Who Roro nọ Who te Ohwo nọ Ọ rẹ Sai Wuhrẹ Obe Kugbe Ohwo ho Ho
1. Eme ahwo jọ a gbẹ be daoma wo ohwo nọ a re wuhrẹ obe he?
1 Kọ fikinọ who roro nọ whọ riẹ epanọ a re wuhrẹ Ebaibol kugbe ohwo ho jabọ nọ whọ gbẹ be daoma wo obe-uwuhrẹ hẹ? Ahwo wọhọ Mosis, Jerimaya gbe idibo Ọghẹnẹ efa evaọ oke anwae a roro nọ a te ahwo nọ Jihova o re vi uwou ho. (Ọny. 3:10, 11; 4:10; Jeri. 1:4-6) Fikiere, orọnọ nẹnẹ ahwo a muọ iroro itiọye họ ewo ho. Nọ o rrọ ere na, ma te ta ẹme kpahe epanọ ma sae ro si iroro itiọye na no udu mai.
2. Fikieme usiuwoma n’uwou ruọ uwou na ọvo o gbe te he, re ma nyase obe-uwuhrẹ ba kẹ inievo efa?
2 Kareghẹhọ inọ Jihova ọ rẹ vuẹ omai re ma ru oware nọ ma rẹ sai ru hu hu. (Ol. 103:14) Fikiere, nọ ọ ta nọ ma nyai “wuhrẹ ahwo” na ma rẹ sai ru ei. (Mat. 28:19, 20) Orọnọ ahwo nọ a mai wo eriariẹ hayo areghẹ ọvo Jihova o vi uwou nana ha. (1 Kọr. 1:26, 27) Fikiere, usiuwoma n’uwou ruọ uwou na ọvo o te kẹ omai hi, rekọ ma re wuhrẹ ahwo.
3. Ẹvẹ Jihova o bi ro wuhrẹ omai epanọ ma re ro wuhrẹ ahwo?
3 Jihova O bi Wuhrẹ Omai: Jihova o bi wuhrẹ omai epanọ ma sai ro wuhrẹ amọfa re a jọ ilele Jesu. (2 Kọr. 3:5) Ọ rehọ ukoko riẹ wuhrẹ omai eware buobu evaọ Ebaibol na nọ ahwo buobu nọ i kpohọ isukulu ikpehru a riẹ hẹ. (1 Kọr. 2:7, 8) O ru nọ a ro kere oghẹrẹ nọ Jesu, Owuhrẹ Ologbo na o ro wuhrẹ ahwo fihọ Ebaibol na, yọ ọ gbẹ be rehọ ukoko na wuhrẹ omai. O ru rie lọhọ nọ ma ro wo ebe nọ ma sai ro wuhrẹ ahwo Ebaibol. Ebe wọhọ Ebaibol Wuhrẹ i re fi obọ họ kẹ ahwo wo otoriẹ Ebaibol na lọlọhọ. Re a wuhrẹ ahwo Ebaibol o ga tere he.
4. Eme o lẹliẹ omai riẹ nọ Jihova o ti fi obọ họ kẹ omai?
4 Mosis avọ Jerimaya a sai ru iruo nọ Jihova ọ kẹ rai. (Ọny. 4:11, 12; Jeri. 1:7, 8) Ma rẹ lẹ se Jihova re o fi obọ họ kẹ omai. Ma te bi wuhrẹ Ebaibol kugbe ohwo yọ ma bi wuhrẹ iẹe kpahe Jihova, yọ onana o rẹ were Ọghẹnẹ gaga. (1 Jọn 3:22) Fikiere, daoma hai wuhrẹ obe kugbe ahwo. Onana yọ abọjọ iruo usiuwoma ota na nọ o rẹ were oma.