Isukulu Odibọgba Esuo-Ọghẹnẹ ọrọ 2015 U ti Fiobọhọ kẹ Omai Wo Onaa Ewuhrẹ Ziezi

¹ Devidi ọso-ilezi na o kere nọ: “Ru re ẹme unu mẹ gbe iroro eva mẹ e hẹ were owhẹ, O ỌNOWO, eri mẹ gbe ọta [mẹ].” (Ol. 19:14) Mai omamai ma gwọlọ nọ ẹmeunu mai ọ rẹ were Jihova keme ma rri uvẹ nọ ma be rọ rehọ ẹmeunu mai bọ amọfa ga evaọ ukoko na jẹ ta usiuwoma na ghaghae. Isukulu Odibọgba Esuo-Ọghẹnẹ na yọ edhere jọ nọ Jihova o bi ro wuhrẹ omai rọkẹ iruo usiuwoma ota na. Ma be hai ru ewuhrẹ nana koka koka evaọ ikoko nọ i bu vrẹ 111,000 evaọ akpọ na soso. Ewuhrẹ nana o fiobọhọ kẹ inievo-emetẹ gbe emezae buobu no evaọ eria sa-sa akpọ na, nọ a ro te ziezi rọkẹ iruo usiuwoma ota na, jẹ be rọ udu, ẹtẹzẹ, gbe onaa wuhrẹ amọfa.—Iruẹru 19:8; Kọl. 4:6.

² A te jọ omaa isukulu ọrọ 2015 na ru eme nọ a rehọ no Uwou-Eroro Na ze, gbe obe ọ Eware nọ Ma Sai Wuhrẹ Evaọ Ebaibol Na. U te no ere no, a ru inwene fihọ oke nọ a fihọ rọkẹ oruvẹ Ebaibol gbe Ẹme 1. Evaọ idhe-eme nọ e rrọ obotọ na, ma te ta kpahe inwene nana gbe ithubro nọ a kẹ kpahe epanọ a re ru ẹme ọvuọvo evaọ isukulu na.

³ Oruvẹ Isase Ebaibol: Oniọvo-ọmọzae nọ a kẹ ẹme nana ọ rẹ rọ iminiti ivẹ ta kpahe oria ikere ọvo evaọ isase Ebaibol ẹkpoka na gbe epanọ a sae ro fi ei họ iruo. O gwọlọ oma oruẹrẹkpahe ziezi re oniọvo na ọ sai dhunu te oware nọ u ti fiobọhọ kẹ ukoko na je ru ei vẹ evaọ iminiti ivẹ nọ a kẹ riẹ na. Kẹsena inievo na a vẹ rọ iminiti ezeza ta ẹme kpẹkpẹe evaọ emaharo 30 hayo kpẹre viere kpahe oware nọ o were rai evaọ isase Ebaibol ẹkpoka na, wọhọ epanọ o rrọ anwẹdẹ. Ma rẹ daoma ruẹrẹ oma kpahe ziezi re ma sae ta ẹme nọ amọfa a re wo erere no ze evaọ emaharo 30 na. Onana u re wuhrẹ omai epanọ ma re koko oke, o vẹ jẹ kẹ amọfa uvẹ nọ a rẹ rọ ta oware nọ a wuhrẹ evaọ ekiakiẹ nọ a ru.

⁴ Ẹme 1: A nwene oke nọ a re ro ru isase Ebaibol na kpohọ iminiti esa hayo kpẹre viere, yọ oria isase na u ti bu hu. Oniọvo nọ a kẹ ẹme nana ọ rẹ jọ obọ uwou se oria Ebaibol na do via unuẹse buobu. Ọ rẹ daoma ruẹ nọ o se eme na jẹhọ họ, o ve je se ai gbagba re ahwo kpobi a sai wo otoriẹ rai. U fo nọ idibo Jihova kpobi a rẹ daoma riẹ obe ese ziezi keme obe-use u wuzou gaga evaọ egagọ mai. Eva e be were omai gaga inọ emọ mai buobu a riẹ obe ese ziezi. Ma yere owhai esẹgbini gaga nọ wha be rọ daoma fiobọhọ kẹ emọ rai re a riẹ obe ese ziezi.

⁵ Ẹme 2: Oniọvo-ọmọtẹ ọ rẹ rehọ iminiti isoi ru ẹme nana. Uzoẹme nọ a kẹ riẹ na ọ rẹ ta kpahe. Ọ rẹ ta ẹme na evaọ edhere nọ a sai ro fi ei họ iruo evaọ usiuwoma ota ẹkwotọ rai. Otẹrọnọ a rehọ ẹme na no oria ovo ze he, ọmọ-isukulu na ọ rẹ jọ ebe ukoko na ru ekiakiẹ rọ ruẹrẹ ẹme riẹ họ. Oniọvo na ọ rẹ sai fi eria ikereakere efa nọ i kiekpahe ẹme na ba ẹme riẹ na. Ọsẹro isukulu na ọ rẹ kẹ oniọvo-ọmọtẹ na ohwo nọ a re gbe ru ẹme na.

⁶ Ẹme 3: A sae rọ ẹme nana kẹ oniọvo-ọmọzae hayo ọmọtẹ, yọ iminiti isoi a re ro ru ei. A tẹ rehọ iẹe kẹ oniọvo-ọmọtẹ, o re ru ẹme na epanọ a dhesẹ nọ a re ru Ẹme 2 na. A tẹ rehọ iẹe kẹ oniọvo-ọmọzae, o re dikihẹ aro agbada ẹmeọta na, o ve ru ei evaọ edhere nọ ukoko na o sai ro wo erere noi ze. Ọmọ-isukulu na ọ rẹ ruẹrẹ uzoẹme nọ a kẹ riẹ na họ jẹ salọ eria ikereakere nọ i kiekpahe ẹme na.

