Whọ Sai Ru Eware nọ Whọ Ma Omaa Rai Evaọ Egagọ Jihova

1. Eware jọ vẹ inievo mai a gwọlọ ru, nọ a be sai ru hu?

KỌ OWARE jọ o riẹ nọ whọ ma omaa riẹ evaọ egagọ Jihova, rekọ whọ be sai ru ei hi?b O tẹ rrọ ere, riẹ nọ whẹ ọvo o rrọ ere kẹ hẹ. Oniọvo jọ nọ a re se Philip ọ ruẹ nọ olẹ riẹ o be hae jọ ehruehru, yọ ọ be hae lẹ tere he. Fikiere ọ tẹ gwọlọ nọ ọ rẹ daoma fihọ iẹe, rekọ o be lọhọ họ. Sista Erika ọ jẹ gwọlọ nọ ọ rẹ hai kaki te oria nọ a re kokohọ re a te ti kpohọ usi uwoma, rekọ enwenọ ẹsikpobi o gbe je leti nya. Isiabro soso Brọda Tomáš ọ jẹ gwọlọ nọ o re se Ebaibol na no oka te oka. Ọ ta nọ: “Nọ me je se Ebaibol na, o jẹ ruọ omẹ oma ha. Isiasa soso mẹ daoma sei, rekọ me te se te obe Iruo-Izerẹ, me gbe se vrẹ ere he.”

2. Fikieme o gbẹ rọ kẹ omai uye ga hrọ họ otẹrọnọ ma re sai ru oware jọ nọ ma ma omaa riẹ hẹ evaọ egagọ Jihova?

² Otẹrọnọ o be lọhọ tere he re who ru oware jọ nọ whọ ma omaa riẹ evaọ egagọ Jihova, jọ o kẹ owhẹ uye ga hrọ họ. O tẹ make rọnọ omoware osese dede whọ gwọlọ ru, o rẹ rehọ oke, yọ whọ rẹ daoma fihọ iẹe. Nọ orọnọ whọ gwọlọ ru oware nọ whọ ma omaa riẹ dede nọ o lọhọ tere he na, u dhesẹ nọ whọ rọ usu ra avọ Jihova zaro ho. Whọ gwọlọ nọ whọ rẹ rọ ẹgba ra kpobi gọe, yọ eva ra e be were Jihova. Ọ gwọlọ nọ who ru oware nọ ọ riẹ nọ whọ rẹ sai ru hu hu. (Ol. 103:14; Mae. 6:8) Fikiere whọ tẹ gwọlọ ma omaa oware nọ who re ru kẹ Jihova, jọ o jọ ọnọ ẹgba ra o te. Ma te ta kpahe eware jọ nọ e sai fiobọhọ kẹ owhẹ ru oware nọ whọ ma omaa riẹ.

SEI GBOJA INỌ WHO RE RU OWARE NỌ WHỌ MA OMAA RIẸ

3. Fikieme u je wuzou re ma se oware nọ ma ma omaa riẹ gboja?

³ Ohwo ọ tẹ ma omaa inọ o re ru oware jọ evaọ egagọ Jihova, o re sei gboja re ọ sai ru ei. Ohwo o te se oware gboja, ọ rẹ gwọlọ oghẹrẹ kpobi nọ o re ro ru ei. Joma kẹ oriruo jọ. U wo oghẹrẹ ekọ jọ nọ a re thuru ehọ fihọ nọ ofou ọ rẹ wọ nọ a te bi bi ei. Nọ ofou o te bi fou rri obonọ ohwo na o bi bi nya, ọ te siọ obonọ ọ be nya ba ete he. Yọ epanọ ofou na ọ ga te, ere ọ rẹ kaki te obei te. Osegboja ọ wọhọ ofou otiọye na. O rẹ lẹliẹ ohwo daoma ru oware nọ ọ ma omaa riẹ. Brọda David nọ ọ rrọ obọ El Salvador ọ ta nọ: “Who te se oware nọ whọ ma omaa riẹ gboja, whọ rẹ daoma fihọ iẹe gaga. Whọ rẹ kuvẹ hẹ re oware jọ o whaha owhẹ.” Nọ o rrọ ere na, eme o sae lẹliẹ owhẹ wo osegboja?

