Epanọ Ma Sai ro Wo Onaa Ziezi Evaọ Usiuwoma Ota—Rọ Obe Ebaibol Wuhrẹ na Mu Obe-Uwuhrẹ Ebaibol Họ

Oware nọ U ro Wuzou: Ma tẹ vuẹ ahwo buobu nọ ma re wuhrẹ Ebaibol na kugbe ahwo ọvọvẹ a rẹ kaki wo otoriẹ riẹ hẹ. A rẹ sai roro nọ a ti kuomagbe utu uwuhrẹ jọ hayo ma ti wuhrẹ ai ẹkwoma ileta nọ ma ti kere se ai, a ve je kere zihe se omai. Ukpenọ ma rẹ ta kẹ ae nọ ma re wuhrẹ Ebaibol kugbe ahwo, u fo nọ ma re dhesẹ epanọ ma re ru uwuhrẹ na kẹ ae. Ma sae rehọ iminiti jọ, makọ evaọ edikihẹ dede dhesẹ kẹ ohwo na oghẹrẹ nọ o lọhọ te, jẹ ta kẹe nọ o ti wo erere noi ze.

Epanọ A re ro Ru Ei:

Nọ who te yere ohwo na no, whọ vẹ nọe sọ ọ be hai roro kpahe epanọ obaro akpọ riẹ o te jọ.
Ta kẹe nọ ere ọvona ahwo buobu a bi roro re, kẹsena who ve dhesẹ izoẹme nọ e rrọ obe Ebaibol Wuhrẹ na kẹe. Ru ei vẹ kẹe nọ izoẹme nọ e rrọ obe na i ti fiobọhọ kẹe riẹ oware nọ Ebaibol na o wuhrẹ kpahe obaro akpọ mai gbe eware efa, gbe nọ o bẹ hẹ re a wo otoriẹ rai, kẹsena whọ vẹ nọe uzoẹme nọ ọ gwọlọ nọ wha ta kpahe.
Rọ obe Ebaibol Wuhrẹ kẹe re who dhesẹ oria nọ uzoẹme nọ ọ salọ na o rrọ kẹe evaọ obe na. Ru ei vẹ kẹe nọ a kẹ iyo enọ nọ e rrọ emuhọ uzoẹme na evaọ idhe-eme na.
Ta kẹ ohwo na nọ o se edhe-ẹme ọsosuọ na otẹrọnọ u kiehọ iẹe oma ere. Nọ o te sei no, whọ vẹ nọ onọ na, kẹsena who ve fiobọhọ kẹe ruẹ uyo onọ na. Wha se jẹ ta kpahe eria Ebaibol nọ e rrọ edhe-ẹme na nọ i kiekpahe uyo na. Dhesẹ obe ra kẹe re ọ ruẹ epanọ who kpoka họ iyo na.
Wha se edhe-ẹme nọ ọ kẹle riẹ na, kẹsena whọ vẹ ta kẹe re ọ daoma rọ eme obọriẹ kẹ uyo onọ na.
Yere iei rọkẹ uyo nọ ọ kẹ, wha ve fi oke họ nọ who re ro zihe re wha wuhrẹ idhe-eme nọ i kiọkọ.
O tẹ lọhọ, dhesẹ ividio ọ Ẹvẹ A re Ru Obe-Uwuhrẹ Ebaibol? nọ ọ rrọ jw.org/iso na kẹe.

Dao Onana Evaọ Amara Na:

Lẹ se Jihova re o fiobọhọ kẹ owhẹ mu obe-uwuhrẹ Ebaibol ọkpokpọ họ.—Fil. 2:13.
Daoma rọ obe Ebaibol Wuhrẹ na mu obe-uwuhrẹ Ebaibol họ, hayo dhesẹ ividio ọ Ẹvẹ A re Ru Obe-Uwuhrẹ Ebaibol? na kẹ ohwo jọ evaọ usiuwoma.