⁷ Enwene nọ A Ru Fihọ Ẹme 3 nọ Oniọvo-Ọmọzae O te bi Ru Ei: Otẹrọnọ a kẹ oniọvo-ọmọzae ẹme nọ a rehọ no obe ọ Eware nọ Ma Sai Wuhrẹ Evaọ Ebaibol Na ze, odhesẹvia o re ro ru ei wọhọ usiuwoma ota hayo egagọ uviuwou. Ọsẹro isukulu na ọye ọ rẹ salọ ohwo nọ avọ ọmọ-isukulu na a ti gbe ru ẹme na gbe oghẹrẹ nọ a ti ro ru ei. Ohwo nọ a ti gbe ru ei na ọ rẹ jọ ohwo uviuwou riẹ hayo oniọvo-ọmọzae jọ evaọ ukoko na. Oniọvo nọ a kẹ ẹme na ọ rẹ sae jẹ salọ eria Ebaibol efa nọ ọ riẹ nọ i ti ru ẹme na vẹ. N’oke t’oke, a rẹ sae rọ ẹme nana kẹ ọkpako ukoko. Otẹrọnọ ọkpako ukoko a rehọ ẹme na kẹ, ọye ọvo ọ rẹ sae salọ ohwo nọ a ti gbe ru ẹme na gbe oghẹrẹ nọ o ti ro ru ei. Ababọ avro, o te jọ oware uduotahawọ kẹ inievo ukoko na nọ a tẹ ruẹ ọkpako ukoko avọ ohwo uviuwou riẹ jọ hayo oniọvo jọ nọ a bi ru odhesẹvia epanọ a sai ro wuhrẹ amọfa.

⁸ Ohrẹ: Nọ ẹme ọvuọvo o te kuhọ no, ọsẹro isukulu na ọ rẹ rọ iminiti ivẹ yere oniọvo na jẹ kẹe ohrẹ nọ u fo rono obe ọ Wo Erere no Ewuhrẹ ọ Isukulu Odibọgba Esuo-Ọghẹnẹ Ze. Nọ ọsẹro Isukulu o te bi zizie ọmọ-isukulu, ọ rẹ fodẹ onaa ẹmeọta nọ ọmọ-isukulu na o bi ti ru hu. Rekọ nọ o te ru ẹme riẹ no, ọsẹro isukulu na o ve yere iei, kẹsena ọ vẹ fodẹ onaa ẹmeọta nọ a kẹ ọmọ-isukulu na nọ o ru, o ve dhesẹ oghẹrẹ nọ o ro fi onaa ẹmeọta na họ iruo hayo ọ vẹ rọ areghẹ dhesẹ vevẹ kẹe oware nọ u ro wuzou re ọ daoma fi onaa ẹmeọta yena h’iruo evaọ ẹme nọ a te kẹe oke ofa.

⁹ Efọmo uthubro na o rrọ ẹwẹ-obe avọ 79 rite 81 evaọ obe ọ Isukulu Odibọgba nọ ọmọ-isukulu kpobi o wo na. Nọ ewuhrẹ na ọ tẹ fa no, ọsẹro isukulu na o re kere eme fihọ oria nọ u fo evaọ obe ọmọ-isukulu na, ọ vẹ jẹ nọe sọ o ru oware nọ a ta kẹe nọ o ru evaọ oria iruo na. Ọsẹro isukulu na o re yere ọmọ-isukulu na jẹ kẹe ohrẹ evaọ okenọ ewuhrẹ na ọ tẹ fa no hayo evaọ oke ofa. Ọmọ-isukulu na o re rri ehrẹ gbe ekpọvio nọ a be kẹe na wọhọ uvẹ nọ a bi ro fiobọhọ kẹe wo ẹnyaharo ziezi evaọ ukoko na.—1 Tim. 4:15.

¹⁰ Otẹrọnọ ọmọ-isukulu jọ o bi ru vrẹ oke nọ a kẹ riẹ, ọsẹro isukulu na hayo oniọvo ọfa nọ a fihọ ọ rẹ rọ areghẹ vuẹe nọ oke riẹ u re no ẹkwoma ẹgogo nọ o re kporo hayo oware nọ ọ rẹ rọ tehe oria jọ. Nọ ọmọ-isukulu na o te yo edo na, o re ku ẹme riẹ họ okioke yena, o ve no eplatfọmo.—Rri obe ọ Isukulu Odibọgba na, ẹwẹ. 282, edhe. 4.

¹¹ Ma tuduhọ ohwo kpobi nọ o te nọ ọ rẹ sai ru ẹme awọ re o fi odẹ họ otọ rọkẹ Isukulu Odibọgba Esuo-Ọghẹnẹ na. (Rri obe ọ Isukulu Odibọgba na, ẹwẹ. 282, edhe. 6.) Isukulu nana i fiobọhọ kẹ idibo Jihova gaga no nọ a be rọ ta usiuwoma Uvie na avọ imuẹro, adhẹẹ, gbe uyoyou. Ababọ avro, eva e be were Jihova gaga inọ ahwo nọ a bi wo erere no isukulu ukoko na ze a be kẹe ujiro.—Ol. 148:12, 13; Aiz. 50:4.