4. Eme ma sae lẹ kpahe? (Ahwo Filipai 2:13) (Rri uwoho na re.)

⁴ Lẹ se Jihova re o fiobọhọ kẹ owhẹ sei gboja. Whọ tẹ lẹ se Jihova, ọ sae rọ ẹzi riẹ fiobọhọ kẹ owhẹ se oware nọ whọ gwọlọ ru na gboja. (Se Ahwo Filipai 2:13.) Ẹsejọ ma sae ma omaa inọ ma gwọlọ ru oware jọ evaọ egagọ Jihova fikinọ oware na u gine fo eruo, yọ u woma ere. Rekọ ọwhọ nọ a re ro ru ei o rẹ jariẹ hẹ. Ere o jọ kẹ oniọvo-ọmọtẹ obọ Uganda jọ nọ a re se Norina. Oniọvo na ọ ta nọ ọ te daoma re o mu ohwo jọ Ebaibol họ ewuhrẹ. Rekọ o je sei gboja tere he keme o je rri omariẹ nọ ọ sai wuhrẹ ohwo Ebaibol ho. Kọ eme o ru? Ọ ta nọ: “Kẹdẹ kẹdẹ mẹ jẹ lẹ se Jihova re o fiobọhọ kẹ omẹ sei gboja inọ me re wuhrẹ ohwo jọ. Mẹ tẹ jẹ hai ru eware nọ e rẹ lẹliẹ omẹ riẹ ohwo wuhrẹ ziezi. Nọ emerae jọ e vrẹ no, mẹ tẹ ruẹ nọ me gine sei gboja gaga no. Me te mu imava họ ewuhrẹ evaọ ukpe yena.”

5. Eware jọ vẹ ma sai roro kpahe nọ e te lẹliẹ omai se oware nọ ma ma omaa riẹ gboja?

⁵ Hai roro kpahe eware nọ Jihova o ru kẹ owhẹ no. (Ol. 143:5) Pọl ukọ na o roro kpahe okpoware nọ Jihova o ru kẹe. Fikiere o te sei gboja inọ ọ rẹ rehọ ẹgba riẹ kpobi ru iruo Jihova. (1 Kọr. 15:9, 10; 1 Tim. 1:12-14) Whẹ omara whọ tẹ be hai roro kpahe eware nọ Jihova o ru kẹ owhẹ no, who ti sei gboja inọ whọ rẹ daoma ru eware nọ whọ ma omaa rai evaọ egagọ Jihova. (Ol. 116:12) Oniọvo-ọmọtẹ jọ evaọ obọ Honduras ọ ma omaa inọ ọ te jọ ọkobaro oke-kpobi, o te gine muhọ. Kọ eme o fiobọhọ kẹe? Ọ ta nọ: “Me roro kpahe eware nọ Jihova o ru kẹ omẹ nọ i dhesẹ nọ o you omẹ. Ọ rehọ omẹ ziọ ukoko na, yọ me wo inievo buobu. Ọ be rẹrote omẹ yọ ọ be thọ omẹ. Eware yena nọ me roro kpahe na e lẹliẹ omẹ you Jihova viere, me te sei gboja inọ mẹ rẹ jọ ọkobaro.”

6. Eme ọfa who re ru re whọ sai sei gboja inọ who re ru oware nọ whọ ma omaa riẹ?

⁶ Hai roro kpahe ewoma nọ o ti noi ze nọ who te ru oware nọ whọ ma omaa riẹ na. Eme o fiobọhọ kẹ Erika nọ ma fodẹ ẹsiẹ na, nọ o gbe je ro leti kpohọ oria nọ a re kokohọ re a te ti kpohọ usi uwoma ha? Ọ ta nọ: “Mẹ ruẹ nọ eware buobu e jẹ vrẹ omẹ fikinọ mẹ jẹ hai leti nya. Mẹ ruẹ nọ mẹ tẹ kaki te obei, me ti wo uvẹ yere inievo na, ma ve je gbiku. Yọ eme nọ a te ta i ti fiobọhọ kẹ omẹ riẹ usi uwoma ta je wuhrẹ ahwo ziezi. Usi uwoma o vẹ te were omẹ viere.” Erika o roro kpahe eware iwoma nọ i ti noi ze nọ ọ tẹ be hae kake nya, fikiere o gbe je leti hi. Kọ eware jọ vẹ whọ rẹ sai roro kpahe? Otẹrọnọ whọ gwọlọ nọ whọ rẹ hai se Ebaibol jẹ lẹ ẹsikpobi, whọ sai roro kpahe epanọ o te lẹliẹ usu ra avọ Jihova jọ. (Ol. 145:18, 19) Otẹrọnọ uruemu jọ nọ o rẹ were Ọghẹnẹ gaga whọ gwọlọ wo, whọ sae kareghẹhọ nọ who te wo uruemu yena, o te lẹliẹ owhẹ riẹ yerikugbe ahwo. (Kọl. 3:14) Whọ sai roro kpahe eware iwoma kpobi nọ i ti noi ze nọ who te ru oware nọ whọ ma omaa riẹ, who ve kere ai fihotọ. Hai rri eware nọ who kere na noke toke. Brọda Tomáš nọ ma fodẹ ẹsiẹ na ọ ta nọ: “Otẹrọnọ eware iwoma buobu i ti noi ze nọ me te ru oware nọ mẹ ma omaa riẹ, mẹ rẹ daoma fihọ iẹe gaga.”

