Dede Ai Rehọ!

1. Uvẹ ulogbo vẹ ma wo nọ ma ti ro wuhrẹ ahwo kpahe Ọghẹnẹ, kọ fikieme?

¹ Ehaa ọvo ọ riẹ nọ o rẹ lẹliẹ omai se isẹi kpahe Uvie na wọhọ Emu Owọwọ nọ ma re ru kukpe kukpe na ha. Dai roro iei: Enukpe nana ma bi rẹro ahwo nọ a bu vi ima ikpe nọ a te nyaze ti yo kpahe uyoyou nọ o mae rro nọ Jihova avọ Jesu a dhesẹ. (Jọn 3:16; 15:13) A te riẹ eghale nọ a ti wo no ẹtanigbo na ze. (Aiz. 65:21-23) Orọnikọ oniọvo nọ ọ te kẹ ovuẹ na ọvo ọ te ta ẹme kẹ ahwo nọ e nyaze he. Rekọ ma tẹ rọ oma owhẹwhẹtiẹ dede ahwo na rehọ yọ emamọ edhere jọ nọ ma re ro wuhrẹ ai kpahe Ọghẹnẹ.—Rom. 15:7.

2. Ẹvẹ ma sae rọ rehọ oma owhẹwhẹtiẹ dede ahwo rehọ?

² Ukpenọ whọ rẹ nyae keria hẹrẹ re Emu Owọwọ na o muhọ ọvo, dai roro epanọ u ti woma te re who yere ahwo nọ ma zizie na. Ahwo nọ ma zizie a rẹ sae ru oma ọrọrara keme a riẹ oghẹrẹ nọ Emu Owọwọ na o te jọ họ. Ma te yere ahwo na sasasa o rẹ lẹliẹ udu te ai otọ. Whọ tẹ ruẹ ohwo ọkpokpọ, nọe sọ ọ ziọ ewuhrẹ mai no ẹdẹjọ, hayo sọ ọ riẹ ohwo jọ evaọ usu mai. Whọ sae vuẹe re ọ keria kẹle owhẹ re o lele owhẹ rri obe-ole gbe Ebaibol ra. Otẹrọnọ Ọgwa Uvie a jo ru Emu Owọwọ na, rehọ iẹe nya Ọgwa Uvie na wariẹ. A te kuhọ no, nọe sọ o wo onọ jọ. Otẹrọnọ ukoko ọfa a gwọlọ jọ etẹe ru Emu Owọwọ na re, whọ sae ta kẹe nọ: “Mẹ te gwọlọ kọ bru owhẹ ze re mẹ riẹ oghẹrẹ nọ who rri Emu Owọwọ na. Diẹse whọ be rria?” Daoma zihe bru ei. Ekpako na a re muẹrohọ ahwo nọ a siọ usiuwoma ba no re a tuduhọ ae awọ.

3. Fikieme u je wuzou re ma dede ahwo nọ e nyaze ti kuomagbe omai rehọ?

³ Ahwo buobu nọ a te ziọ Emu Owọwọ na, onana o te jọ orọ ọsosuọ nọ a be rọ ruẹ oghọghọ, udhedhẹ, okugbe avọ uyoyou nọ o rrọ udevie idibo Jihova. (Ol. 29:11; Aiz. 11:6-9; 65:13, 14) Nọ ahwo na a te kpo, eme a te ta kpahe Emu Owọwọ na? Oware nọ a te mae kareghẹhọ họ epanọ ma whẹtiẹ e rai homa te.