Ta Usiuwoma Kẹ Oghẹrẹ “Ahwo Kpobi”
1. Ẹvẹ etausiuwoma nọ i wo onaa a rọ wọhọ uvi ọwena?
1 Uvi ọwena o re wo ekwakwa iruo buobu yọ ọ riẹ oke gbe oghẹrẹ nọ ọ rẹ rọ rehọ ae ọvuọvo ro ru iruo. Epọvo na re, ma wo ekwakwa sa-sa nọ ma re ro ru iruo usiuwoma ota mai. Wọhọ oriruo, ma wo ibroshọ buobu nọ e ta ẹme kpahe izoẹme sa-sa nọ ma rẹ rọ ta usiuwoma kẹ oghẹrẹ “ahwo kpobi.” (1 Kọr. 9:22) A jọ uko obeva Odibọgba Uvie Mai nana fodẹ ibroshọ enana, ahwo nọ a wo họ iroro kere ai, gbe oghẹrẹ nọ ma sai ro fi ai họ ada.
2. Oke vẹ ma re ro fi ibroshọ họ ada?
2 Okenọ Ma re ro Fi Ibroshọ Họ Ada: Ọwena ọ rẹ rehọ okwakwa jọ ru iruo oke kpobi nọ ọ tẹ ruẹ nọ u ti kiehọ kẹ oware nọ o bi ru. Epọvo na, ma sai fi ibroshọ jọ họ ada kẹ ohwo oke kpobi nọ ma tẹ ruẹ nọ u kiehọ uyero ohwo na, orọnikọ amara nọ a ta nọ ma fi ei họ ada ọvo ho. Wọhọ oriruo, otẹrọnọ obe ọ Ebaibol Wuhrẹ na ma bi fihọ ada evaọ amara jọ, ahwo ẹkwotọ mai a gbe wo isiuru kpahe Ebaibol tere he, u re woma re ma fi ibroshọ nọ u kiehọ uyero rai họ ada, kẹsena a te mu isiuru họ ewo no ma ve te fi obe Ebaibol Wuhrẹ na họ ada kẹ ai.
3. Fikieme ma jẹ rehọ ebe mai ruiruo avọ onaa?
3 Ebaibol na o jiri ahwo nọ a rẹ rọ onaa ru iruo rai. (Itẹ 22:29) Uvumọ iruo nọ i wuzou vi ‘iruo usiuwoma’ ota na nẹnẹ e riẹ hẹ. (Rom. 15:16) Re ma sae jọ ‘oruiruo nọ ọ kare omovuọ,’ ma rẹ daoma rehọ ebe mai ruiruo avọ onaa.—2 Tim. 2:15.