7. Eme Julio avọ aye riẹ a ru nọ u fiobọhọ kẹ ae ru oware nọ a ma omaa riẹ?

⁷ Hai bikẹle ahwo nọ a sae lẹliẹ owhẹ wo ọwhọ. (Itẹ 13:20) Brọda Julio avọ aye riẹ a ma omaa inọ a rẹ kwa kpohọ oria nọ iwhowho-uvie e rrọ tere he nyae ta usi uwoma. Brọda Julio ọ ta nọ: “Ma te mu usu kugbe inievo nọ e te tuduhọ omai awọ re ma ru oware nọ ma gwọlọ na. Ma jẹ hae vuẹ ae oware nọ ma gwọlọ ru. Ibuobu evaọ usu rai a ru oghẹrẹ oware nọ ma gwọlọ ru na no. Fikiere a jẹ ruẹ emamọ ẹme ta kẹ omai nọ u re fiobọhọ kẹ omai. A jẹ hae nọ omai epanọ ma be daoma te jẹ tuduhọ omai awọ.”

NỌ O GBẸ BE RUỌ OMAI OMA TERE HE

8. Nọ oware nọ ma ma omaa riẹ o gbẹ be ruọ omai oma ru hu, fikieme ma rẹ gbẹ rọ daoma fihọ iẹe ghele? (Rri uwoho na re.)

⁸ Ẹsejọ re ma ru oware nọ ma ma omaa riẹ, o rẹ ruọ omai oma tere he. Kọ oyena u dhesẹ nọ ma sai gbe ru oware na ha? Ijo. Kareghẹhọ oriruo okọ nọ ofou ọ rẹ wọ nọ ma kẹ oke ẹsiẹ na. Ginọ uzẹme inọ ofou na o te bi fou, o rẹ lẹliẹ obiokọ na te obonọ ọ be nya vẹrẹ. Rekọ ẹsejọ ofou na o re fou ga tere he, o re fou dede ẹsejọ họ. Kọ ohwo nọ o bi bi okọ na o ti gbe te obonọ ọ be nya ghele? O re te obei. Kọ eme o re ru? Ekọ itieye na jọ i re wo ẹjini, efa i re wo uvi. Fikiere ohwo na ọ sae hae rọ ere bi okọ na vrẹ ẹmẹrera. Ere ọvona re, ẹsejọ ma re gine wo ajọwha inọ ma gwọlọ ru oware nọ ma ma omaa riẹ. Rekọ ẹsejọ o rẹ ruọ omai oma ha. O tẹ make rrọ ere, ma rẹ daoma gbe ru oware na ghele. Keme ma tẹ ta nọ oke nọ o tẹ ruọ omai oma ọvo ma re ro ru oware na, ẹsejọhọ ma te sai gbe ru ei hi. Ma rẹ gbẹ daoma ru oware na wọhọ epanọ obiokọ na ọ rẹ rọ oghẹrẹ ọfa bi okọ na vrẹ nọ ofou o gbe bi fou tere he na. Ma rẹ gba omamai họ ru ei. Ma te ru ere, erere o ti noi ze. Ma te ta kpahe eware jọ nọ ma rẹ sai ru. Rekọ joma kake kẹ uyo onọ jọ tao.

