Fi Obọ Họ Kẹ Ahwo Gaviezọ Kẹ Ọghẹnẹ
1. Ibroshọ ivẹ vẹ a jọ okokohọ “Jọ Uvie Ọghẹnẹ O Ze!” siobọno, kọ fikieme i ti ro fi obọ họ kẹ ahwo buobu?
1 A jọ okokohọ ubrotọ orọ “Jọ Uvie Ọghẹnẹ O Ze!” siobọno ibroshọ ivẹ, Gaviezọ kẹ Ọghẹnẹ re Whọ Rria Bẹdẹ Bẹdẹ avọ ọnọ a ru lọhọ nọ a re se Gaviezọ kẹ Ọghẹnẹ. Fikinọ eme rai i bu hu, o lọhọ re a fae fihọ ẹvẹrẹ efa. Taure a te ti siobọno ibroshọ ivẹ na dede, yọ a kẹ uvẹ no re a fa Gaviezọ kẹ Ọghẹnẹ re Whọ Rria Bẹdẹ Bẹdẹ na fihọ evẹrẹ 431.
2. Amono a te mai wo erere no ibroshọ ivẹ na ze?
2 Amono a te mai wo erere no ibroshọ ivẹ na ze? Roro kpahe eware nana nọ e be via ẹsikpobi evaọ kabọ kabọ akpọ na:
• Evaọ iweze ọsosuọ hayo ozihebro, owhowho-uvie ọ sae ruẹ inọ ohwo nọ ọ be ta ẹme kẹ na ọ riobe he, hayo ọ riẹ obe ese tere he.
• O sae jọnọ owhowho-uvie ọ be ta usiuwoma kẹ ahwo nọ a be jẹ ẹvẹrẹ nọ ma fa umutho ebe mai jọ fihọ hayo nọ ma fa obe ọvo fihọ họ. Hayo o rrọ bẹbẹ kẹ ibuobu nọ e rrọ ẹkwotọ mai re a se ẹvẹrẹ nọ a rẹ sae ta ziezi.
• Nọ owhowho-uvie o te bi wuhrẹ ohwo nọ o diezọ evaọ ẹkwotọ riẹ.
• Owhowho-uvie hayo ọyewọ ọ gwọlọ rehọ ẹme Ọghẹnẹ wuhrẹ ọmaha nọ ọ re riẹ obe ese he.
3. Oghẹrẹ vẹ a ru ibroshọ Gaviezọ kẹ Ọghẹnẹ na?
3 Oghẹrẹ nọ A Ru Rai: Gaviezọ kẹ Ọghẹnẹ o wo eme bu hu, ẹme kpẹkpẹe gbe oria ikere nọ a rehọ ẹme na no ze na ọvo a fihọ obotọ ẹwẹ-obe kpobi. Fikieme? Dae rehọ iẹe nọ ohwo jọ ọ kẹ owhẹ ibroshọ nọ a rọ ẹvẹrẹ nọ whọ sai se he kere, ẹsejọhọ whọ riẹ ibieme ẹvẹrẹ na dede he. Kọ u ti si owhẹ urru gaga, o tẹ maki wo iwoho iwowoma? Ijo. Ere ọvo na, ahwo nọ a riẹ obe ese he a re wo isiuru kpahe obe nọ a kere eme buobu fihọ họ. Fikiere, a drọ iwoho iwowoma fihọ ẹwẹ-obe kpobi avọ unu opiọpiọ nọ u bi dhesẹ epanọ who re ro no uwoho jọ ruọ ọfa.
4. Ẹvẹ a ru Gaviezọ kẹ Ọghẹnẹ re Whọ Rria Bẹdẹ Bẹdẹ na?
4 Iwoho nọ e rrọ Gaviezọ kẹ Ọghẹnẹ re Whọ Rria Bẹdẹ Bẹdẹ eye ọvona e rrọ Gaviezọ kẹ Ọghẹnẹ. A ru Gaviezọ kẹ Ọghẹnẹ re Whọ Rria Bẹdẹ Bẹdẹ re a rehọ iẹe wuhrẹ ahwo nọ e riẹ obe ese tere he hayo nọ a bi wuhrẹ epanọ a re se. Ma sae rehọ iẹe ru uwuhrẹ na nọ ma te bi wuhrẹ ọmọ-uwuhrẹ mai nọ o kru Gaviezọ kẹ Ọghẹnẹ. A rehọ uzoẹme kpobi ru onọ nọ a kẹ uyo riẹ evaọ ewẹ-obe ivẹ. Iwoho na i wo eme gbe eria ikere nọ a fihọ ae. Evaọ ubrobọ otọ ewẹ-obe buobu, u wo ẹkpẹti jọ nọ a fi eme gbe ikere efa họ nọ whọ rẹ sae ta ẹme kpahe otẹrọnọ ọmọ uwuhrẹ na ọ te sae kareghẹhọ ae.
