Eware nọ E rẹ Jọ Etehe Iruo Mai
1. Oghẹrẹ vẹ Ileleikristi nọ e be ta usiuwoma na a rọ rrọ wọhọ ewena?
1 Ọwena ọ rẹ rehọ ekwakwa buobu ru iruo. U wo enọ o re ro ru iruo ẹsikpobi, rekọ ejọ otiẹse. Ekwakwa nọ ọwena nọ ọ riẹ iruo ziezi o re ro ru iruo ẹsikpobi i re no etehe iruo riẹ hẹ, yọ enana ọ rẹ mae riẹ ro ru iruo. Ebaibol ọ tuduhọ Oleleikristi kpobi awọ re o kru oma ga evaọ odibọgba na, jẹ jọ “oruiruo nọ o wo oware ovo nọ o rẹ lẹliẹ oma vuọ iẹe he.” (2 Tim. 2:15) Okwakwa vẹ o mai wuzou evaọ etehe iruo mai? Oye họ Ebaibol na—ugogo okwakwa nọ ma re ro fiobọhọ kẹ ahwo “zihe ruọ ilele.” (Mat. 28:19, 20) Fikiere, ma rẹ daoma re ma riẹ oghẹrẹ nọ ma rẹ rọ “fa otọ ẹme uzẹme na gbagba.” Rekọ, eware efa jọ e riẹ nọ ma be hai ro wuhrẹ ahwo ẹsikpobi nọ o gwọlọ nọ mai kpobi ma rẹ riẹ oghẹrẹ nọ a rẹ rọ rehọ ae wuhrẹ ahwo uzẹme na ziezi.—Itẹ 22:29.
2. Igogo ebe vẹ ma re ro wuhrẹ ahwo?
2 Igogo Ebe nọ Ma re ro Wuhrẹ Ahwo: U te no Ebaibol na no, ebe efa vẹ ma re ro wuhrẹ ahwo? Ugogo obe nọ ma re ro wuhrẹ ahwo uzẹme na họ Eme Ebaibol na O Gine Wuhrẹ? Nọ ọmọ-uwuhrẹ Ebaibol o te wuhrẹ obe nana re no, ma vẹ rehọ obe Daji Uyoyou Ọghẹnẹ wuhrẹ iẹe re ọ sai fi ehri-izi Ebaibol họ iruo evaọ uzuazọ riẹ. Fikiere, ma rẹ daoma riẹ oghẹrẹ nọ ma rẹ rọ rehọ ebe nana wuhrẹ ziezi avọ onaa. Ibroshọ jọ e rrọ usu ebe nọ e rẹ jọ etehe iruo mai. Ibroshọ Emamọ Usi nọ U No Obọ Ọghẹnẹ Ze! na yọ ugogo obe jọ nọ ma re ro mu obe-uwuhrẹ họ. Otẹrọnọ ma jọ ẹkwotọ mai wo ahwo nọ a riẹ obe ese tere he, hayo ahwo ẹvẹrẹ ọfa nọ ma wo ebe ẹvẹrẹ rai hi, ma sae rehọ ibroshọ Gaviezọ kẹ Ọghẹnẹ hayo Gaviezọ kẹ Ọghẹnẹ re Whọ Rria Bẹdẹ Bẹdẹ na ro wuhrẹ ai. Obe nọ ma rẹ rọ kpọ ovao emọ-uwuhrẹ Ebaibol ziọ ukoko na họ ibroshọ Amono A bi Ru Oreva Jihova Nẹnẹ? Ividio jọ nọ ma re ro fiobọhọ kẹ amọfa zihe ruọ ilele họ, Fikieme Who re ro Wuhrẹ Ebaibol Na?, Eme A rẹ Jọ Ọgwa Uvie Ru?, gbe Kọ Ọghẹnẹ O Wo Odẹ? O gwọlọ nọ ma rẹ riẹ oghẹrẹ nọ a rẹ rọ rehọ ae wuhrẹ ahwo ziezi re.
3. Eme Odibọgba Uvie Mai nọ ma ti wo evaọ obaro i ti fiobọhọ kẹ omai ru?
3 Evaọ obaro, ma te jọ Odibọgba Uvie Mai ruẹ epanọ ma sae rọ rehọ eware nọ e rrọ etehe iruo mai wuhrẹ ziezi avọ onaa. Nọ ma be daoma rehọ ai wuhrẹ ahwo avọ onaa na, u dhesẹ nọ ma bi ru lele ohrẹ Ebaibol na, inọ: “Hai muẹrohọ omara gbe ewuhrẹ ra ẹsikpobi. Ruabọhọ eware nana, keme enẹ oruo, who ti siwi omara gbe enọ e gaviezọ kẹ owhẹ.”—1 Tim. 4:16.