Rehọ Ẹme nọ Ọ rẹ Were Ahwo Mu Usiuwoma Họ
1. Eme ma wuhrẹ no oghẹrẹ nọ Ileleikristi ọsosuọ a jẹ rọ ta usiuwoma ze?
1 Ileleikristi ọsosuọ a ta usiuwoma kẹ ahwo oghoghẹrẹ ewho gbe egagọ. (Kọl. 1:23) Dede nọ Uvie Ọghẹnẹ ọvo a jẹ ta ẹme kpahe, oghẹrẹ nọ a ruẹ ahwo na, ere a je ro mu ẹme họ. Wọhọ oriruo, nọ Pita ọ jẹ ta ẹme kẹ ahwo Ju nọ a rọwo Ikereakere na, ọ rehọ eruẹaruẹ Joẹl mu ẹme họ. (Iruẹru 2:14-17) Rekọ muẹrohọ oghẹrẹ ọfa nọ Pọl o ro mu usiuwoma họ kẹ ahwo Griki evaọ obe Iruẹru Ikọ Na 17:22-31. Evaọ eria nọ ahwo a jẹ rọwo Ebaibol na, ma rẹ sai se Ebaibol kẹ ahwo nọ ma tẹ be ta usiuwoma n’uwou ruọ uwou. Rekọ, ma rẹ rọ areghẹ ta usiuwoma kẹ ahwo nọ i wo isiuru kpahe Ebaibol hayo egagọ họ, hayo nọ a rrọ egagọ Ileleikristi hi.
2. Ẹvẹ ma sae rọ rehọ ebe mai ta usiuwoma kẹ ahwo nọ e rọwo Ebaibol gbe enọ e rọwo ho?
2 Ebe nọ Ma be rọ Kẹ Ahwo Evaọ Amara Na: Evaọ ukpe iruo nana, a te hai nwene ebe nọ ma rẹ rọ kẹ ahwo evaọ emerae ivẹ kpobi, yọ emagazini, emebe-evẹvẹ, gbe ibroshọ a te hae fodẹ. Makinọ ahwo nọ e rrọ ẹkwotọ mai a wo isiuru kpahe Ebaibol ho, ma rẹ sae rọ uzoẹme jọ nọ ma roro nọ o te were ae rọ ta ẹme kugbe ai. Ẹsejọ dede, ma re du fodẹ oria Ebaibol ọvo evaọ ẹdẹ ọsosuọ na ha, rekọ ohwo na o te wo isiuru, ma re zihe ẹdẹfa re ma ta ẹme kpahe Ọmemama na gbe Ebaibol na. Rekọ ma tẹ be ta usiuwoma evaọ oria nọ ahwo a jẹ rọwo Ebaibol, ma rẹ sae rehọ Ebaibol gbe ebe mai ta usiuwoma kẹ ae evaọ edhere nọ o rẹ rọ da ruọ ae oma. Ma rẹ sae kẹ ohwo obe Ebaibol Wuhrẹ, Gaviezọ kẹ Ọghẹnẹ, hayo Gaviezọ kẹ Ọghẹnẹ re Whọ Rria Bẹdẹ Bẹdẹ evaọ oke kpobi, o tẹ make rọnọ eye a ta nọ ma rọ kẹ ahwo evaọ amara na ha. Oware nọ o mai wuzou họ re ma rehọ ẹme nọ ọ rẹ were ahwo mu usiuwoma họ.
3. Ẹvẹ ahwo nọ e rrọ ẹkwotọ mai a rọ wọhọ etọ?
3 Kaki Kporo Otọ Na: Udu ohwo ọ wọhọ otọ. (Luk 8:15) Wọhọ epanọ o gwọlọ nọ a re kporo etọ jọ ziezi re i te ti wou eware na, ere o gwọlọ nọ ma re ru onaa fihọ ẹme mai ziezi re u te ti te ahwo jọ udu. Ileleikristi ikpe-udhusoi ọsosuọ a ta usiuwoma kẹ eghẹrẹ ahwo kpobi, yọ onana o kẹ rai evawere. (Iruẹru 13:48, 52) Ma ti wo evawere ma tẹ be rehọ eware nọ e rẹ were ahwo ta usiuwoma kẹ ae.