9. Kọ o thọ re ma gba omamai họ ru oware nọ ma ma omaa riẹ? Ru ei vẹ.

⁹ Jihova ọ gwọlọ nọ eva e rẹ were omai nọ ma be gọe na yọ ọ rẹ gba omai họ ru oware he. (Ol. 100:2; 2 Kọr. 9:7) Otẹrọnọ oware nọ ma ma omaa riẹ evaọ egagọ Jihova o be ruọ omai oma ru hu, kọ ma rẹ gbẹ daoma ru ei ghele? Joma ta kpahe Pọl ukọ na. Ọ ta nọ: “Mẹ be gba oma mẹ je bi su ei wọhọ ọrigbo.” (1 Kọr. 9:25-27) Pọl ọ tẹ gwọlọ ru emamọ oware, ẹsejọ o jẹ hae ruọ ẹe oma ha, rekọ ọ rẹ gba omariẹ họ ru ei ghele. Kọ eware nọ Pọl o je ru evaọ egagọ Ọghẹnẹ e jẹ were Jihova? Ee. Yọ Jihova ọ ghale riẹ fiki epanọ ọ jẹ daoma te.—2 Tim. 4:7, 8.

10. Irere vẹ i re te omai nọ ma tẹ be gba omamai họ ru oware nọ ma ma omaa riẹ?

¹⁰ Jihova ọ tẹ ruẹ nọ ma be gba omamai họ ru oware nọ ma ma omaa riẹ evaọ egagọ riẹ, eva mai e rẹ were iẹe gaga. Fikieme? Keme o sae jọ nọ oware nọ ma ma omaa riẹ na o rẹ nwane ruọ omai oma ha, rekọ ma gwọlọ ru ei fikinọ ma you rie. Wọhọ epanọ Jihova ọ ghale Pọl ukọ na, ọ te ghale omai re. (Ol. 126:5) Nọ ma jẹ be ruẹ epanọ Jihova ọ be rọ ghale omai, oware na o ve ti mu omai oma họ ẹro. Sista Lucyna nọ ọ rrọ obọ Poland ọ ta nọ: “Ẹsejọ re me kpohọ usi uwoma, o rẹ nwane ruọ omẹ oma tere he, maero nọ oma o tẹ rrọ omẹ no. Rekọ nọ mẹ tẹ gba omamẹ họ nya ghele, eva e rẹ were omẹ gaga inọ me kpohọ usi uwoma ẹdẹ yena.” Kọ eme o sai fiobọhọ kẹ omai nọ oware nọ ma gwọlọ ru o gbẹ be ruọ omai oma tere he? Ma te ta kpahe eware jọ nọ ma rẹ sai ru.

11. Ẹvẹ Jihova ọ sai ro fiobọhọ kẹ omai wo oma-usuo?

¹¹ Lẹ se Jihova re o fiobọhọ kẹ owhẹ wo oma-usuo. Ẹsibuobu nọ a tẹ fodẹ oma-onyẹ hayo oma-usuo, obonọ iroro mai e rẹ kaki kpohọ họ, ma rẹ gba omamai re ma gbe ru oware nọ o rẹ dha Ọghẹnẹ eva ha. Rekọ oye ọvo họ oma-usuo ho. Ma rẹ jẹ gba omamai họ re ma sai ru oware nọ o rẹ were Ọghẹnẹ, nọ o tẹ be make bẹ omai, hayo nọ o gbẹ be ruọ omai oma tere he. Kareghẹhọ nọ ẹzi Ọghẹnẹ o re fiobọhọ kẹ ohwo wo oma-usuo. Fikiere lẹ se Jihova re ọ kẹ owhẹ ẹzi ọfuafo riẹ re whọ sai wo obọdẹ uruemu yena. (Luk 11:13; Gal. 5:22, 23, ẹme-obotọ) Brọda David nọ ma ta kpahe ẹsejọ na ọ ta kpahe epanọ olẹ u ro fiobọhọ kẹe. Ọ jẹ gwọlọ nọ ọ rẹ hai ru uwuhrẹ omobọ riẹ ẹsikpobi. Ọ ta nọ: “Mẹ tẹ jẹ lẹ se Jihova re o fiobọhọ kẹ omẹ hae gba omamẹ họ ru oware. Yọ o gine fiobọhọ kẹ omẹ, me te ti mu uwuhrẹ Ebaibol omobọ mẹ họ eru ẹsikpobi.”

