O Gwọlọ re Erivẹ Mai A Yo Emamọ Usi Na
1 O rọ oreva Ọghẹnẹ re oghẹrẹ “ahwo kpobi a wo usiwo, re a ze te riẹ uzẹme na.” (1 Tim. 2:4) Erivẹ mai a rọ usu ọ oghẹrẹ “ahwo kpobi” na. Re a rehọ emamọ usi na nya te ae oma o gwọlọ nọ ma re ru oghẹrẹ ẹmeọta mai lọlọhọ je roro oware nọ o rẹ sai si omomọvo nọ ma nya ku urru.—1 Kọr. 9:19-23.
2 Ukoko Jihova o kẹ ekwakwa nọ e rẹ sai fiobọhọ k’omai nya te ibiudu ahwo nọ “a ro mu kẹ uzuazọ ebẹdẹ bẹdẹ.” (Iruẹru 13:48) Evaọ emerae ọ July rite September, ma ti fi ekru ebe ivẹ hayo ene họ ada evaọ azọhọ nọ a sikpotọ gaga. Obe Ikuigbe Ebaibol Mẹ o rọ usu ebe enana. Obe onana o rẹ sai fiobọhọ kẹ t’emaha t’ekpako re a riẹ oware nọ Ebaibol na o wuhrẹ. Joma ruẹ oghẹrẹ nọ ma sae rọ rehọ obe onana ruiruo evaọ July rite September re ma t’ẹme kpahe ẹgwọlọ abọ-ẹzi erivẹ mai.
3 Whọ te jọ obotọ na ruẹ iroro-ejẹ jọ nọ e rẹ sae fiobọhọ evaọ okenọ who te bi fi obe ọ Ikuigbe Ebaibol na họ ada. Eware nọ e rọ iroro-ejẹ ọvuọvo họ (1) onọ nọ o rẹ lẹliẹ ohwo roro nọ a re ro mu ẹmeọta họ, (2) oria nọ a je duku eme isiuru evaọ obe na, gbe (3) ikereakere nọ i fo nọ a rẹ sai se evaọ etoke ẹmeọta na. Whọ sae rọ eme obọ ra kere abọ nọ o kiọkọ na fihọ iẹe, wọhọ epanọ uyo ohwo na o rọ.
Kọ otọakpọ na o te jọ aparadase ẹdẹjọ? —Ikuigbe avọ 71; Evia. 21:3, 4.
Kọ whọ sai roro no ẹdẹjọ kpahe epanọ a rẹ rọ sasa ohwo nọ ohwo oyoyou riẹ o whu oma?—Ikuigbe avọ 92; Jọn 5:28, 29.
Didi ẹruore who roro nọ a re ro fiobọhọ kẹ ahwo nọ a be ruẹ uye ẹyao?—Ikuigbe avọ 96; Aiz. 33:24.
Kọ who roro kpahe oware nọ Jesu Kristi o bi ru enẹna no ẹdẹjọ?—Ikuigbe avọ 104; Kọl. 1:13, 14.
Kọ eyoma o ti no akpọ na ẹdẹjọ?—Ikuigbe avọ 114; Ol. 37:9, 10.
Amono Ọghẹnẹ o ti siwi re a rria evaọ Aparadase?—Ikuigbe avọ 116; 1 Jọn 2:17.
4 Ebe Efa: Ebe sa-sa buobu efa e rọ usu efihọ ada obọdẹ evaọ July rite September na. Oria nọ o jọ fo kpobi, a rẹ sai fi ebe efa nọ e rọ efihọ ada obọdẹ na họ ada kẹ ahwo nọ ma nya ku. Whọ rẹ sae kiẹ iroro-ejẹ nọ e rọ ẹwẹ-obe avọ 21-24 evaọ obe ọ Reasoning na riwi hayo ẹwẹ-obe avọ 13-16 evaọ omobe na Epanọ A ro Muhọ Jẹ Ruabọhọ Ebaibol E rọ Jiroro, whọ vẹ jẹ ruẹrẹ ẹmeọta ọkpẹkpẹe họ nọ ọ rẹ sae kpare isiuru ahwo na.
5 Ẹsikpobi ẹjiroro mai evaọ odibọgba na ọ rẹ jọ re ma mu uwuhrẹ Ebaibol họ, makọ evaọ iweze ọsosuọ na hayo evaọ ozihebro nọ o lele i rie. Fiki ẹjiroro ọyena, o tẹ make rọnọ ọnọ o wo uwou na ọ rehọ uvumọ obe mai hi, ma rẹ sai ru ọruẹrẹfihọ re ma zihe bru ei avọ ẹjiroro emuhọ uwuhrẹ Ebaibol. Otẹrọnọ whọ te jọ ọvo rai jọ muọ uwuhrẹ họ vẹre he, nwene kpohọ ibroshọ Gwọlọ na hayo obe Eriariẹ na ababọ okioraha.
6 Evaọ ọtadhesẹ Jesu kpahe ohwo Sameria ọrivẹ na, o dhesẹ i rie vevẹ inọ uvi ọrivẹ họ ohwo nọ o re dhesẹ uyoyou gbe ẹwo re o fiobọhọ kẹ omọfa nọ ọ rọ uye. (Luk 10:27-37) Erivẹ mai a rọ uye abọ-ẹzi. O gwọlọ re a yo emamọ usi na. Joma wha owha na re ma ghale iẹ kugbe ai, re ma rọ ere dhesẹ oma mai fihọ obọdẹ ilele Jesu Kristi.—Mat. 24:14; Gal. 5:14.
7 Ma yere Jihova kẹ Ikereakere Efuafo na nọ n’ẹkwoma riẹ ze “ohwo Ọghẹnẹ na ọ [sae rọ] gba kiete, ọ vẹ jẹ thomavẹre kẹ iruo iwoma i ruo kpobi.” (2 Tim. 3:17) Ma rẹ jẹ kẹ uyere fiki ebe itieye na wọhọ obe ọ Ikuigbe Ebaibol na gbe ebe edekọ nọ a kugbe efihọ ada obọdẹ mai na. Ma wo ovuhumuo kẹ aghare rai yọ eva e were omai inọ ma rẹ sai fi ai họ ada kẹ amọfa evaọ etoke emerae ọ July rite September na.