Fi iei Họ Utee Ra Inọ Who re Ru Obe-Uwuhrẹ Ebaibol
1 “Wha kpare aro rai, wha ri idhu, epanọ e fano kẹ evuo.” (Jọn 4:35) Eme yena nọ Jesu ọ ta na e nwani kiekpahe uyero nọ egbodibo Ileleikristi a rẹriẹ ovao dhe nẹnẹ.
2 Ma gbe bi duku ahwo nọ a wo udu ezi nọ a wo isiuru inọ a wuhrẹ ai idhere Jihova. Onana u bi dhesẹ oma via evaọ unu ilele ekpokpọ nọ e be họ-ame kukpe kukpe. O tẹ ginẹ rọ isiuru ra inọ who re ru obe-uwuhrẹ Ebaibol, eme o gwọlọ nọ who re ru?
3 Fi Utee Họ: Orọ ọsosuọ, fi utee họ nọ whọ rẹ rọ to obe-uwuhrẹ Ebaibol họ, je ru uwuhrẹ na kẹse kẹse. Wo utee ra na họ iroro nọ whọ tẹ rrọ usiuwoma. Nọ iruo nọ a k’omai Ileleikristi e rrọ usiuwoma ota gbe ahwo wuhrẹ na, u fo nọ mai kpobi ma rẹ daoma re ma rehọ uvẹ kpobi wobọ evaọ eru obe-uwuhrẹ Ebaibol.—Mat. 24:14; 28:19, 20.
4 Eware Efa nọ Ma re Wo họ Iroro: Olẹ nọ a rẹ lẹ no udu ze yọ oware nọ u wuzou gaga kẹ iwhowho-uvie. Ẹsejọ ma duku ahwo nọ a lẹ kẹ obufihọ epanọ a sai ro wo otoriẹ Ebaibol na no. O rrọ Oghale ulogbo re Jihova ọ rehọ omai gwọlọ ahwo itieye via je wuhrẹ ai!—Hag. 2:7; Iruẹru 10:1, 2.
5 Oniọvo-ọmọtẹ jọ ọ lẹ re o wo obe-uwuhrẹ Ebaibol, kẹsena ọ tẹ vravra omobe-ovẹvẹ na Kọ Whọ Gwọlọ Riẹ Kpahe Ebaibol na Viere? buobu fihọ oria nọ a jẹ sae ruẹ e rai evaọ oria iruo riẹ. Nọ aye jọ ọ tọlọ omobe-ovẹvẹ na jọ, sei no, o te mu eme họ ekere fihọ oria omobe na nọ a rẹ rọ yare obe-uwuhrẹ Ebaibol, kẹsena oniọvo-ọmọtẹ na o te lele iei tẹme, jẹ to obe-uwuhrẹ Ebaibol họ kugbei.
6 Iwhowho-uvie efa nọ a riẹ epanọ a rẹ rọ to obe-uwuhrẹ Ebaibol họ je ru uwuhrẹ na ziezi a sai fiobọhọ k’owhẹ re who le utee ra na tobọ. Lẹ se Ọghẹnẹ kpahe omodawọ ra, jẹ obufihọ nọ o riẹ kpobi rehọ re whọ sai le utee ra tobọ. Ẹsejọhọ kẹle na, whọ te reawere eru obe-uwuhrẹ Ebaibol.