12. Eme obe Ọtausiuwoma Na 11:4 o ta, nọ o sai fiobọhọ kẹ omai ru oware nọ ma ma omaa riẹ evaọ egagọ Jihova?

¹² Whọ hẹrẹ nọ eware kpobi i re woma no tao ha. Akpọ nana nọ ma rrọ na, whọ tẹ ta nọ whọ rẹ hẹrẹ nọ eware kpobi i woma no taure who te ti ru oware nọ whọ gwọlọ ru, ẹsejọhọ whọ te sai ru ei hi. (Se Ọtausiuwoma Na 11:4.) Oniọvo-ọmọzae jọ nọ a re se Dayniel ọ ta nọ: “Ma riẹ nọ eware i ti gbe woma vrẹ enẹ hẹ evaọ akpọ nana. Fikiere ma tẹ ta nọ oghẹrẹ kpobi nọ eware e rrọ kẹhẹ, ma re mu oware nọ ma ma omaa riẹ họ, ma re ru ei.” Oniọvo-ọmọzae obọ Uganda jọ nọ a re se Paul ọ fodẹ oware ofa nọ u ro fo re ma mu oware nọ ma gwọlọ ru họ ababọ oke oraha. Ọ ta nọ: “Ma tẹ be daoma ru oware nọ ma ma omaa riẹ, o tẹ make bẹ, Jihova o ti fiobọhọ kẹ omai.”—Mal. 3:10.

13. Nọ ma te mu oware nọ ma ma omaa riẹ họ eru omomoto, eme o re noi ze?

¹³ Hai ru oware na omomoto. Ẹsejọ oware nọ ma ma omaa riẹ o rẹ ruọ omai oma ru hu fikinọ o nwane lọhọ eru tere he. O tẹ rrọ ere, whọ sai mu ei họ eru omomoto. Ma rehọ iẹe nọ whọ gwọlọ wo uruemu jọ nọ o rẹ were Ọghẹnẹ. Whọ sae hai ru emeware jọ nọ ohwo nọ o wo uruemu utioye na o re ru. Hayo otẹrọnọ whọ gwọlọ nọ who re se Ebaibol na no oka duwu oka, whọ sae hae rọ omoke kpẹkpẹe ro sei omomoto tao. Brọda Tomáš nọ ma fodẹ evaọ obọ emuhọ uzoẹme na ọ jẹ gwọlọ nọ o re se Ebaibol no oka te oka evaọ ẹgbukpe, rekọ ọ jẹ sai ru ei hi. Ọ ta nọ: “Me muẹrohọ nọ eria nọ me je se ẹsiẹvo i je bu hrọ. Fikiere mẹ tẹ ta nọ mẹ rẹ hai se emeria jọ ọvo kẹdẹ kẹdẹ je roro kpahe iẹe. O tẹ so ẹe ze nọ isase Ebaibol i ro mu omẹ họ ẹwere.” Nọ isase na e be were oniọvo na oma na, o te muhọ ese bu vi epaọ ọsosuọ. Uwhremu na, o te ti se Ebaibol na re.c

JỌ O KẸ OWHẸ UYE GA HRỌ HỌ NỌ OWARE JỌ O TẸ VIA

14. Eware jọ vẹ e rẹ sai ru nọ ma gbe ro ru oware nọ ma ma omaa riẹ hẹ ẹsejọ?

¹⁴ Ma tẹ maki se oware nọ ma ma omaa riẹ gboja jẹ be tubẹ gba oma họ ru ei, oware jọ o sae via nọ ma gbẹ sai ro ru ei hi ẹsejọ. “Eware nọ a rẹro rai hi” e sae via, ma gbẹ sai wo uvẹ ru oware nọ ma ma omaa riẹ na ha. (Ọtausi. 9:11) Ẹbẹbẹ jọ ọ sai te omai, u ve ru nọ eva e gbẹ rọ were omai tere he, ma gbẹ sai wo ẹgba ru oware na ha. (Itẹ 24:10) Yọ fikinọ ma gba ha, ma sai ru oware nọ o rẹ whae ze nọ ma gbẹ sai ro ru oware nọ ma ma omaa riẹ hẹ ẹsejọ. (Rom 7:23) Ẹsejọ oma o sae rrọ omai no re. (Mat. 26:43) Kọ eme o sai fiobọhọ kẹ omai nọ oghẹrẹ eware itieye na e tẹ via?