5. Oke vẹ ma sae rọ rehọ ibroshọ na kẹ ahwo, kọ evaọ oghẹrẹ vẹ?
5 Oghẹrẹ nọ A rẹ rọ Rehọ Ai Ruiruo: Whọ sae rehọ ọjọ evaọ usu ibroshọ ivẹ na kẹ ohwo nọ who rri nọ u ti fi obọ họ kẹ evaọ usiuwoma n’uwou ruọ uwou, o tẹ make rọnọ ọye ma bi fihọ ada evaọ amara yena ha. (Rri ẹkpẹti na “Epanọ A Sae ro Fi Ae Họ Ada.”) Whọ tẹ ruẹ ohwo nọ o wo isiuru evaọ ozihebro, ta kẹe nọ whọ gwọlọ dhesẹ oware jọ kẹe whọ vẹ kẹe ibroshọ na.
6. Ẹvẹ ma rẹ rọ rehọ ibroshọ na wuhrẹ ohwo?
6 Nọ orọnọ Gaviezọ kẹ Ọghẹnẹ o wo enọ họ na, ma rẹ nwane nọ enọ oghẹrẹ nọ ma rẹ nọ enọ okenọ ma tẹ be rehọ obe Ebaibol Wuhrẹ na wuhrẹ ohwo ho. O rẹ were ahwo re a gaviezọ kẹ iku evaọ eria kpobi. Fikiere, rehọ iwoho na gbiku eware nọ e rrọ Ebaibol na. Ta oware nọ a be jọ iwoho na dhesẹ. Ru uwuhrẹ na sasasa. Nọ ọmọ-uwuhrẹ na oware nọ o muẹrohọ. Se eria Ebaibol nọ e rrọ obotọ ẹwẹ-obe kpobi jẹ rehọ ae lele iei ta ẹme. Nọ enọ re ọmọ-uwuhrẹ na ọ kpahe fihọ ẹme na, ere whọ rẹ rọ riẹ sọ o bi wo otoriẹ eme na. Otẹrọnọ o kru Gaviezọ kẹ Ọghẹnẹ re Whọ Rria Bẹdẹ Bẹdẹ, se eme gbe eria Ebaibol na kugbei nọ whọ tẹ be ta kpahe iwoho na.
7. Ẹvẹ ma re ro fi obọ họ kẹ ọmọ-uwuhrẹ mai wo ẹnyaharo?
7 Fi Obọ Họ Kẹ Ọmọ-Uwuhrẹ na re O Wo Ẹnyaharo: Ẹsejọhọ, uwuhrẹ na o te lẹliẹ ọmọ-uwuhrẹ ra wo isiuru kpahe obe-use, ọyọvo ọ vẹ te sai wuhrẹ kpahe Jihova. (Mat. 5:3; Jọn 17:3) Otẹrọnọ Gaviezọ kẹ Ọghẹnẹ, who bi ro wuhrẹ iẹe, nọ oke o be nyaharo na, whọ rẹ sae ta kẹe inọ whọ gwọlọ wuhrẹ iẹe epanọ a re se, wha ve nwene kpohọ Gaviezọ kẹ Ọghẹnẹ re Whọ Rria Bẹdẹ Bẹdẹ. Whọ tẹ make rehọ ibroshọ na wuhrẹ ohwo na re no, u re ru ei te kẹ ame-ọhọ họ. Whọ rẹ rehọ obe Ebaibol Wuhrẹ hayo obe ofa nọ u kiehọ wuhrẹ iẹe re ọ sai wo eriariẹ Ebaibol ziezi.
8. Fikieme ibroshọ ekpokpọ nana e rọ were owhẹ?
8 Re ahwo a sai wo uzuazọ ebẹdẹ bẹdẹ, a rẹ gaviezọ kẹ Osu idhiwu gbe akpọ na. (Aiz. 55:3) Yọ Jihova ọ gwọlọ nọ oghẹrẹ “ahwo kpobi,” te enọ e riẹ obe ese he a gaviezọ kẹe. (1 Tim. 2:3, 4) Eva e were omai gaga nọ ma ro wo ibroshọ ekpokpọ nana nọ ma sai ro wuhrẹ ahwo re a gaviezọ kẹ Ọghẹnẹ!
[Ẹkpẹti nọ o rrọ ẹwẹ-obe avọ 3]
Epanọ A Sae ro Fi Ae Họ Ada
Dhesẹ uwoho nọ o rrọ ẹwẹ-obe avọ 2-3 kẹ ohwo na re whọ nọe nọ: “Kọ o te were owhẹ re whọ rria akpọ owowoma otiọna? [kuvẹ kẹ uyo.] Ebaibol ọ ta nọ Ọghẹnẹ o ti ru akpọ na jọ wowoma, akpọ nọ udhedhẹ o rrọ nọ ohwo ọvo ọ gbẹ te jọ oyogbere he, yọ ẹyao ọ gbẹ te jọ gbe he. Joma se oware nọ ma re ru re ma sae rria akpọ yena. [Se Aizaya 55:3 nọ a kere fihọ ehru ẹwẹ-obe avọ 3 na.] Ebaibol na ọ be ta kẹ omai nọ ma “nya bru” Ọghẹnẹ ze re ma gaviezọ kẹe. Rekọ ẹvẹ ma rẹ rọ gaviezọ kẹ Ọghẹnẹ?” Rovie ẹwẹ-obe avọ 4-5, re who dhesẹ uyo na kẹe. O gbe wo uvẹ hẹ, kẹe ibroshọ na re wha fi oke ọfa họ nọ who ti ro zihe ze re wha ta kpahe uyo onọ yena.