye.
3. Ẹvẹ ma sae rọ rehọ areghẹ ru ẹkwotọ mai?
3 Rehọ Areghẹ ru Ru Ẹkwotọ Na: U fo re ma rọ areghẹ ru ẹkwotọ usiuwoma ota mai. Wọhọ oriruo, a tẹ ghale utu kakao oye o rẹ mai woma, keme ahwo buobu a te su kpohọ ẹkwotọ ọvo, o rẹ raha oke re a dhe ahwo fihọ iwou je fi obọ họ kẹ ai ru iruo na kpatiẹ. Utu na u gbe bu hu, a rẹ sae ta usiuwoma kẹ ahwo buobu je ru ẹkwotọ rai re vẹrẹ. Kọ o lọhọ re who wo ẹkwotọ obọra nọ ọ kẹle owhẹ, re oke nọ whọ rẹ raha ro kpohọ ẹkwotọ nọ o thabọ o kawo?
4. Ẹvẹ ma rẹ sae rọ jọ uvi “ikuori ahwo”?
4 Jesu ọ ta nọ mai etausiuwoma yọ “ikuori ahwo.” (Mak 1:17) Ugogo ẹjiroro nọ okuori o re ro fi ẹriri họ ame họ re o kpe iyei, orọnikọ thakpinọ o fi ẹriri họ họ. Fikiere, uvi okuori o re kpohọ eria nọ ọ rẹ sae jọ ruẹ iyei, ọ rẹ nya evaọ ẹruoke, je muhọ ekpe ababọ oke-oraha. Enẹ ikuori a be rọ rehọ areghẹ ru iruo iyei-ikpe rai. Joma rehọ areghẹ otiọye na ru iruo usiuwoma ota mai na.—Hib. 6:11.