15. Oware jọ u te ru nọ ma gbẹ sai ru oware nọ ma ma omaa riẹ hẹ, kọ u dhesẹ nọ ma gbẹ sai ru ei ofa ha? Ru ei vẹ. (Olezi 145:14)

¹⁵ Kareghẹhọ nọ whọ sai gbe ru oware nọ whọ ma omaa riẹ nọ oware jọ o tẹ make via. Ebaibol ọ ta nọ ebẹbẹ e sai te omai noke toke. Rekọ Ebaibol ọvona ọ tẹ jẹ ta nọ, nọ ebẹbẹ e tẹ maki te omai, Jihova ọ sai fiobọhọ kẹ omai ru oware nọ ma gwọlọ ru ghele. (Se Olezi 145:14.) Brọda Philip nọ ma ta ẹme te ẹsiẹ na ọ ta nọ: “Orọnikọ unuẹse nọ mẹ sai ru oware nọ mẹ ma omaa riẹ hẹ fiki oware jọ, me re roro kpahe he. Rekọ epanọ mẹ daoma gba omamẹ họ ru oware na te me re roro kpahe.” Brọda David nọ ma fodẹ ẹsiẹ na ọ ta nọ: “Ẹsejọ nọ oware jọ u te ru nọ mẹ gbẹ sai ru oware nọ mẹ ma omaa riẹ hẹ, me re rri rie fihọ okpoware jọ họ. Rekọ me re rri rie inọ yọ uvẹ nọ me re ro dhesẹ nọ me you Jihova gaga.” Whọ tẹ be hae daoma ru oware nọ whọ ma omaa riẹ ghelọ oware nọ o via kẹhẹ, yọ who bi dhesẹ nọ whọ gwọlọ ru eva were Jihova. Eva e te were Jihova gaga nọ ọ tẹ ruẹ nọ whọ be daoma ru oware nọ whọ ma omaa riẹ evaọ egagọ riẹ.

16. Oware jọ u te ru nọ ma gbẹ sai ru oware nọ ma ma omaa riẹ hẹ, eme ma sai wuhrẹ noi ze?

¹⁶ Wuhrẹ oware jọ no oware nọ o via na ze. Daoma roro kpahe oware nọ o wha riẹ ze nọ oware na o rọ via. Whọ vẹ nọ omara nọ, ‘Kọ eme me re ru re oware utioye na o gbẹ wariẹ via ha?’ (Itẹ 27:12) Ẹsejọ eware itieye nọ e rẹ via na, e rẹ lẹliẹ omai ruẹ nọ o wọhọ nọ oware nọ ma ma omaa riẹ na o rro vi omai oma. Fikiere wariẹ roro kpahe oware nọ whọ ma omaa riẹ na sọ ẹgba ra o gine mu ei.d Otẹrọnọ ẹgba ra o mu rie he, Jihova o ti rri nọ whọ be daoma ha ha.—2 Kọr. 8:12.

17. Eme u ro fo re ma hae kareghẹhọ eware nọ ma ru no evaọ egagọ Jihova?

¹⁷ Hae kareghẹhọ eware nọ who ru no. Ebaibol ọ ta nọ: “Ọghẹnẹ ọ rrọ ohwo nọ o kiẹrẹe he he nọ iruo rai . . . e rẹ rọ thọrọ iẹe ẹro.” (Hib. 6:10) U fo nọ iruo ra e rẹ thọrọ owhẹ omara ẹro gbe he. Hai roro kpahe eware nọ who ru no evaọ egagọ Jihova. Ejọ rai họ, who mu usu kugbe Jihova no, who te je mu usi uwoma Uvie na họ ẹta kẹ ahwo no, yọ whọ họ-ame no re. Nọ orọnọ whọ nyaharo te ere no na, eware efa nọ whọ ma omaa rai evaọ egagọ Jihova, whọ sai ru ai re.—Fil. 3:16.

18. Eme u fo nọ who re muẹrohọ nọ whọ be daoma ru oware nọ whọ ma omaa riẹ na? (Rri uwoho na re.)

¹⁸ Jihova o ti fiobọhọ kẹ owhẹ re whọ sai ru eware nọ whọ ma omaa rai evaọ egagọ riẹ. Yọ eva e te were owhẹ wọhọ epanọ eva e rẹ were ohwo nọ o bi bi okọ nọ o te te obonọ ọ be nya no. Rekọ ahwo buobu nọ a re bi okọ, a maki ri te obonọ a be nya ha, a rẹ ruẹ eware nọ e rẹ lẹliẹ eva were ae. Fikiere nọ whọ be daoma ru eware nọ whọ ma omaa rai na, hai muẹrohọ eware nọ Jihova o bi ru ro fiobọhọ kẹ owhẹ, re eva e hae were owhẹ. (2 Kọr. 4:7) Whọ tẹ be daoma ru oware nọ whọ ma omaa riẹ, nọ o gbẹ bẹ owhẹ no ho, Jihova ọ te ghale owhẹ gaga.—Gal. 6:9.