Epanọ A rẹ rọ Ibroshọ Amono A bi Ru Oreva Jihova Nẹnẹ? Ruiruo
Ibroshọ Ọkpokpọ nọ A Ru re A rọ Kpọ Ovao Emọ-Uwuhrẹ Ebaibol Ziọ Ukoko Na
1. Fiki ẹjiroro esa vẹ a ro kere ibroshọ Oreva Jihova?
1 Kọ who mu ibroshọ ọkpokpọ na Amono A bi Ru Oreva Jihova Nẹnẹ? họ eroruiruo no? A kere i rie (1) re ma rehọ iẹe fi obọ họ kẹ ahwo nọ ma bi wuhrẹ Ebaibol riẹ oghẹrẹ nọ mai Isẹri Jihova ma rrọ, (2) re ma rehọ iẹe fi obọ họ kẹ ae riẹ eware nọ ma bi ru (3) re ma rehọ iẹe dhesẹ ke ae oghẹrẹ nọ a be rọ kpọ iruẹru mai. Uwuhrẹ kpobi nọ o rrọ ibroshọ Oreva Jihova na u theri vi ẹwẹ-obe ọvo ho, yọ a rẹ sae rehọ iẹe wuhrẹ ohwo evaọ oware wọhọ iminiti isoi rite iminiti ikpe koke koke nọ a te ku uwuhrẹ họ kugbe ohwo na no.
2. Dhesẹ oghẹrẹ nọ ibroshọ na ọ rrọ.
2 Epanọ A Ru Rie: A ghale ibroshọ na kpohọ abọ esa, duọ abọ duọ oware nọ o ta kpahe ukoko Jihova wọhọ epanọ ma ta evaọ obehru na. Enọ a ro kere izoẹme 28 na kpobi, yọ a kẹ uyo onọ ọvuọvo evaọ izoẹme esese nọ a kere mu gbalọ na. A fi iwoho nọ a rehọ no erẹwho 50 ze họ iẹe bi ro dhesẹ nọ Isẹri Jihova a rrọ enwenọ orẹwho kpobi. A ru ẹkpẹti na “Gbẹ Kiẹ Via” fihọ izoẹme buobu nọ who re ro dhesẹ eware nọ ohwo na ọ rẹ sai ru re ọ gbẹ riẹ kpahe omai.
3. Ẹvẹ ma sae rọ rehọ ibroshọ Oreva Jihova na ta ẹme kugbe ohwo?
3 Epanọ A rẹ rọ Ta Ẹme Noi Ze: Kaki se uzoẹme uwuhrẹ na kẹ ohwo na. Kẹsena, who ve se eme na gbe izoẹme esese na kẹ ohwo na je ru ai vẹ. Whọ sai se uzoẹme na kpobi ẹsiẹvo, hayo se edhe-eme ọvo jẹ ta ẹme kpahe iẹe re who te ti se haro. Se eria Ebaibol nọ who rri nọ e te mae fi obọ họ kẹ ohwo na. Evaọ ukuhọ riẹ, whọ vẹ nọ enọ nọ e rrọ obotọ ẹwẹ-obe na. Kareghẹhọ ta ẹme kpahe iwoho na, gbe ẹkpẹti “Gbẹ Kiẹ Via” na. O rẹ mai woma re wha wuhrẹ izoẹme na unọjọ utọjọ. Ghele na, whọ sae la kpohọ uzoẹme nọ who roro nọ o te mae fi obọ họ kẹ ohwo na. Wọhọ oriruo, otẹrọnọ okokohọ o totọ no, whọ sae la kpohọ uwuhrẹ avọ 11.
4. Eme o lẹliẹ ibroshọ ọkpokpọ na were owhẹ?
4 Ma te bi wuhrẹ Ebaibol kugbe ohwo yọ ma bi wuhrẹ ohwo na kpahe Jihova, Ọsẹ obọ odhiwu mai. O tẹ jẹ gwọlọ nọ ma re wuhrẹ iẹe kpahe ukoko Jihova. (Itẹ 6:20) Eva e were omai gaga nọ ma ro wo ibroshọ ọkpokpọ nana nọ u ti fi obọ họ kẹ omai ru onana.