Inwene Evaọ Ewuhrẹ Udevie Oka

No umuo oka ọ September 3 vrẹ, Uwuhrẹ Ebaibol Ukoko na o te gbẹ jọ iminiti 25 ho rekọ iminiti 30. Evaọ emuhọ uwuhrẹ na, ọnọ o bi ru uwuhrẹ na ọ rẹ rehọ uminiti ọvo ta kpahe uwuhrẹ oka nọ o vrẹ. Ofariẹ, Ewuhrẹ Odibọgba na ọ te gbẹ jọ iminiti 35 ho, rekọ iminiti 30. Ma gbe ti wo abọ iwhowhovia na sa ha. Ukpoye, ọnọ o ti ru ẹme ọsosuọ na o te ru iwhowhovia no, o ve mu ẹme riẹ họ. Ẹsibuobu umutho iwhowhovia wha ti wo, ẹsejọ wha ti wo ho, yọ u du gwọlọ nọ oniọvo nọ o bi ru ẹme ọsosuọ ọ rẹ fodẹ eme efa nọ a te jọ Ewuhrẹ Odibọgba na ru hu. A re ru iwhowhovia erọ omaa usiuwoma ota, gbe orufuọ Ọgwa Uvie, hayo uyere nọ a vi ze he. (km 10/08 ẹwẹ. 1, edhe. 4) Otẹrọnọ a ti ru owhowhovia othethei jọ, u re woma re a vuẹ enọ i wo ẹme evaọ Ewuhrẹ Odibọgba na kpahotọ re a nyase oke jọ ba.